ଭୁବନେଶ୍ୱର,୧୨।୧(ବ୍ୟୁରୋ): ଅବସରପ୍ରାପ୍ତ ମୁଖ୍ୟ ଶାସନ ସଚିବ ଅସିତ କୁମାର ତ୍ରିପାଠୀ ସୋମବାର ମୁଖ୍ୟମନ୍ତ୍ରୀଙ୍କ ପ୍ରମୁଖ ପରାମର୍ଶଦାତା ଏବଂ ପଶ୍ଚିମ ଓଡିଶା ବିକାଶ ପରିଷଦ (ଡବ୍ଲ୍ୟୁଓଡିସି) ଅଧ୍ୟକ୍ଷ ଭାବେ କାର୍ଯ୍ୟରେ ଯୋଗଦେଇଛନ୍ତି। ସେ ରାଜୀବ ଭବନଠାରେ ଡବ୍ଲ୍ୟୁଓଡିସି କାର୍ଯ୍ୟର ସମୀକ୍ଷା କରି କହିଛନ୍ତି, ଆଞ୍ଚଳିକ ଉନ୍ନୟନକୁ ସମାନ କରିବା ପରିଷଦର ମୁଖ୍ୟ ଲକ୍ଷ୍ୟ ହେବା ଉଚିତ। ପ୍ରକଳ୍ପଗୁଡିକ ନିର୍ଦ୍ଧାରିତ ସମୟରେ ଶେଷ କରିବା ଏବଂ ଲୋକମାନଙ୍କୁ ତୁରନ୍ତ ସେବା ଯୋଗାଇ ଦିଆଯିବା ଉଚିତ୍। ଏହି ଅବସରରେ ଅସିତ ତୃଣମୂଳ ସ୍ତରରୁ ସର୍ଭେ କରି ଜଟିଳ ବିକାଶମୂଳକ ଉପାଦାନଗୁଡିକ ପାଇଁ ଡାଟାବେସ ପ୍ଲାଟଫର୍ମ ପ୍ରସ୍ତୁତ କରିବାକୁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ଫାଇଲଗୁଡିକ ତ୍ୱରିତ ବେଗରେ ଯିବା ଓ ସ୍ବଚ୍ଛତା ରକ୍ଷା ଲାଗି ୫-ଟି ନୀତିକୁ ଅନୁସରଣ କରିବାକୁ ପରମର୍ଶ ଦେଇଛନ୍ତି। ସମସ୍ତ ଫାଇଲକୁ କମ୍ପ୍ୟୁଟରୀକରଣ କରିବା ସହ ସେଗୁଡିକୁ ଓଡିଶା ସେକ୍ରେଟାରୀଏଟ ଓ୍ବାର୍କଫ୍ଲୋ ଅଟୋମେଶନ ସିଷ୍ଟମ (ଓସଓ୍ବାସ)ସହିତ ସଂଯୋଗ କରିବାକୁ ପରିଷଦର ସିଇଓ ସରୋଜ ପଟେଲଙ୍କୁ ନିର୍ଦ୍ଦେଶ ଦିଆଯାଇଛି। ଆବଶ୍ୟକ ହେଲେ କର୍ମଚାରୀଙ୍କର ଦକ୍ଷତା ବୃଦ୍ଧି ପାଇଁ ତାଲିମ ବ୍ୟବସ୍ଥା କରାଯିବ। କୌଣସି ଫାଇଲ ନ ରଖି ସେହିଦିନ ପଠାଇବାକୁ ଅଧିକାରୀମାନଙ୍କୁ ପରାମର୍ଶ ଦେଇଛନ୍ତି। ୩ ହଜାରରୁ ଊର୍ଦ୍ଧ୍ୱ ସୂକ୍ଷ୍ମ ଓ କ୍ଷୁଦ୍ର ପ୍ରକଳ୍ପ ୧୦ଟି ଜିଲା ବରଗଡ, ବଲାଙ୍ଗୀର, ବୌଦ୍ଧ, ଦେବଗଡ, କଳାହାଣ୍ଡି, ନୂଆପଡା, ଝାରସୁଗୁଡା, ସମ୍ବଲପୁର, ସୁନ୍ଦରଗଡ ଏବଂ ଆଠମଲ୍ଲିକ ସବ୍ଡିଭିଜନରେ କାର୍ଯ୍ୟକାରୀ ହେଉଛି।