ଭୁବନେଶ୍ୱର,୪ା୯(ସୁନିତ୍ ମିଶ୍ର): ପୂର୍ବତନ ମୁଖ୍ୟ ଶାସନ ସଚିବ ତଥା ପଶ୍ଚିମ ଓଡ଼ିଶା ବିକାଶ ପରିଷଦ(ଡବ୍ଲ୍ୟୁଓଡିସି) ଅଧ୍ୟକ୍ଷ ଅସିତ ତ୍ରିପାଠୀ ଭୁବନେଶ୍ୱର କ୍ଲବ ସଭାପତି ଭାବେ ତୃତୀୟ ଥର ଲାଗି ନିର୍ବାଚିତ ହୋଇଛନ୍ତି। ଭୁବନେଶ୍ୱର କ୍ଲବ୍ ନିର୍ବାଚନରେ ସଭାପତି ପଦ ଲାଗି ଅସିତ ତ୍ରିପାଠୀ ଏବଂ ତାପସ ରଏଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ହୋଇଥିଲା। ମୋଟ୍ ୧୧୩୬ ଖଣ୍ଡ ଭୋଟ୍ ମିଳିଥିବା ବେଳେ ସେଥିରୁ ଅସୀତଙ୍କୁ ୯୨୧ ଖଣ୍ଡ ଯାଇଥିବା ବେଳେ ତାପସଙ୍କ ଖାତାରେ ୨୦୭ ଖଣ୍ଡ ପଡ଼ିଥିବା ଜଣାପଡିଛି। ଗତଥର ନିର୍ବାଚନରେ ସେ ଅବସରପ୍ରାପ୍ତ ଆଇଏଏସ୍ ଅଫିସର ସତ୍ୟ ପ୍ରକାଶ ନନ୍ଦଙ୍କୁ ହରାଇ ସଭାପତି ହୋଇଥିଲେ। ସେହିପରି ୨୦୨୧ରେ ଅସିତ୍ ପୂର୍ବତନ ମୁଖ୍ୟ ଶାସନ ସଚିବ ବିଜୟ ପଟ୍ଟନାୟକଙ୍କୁ ହରାଇ ସଭାପତି ହୋଇଥିଲେ।
ତେବେ ମିଳିଥିବା ସୂଚନା ମୁତାବକ ଅସିତ୍ଙ୍କ ସହ ତାଙ୍କ ପୂରା ଟିମ୍ ନିର୍ବାଚନରେ ବିଜୟୀ ହୋଇଛନ୍ତି। ଅଶୋକ କୁମାର ମିଶ୍ର ତାଙ୍କ ନିକଟତମ ପ୍ରତିଦ୍ୱନ୍ଦ୍ୱୀ ସଞ୍ଜୀବ କୁମାର ବାଲାଙ୍କୁ ହରାଇ ସେକ୍ରେଟାରି ହୋଇଛନ୍ତି। ସେହିପରି ପ୍ରଗତି ମହାନ୍ତି ଉପସଭାପତି ଭାବେ ବିଜୟୀ ହୋଇଥିବା ବେଳେ ପାର୍ଥଜିତ ପଟ୍ଟନାୟକ ଯୁଗ୍ମ ସମ୍ପାଦକ ହୋଇଛନ୍ତି। ଏହାସହ ୬ ଜଣ କାର୍ଯ୍ୟକାରୀ ସଦସ୍ୟ ମଧ୍ୟ ବିଜୟୀ ହୋଇଥିବା ଜଣାପଡିଛି।
