ମହାକାଳପଡ଼ା, ୨୨ା୧୦(ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଞ୍ଚଳରେ ପ୍ରଶାସନ ପକ୍ଷରୁ ବାତ୍ୟା ଆଶଙ୍କାକୁ ନେଇ ବିଭିନ୍ନ ସ୍ଥାନରେ ଡାକବାଜି ଯନ୍ତ୍ର ଜରିଆରେ ଶୁକ୍ରବାର ପ୍ରଚାର କରାଯାଇଛି। ଆସନ୍ତା ୨୨ରୁ ୨୬ ତାରିଖ ପର୍ଯ୍ୟନ୍ତ ଅଶାନ୍ତ ରହୁଥିବା ସମୁଦ୍ର ଭିତରକୁ ଯିବା ଲାଗି ବାରଣ କରାଯାଇଛି ବୋଲି ପ୍ରଶାସନ ପକ୍ଷରୁ ସଚେତନ କରାଯାଇଥିଲା। ବ୍ଲକର ବତୀଘର, ଖରିନାସୀ, ରାମନଗର, ଜମ୍ବୁ, ସୁନିତି, ନାଞ୍ଜୁରା ଆଦି ପଞ୍ଚାୟତରେ ମତ୍ସ୍ୟଜୀବୀମାନଙ୍କୁ ସତର୍କ ସୂଚନା ଦିଆଯାଇଛି। ଯେଉଁମାନେ ସମୁଦ୍ରକୁ ମାଛ ମାରିବାକୁ ଯାଇଛନ୍ତି ସେମାନେ ଶୀଘ୍ର ଫେରି ଆସିବାକୁ କୁହାଯାଇଛି। ତେବେ ଜମ୍ବୁ ସାମୁଦ୍ରିକ ଥାନା ବୈଷୟିକ ଟିମ୍ କର୍ମଚାରୀଙ୍କ ସହ ମହାକାଳପଡ଼ା ସାମୁଦ୍ରିକ ମତ୍ସ୍ୟ ବିଭାଗ ଅଧିକାରୀ ଓ କର୍ମଚାରୀମାନେ ଖରିନାସୀ ମତ୍ସ୍ୟ ଅବତରଣ କେନ୍ଦ୍ରଠାରୁ ହାଇସ୍ପିଡ୍ ବୋଟ୍ରେ ଯାଇ ନିକଟ ହୁକିଟୋଲା ମୁହାଣ ଓ ସମୁଦ୍ର ମଧ୍ୟରେ ଯାଇ ପଇଁତରା ମାରିଥିଲେ। ସମୁଦ୍ର ପଥରେ କୌଣସି ମାଛଧରା ଡଙ୍ଗା ରହିଯାଇଥିବ ତା’ର ଠାବ ପାଇଁ ସଚେତନ କରିଥିଲେ। ପରେ ଡାକବାଜି ଯନ୍ତ୍ର ଯୋଗେ ବିଭିନ୍ନ ସ୍ଥାନରେ ପ୍ରଚାର କରି ସମ୍ଭାବ୍ୟ ବାତ୍ୟା ଆଶଙ୍କାରେ ସ୍ଥାନୀୟ ଲୋକ ଓ ମତ୍ସ୍ୟଜୀବୀଙ୍କୁ ସଚେତନ କରିଥିଲେ। ସମ୍ଭାବ୍ୟ ବାତ୍ୟାରେ କୌଣସି ମତ୍ସ୍ୟଜୀବୀ ଯେପରି ସମୁଦ୍ରରେ ନ ରୁହନ୍ତି ସେଥିପାଇଁ ସ୍ଥାନୀୟ ମତ୍ସ୍ୟଜୀବୀ ସଂଘର କର୍ମକର୍ତ୍ତାମାନଙ୍କୁ ଅବଗତ କରାଇଥିଲେ। ଲୟ ଏହି ସଚେତନତା କାର୍ଯ୍ୟକ୍ରମରେ ସାମୁଦ୍ରିକ ବିଭାଗ ସହକାରୀ ମତ୍ସ୍ୟ ଅଧିକାରୀ ଦୀପକ କୁମାର ମଲିକ , ସାଗର ମିତ୍ର ଗଣେଶ ବାରିକ, ରାକେଶ ମହାନ୍ତିଙ୍କ ସମେତ ଜମ୍ବୁ ସାମୁଦ୍ରିକ ଥାନା ଟେକ୍ନିକାଲ ଟିମ୍ କର୍ମଚାରୀମାନଙ୍କ ମଧ୍ୟରେ ଆର. କେ. ଖଁା, ସନ୍ତୋଷ କୁମାର ଲେଙ୍କା , ପ୍ରଫୁଲ୍ଲ ଚନ୍ଦ୍ର ସାହୁ , ଉପେନ୍ଦ୍ର କୁମାର ନାୟକ , ବିଭୂତି କୁମାର ପରିଡ଼ା ସଚେତନତା କାର୍ଯ୍ୟକ୍ରମରେ ସାମିଲ ହୋଇଥିଲେ। ମିଳିଥିଲା ସୂଚନା ଅନୁସାରେ, ଏହି ଅଞ୍ଚଳରେ ୨ ହଜାର ପଞ୍ଜୀକୃତ ବୋଟ୍ ଥିବାବେଳେ ୧୦ ହଜାରରୁ ଅଧିକ ମତ୍ସ୍ୟଜୀବୀ ରହିଛନ୍ତି। ଏମାନେ ସମୁଦ୍ରରୁ ମାଛ ଧରି ପରିବାର ପ୍ରତିପୋଷଣ କରିଥାନ୍ତି।
