ଅଲମାଟି, ୧୬ା୪ (ପି.ଟି.)-ଅଲିମ୍ପିକ୍ସରେ ଅଂଶଗ୍ରହଣ କରିବାକୁ ଥିବା ଭାରତୀୟ ରେସ୍ଲର ଭିନେଶ ଫୋଗତ ଓ ଅଂଶୁ ମଲିକ ଏସିଆନ ଚାମ୍ପିୟନଶିପ୍ରେ ସେମାନଙ୍କର ପ୍ରଥମ ସ୍ବର୍ଣ୍ଣ ପଦକ ହାସଲ କରିଛନ୍ତି। ଚାଇନିଜ ଓ ଜାପାନିଜ୍ ପ୍ରତିଦ୍ୱନ୍ଦ୍ୱୀଙ୍କ ଅନୁପସ୍ଥିତିରେ ଭିନେଶ ଶୁକ୍ରବାର ଗୋଟିଏ ହେଲେ ପଏଣ୍ଟ ନ ହରାଇ ୫୩ କେଜି କାଟେଗୋରିରେ ଟାଇଟଲ ଜିତିଥିଲେ। ଏହି ସଂସ୍କରଣ ପୂର୍ବରୁ ସେ ଏସିଆନ ମିଟ୍ରେ ୭ଥର ପୋଡିୟମ ଫିନିଶ କରିପାରିଛନ୍ତି। ତନ୍ମଧ୍ୟରେ ୩ ରୌପ୍ୟ ପଦକ ଅନ୍ତର୍ଭୁକ୍ତ। ଭିନେଶ ମଙ୍ଗୋଲିଆର ଓଟଗୋଁଜାର୍ଗାଲ ଗାନବାଟାର ଏବଂ ତାଇପେର ମେଙ୍ଗ ହୁଆନ୍ ହିଏଙ୍କୁ ଟେକ୍ନିକାଲ ସୁପରିଅରିଟିରେ ପରାସ୍ତ କରିଥିବାବେଳେ ସେମିଫାଇନାଲରେ ଇଞ୍ଜୁରି ଯୋଗୁ କୋରିଆର ହ୍ୟୁନ୍ୟଙ୍ଗ ଓହ ଲଢିବାକୁ ଆସି ନ ଥିଲେ। ଏହି ମହାଦେଶୀୟ ଚାମ୍ପିୟନଶିପ୍ର ଦିଲ୍ଲୀ ସଂସ୍କରଣରେ ବ୍ରୋଞ୍ଜ ଜିତିଥିବା ଭିନେଶ ଫାଇନାଲରେ ହିଏଙ୍କୁ ୬-୦ରେ ପରାସ୍ତ କରିଥିଲେ। ଅନ୍ୟପକ୍ଷରେ କିଛିଦିନ ପୂର୍ବରୁ ଏହି ଭେନ୍ୟୁରେ ଅଲିମ୍ପିକ କୋଟା ହାସଲ କରିଥିବା ଅଂଶୁ ୫୭କେଜି ଶ୍ରେଣୀରେ ଟାଇଟଲ ବିଜୟୀ ହୋଇଛନ୍ତି। ଫାଇନାଲରେ ସେ ମଙ୍ଗୋଲିଆର ବାଟ୍ସେଟ୍ସେଗ୍ ଅଲଟାଣ୍ଟସେଟସେଗ୍ଙ୍କୁ ୩-୦ରେ ପରାସ୍ତ କରିଥିଲେ। ଆରମ୍ଭରେ ଡବଲ ଲେଗ୍ ଆଟାକ୍ ବ୍ୟତୀତ ମଙ୍ଗୋଲିଆନ ପ୍ରତିଦ୍ୱନ୍ଦ୍ୱୀ ବାଉଟ୍ରେ ଅଧିକାଂଶ ସମୟ ନିଜକୁ ଡିଫେଣ୍ଡ କରିବାକୁ ଚେଷ୍ଟା କରିଥିଲେ। ୧୯ ବର୍ଷୀୟା ଏହି ବକ୍ସର ଉଜ୍ବେକିସ୍ତାନର ସେମେରା ଇସ୍ମୁରେଟୋଭା ଏବଂ ସେମିଫାଇନାଲରେ କିରଗିଜସ୍ତାନର ନାଜିରା ମାର୍ସବେକ୍ଙ୍କ ବିପକ୍ଷ ତାଙ୍କ ପ୍ରଥମ ଦୁଇଟି ବାଉଟ୍ରେ ଟେକ୍ନିକାଲ ସୁପରିଅରିଟି ଭିତ୍ତିରେ ଜିତିଥିଲେ। ୬୫କେଜି କାଟେଗୋରିରେ ଭାଗ ନେଉଥିବା ସାଖୀ ମଲିକ ମଧ୍ୟ ଫାଇନାଲରେ ପ୍ରବେଶ କରିଛନ୍ତି। ସ୍ବର୍ଣ୍ଣ ପଦକ ପାଇଁ ସେ ମଙ୍ଗୋଲିଆର ବୋଲରଟୁଙ୍ଗାଲାଗ୍ ଜୋର୍ଗିଟ୍ଙ୍କ ସହ ମୁକାବିଲା କରିବେ।