ଭୋପାଳ,୨୮।୫: ଖାଦ୍ୟ ଦେବାରେ ବିଳମ୍ବ ପାଇଁ ସ୍ବାମୀ ନିଜ ଉପରୁ ଆୟତ୍ତ ହରାଇ ସ୍ତ୍ରୀଙ୍କୁ କୂଅକୁ ଫିଙ୍ଗି ଦେଇଛନ୍ତି। ଏଭଳି ଅଭାବନୀୟ ଘଟଣା ମଧ୍ୟପ୍ରଦେଶର ହାତପିପ୍ଲିୟା ଅଞ୍ଚଳର ଦଓ୍ବୋସରେ ଘଟିଛି। ମଙ୍ଗଳବାର ଦିନେଶ ମାଳି ଅପରାହ୍ନରେ ଘରକୁ ଖାଇବାକୁ ଆସିଥିଲେ। ଖାଦ୍ୟ ପ୍ରସ୍ତୁତ ହୋଇ ଥିଲେ ହେଁ ସ୍ତ୍ରୀ ଯଶୋଦା ଅନ୍ୟ କାମରେ ବ୍ୟସ୍ତ ଥିବା ବେଳେ ଟିକେ ଅପେକ୍ଷା କରିବାକୁ ଦିନେଶଙ୍କୁ କହିଥିଲେ। ମାତ୍ର ଏତିକି କଥାରେ ଉତ୍ତ୍ୟକ୍ତ ହୋଇପଡ଼ିଥିଲେ ସ୍ବାମୀ। ଏହାପରେ ଲଣ୍ଡ୍ରି ବ୍ୟାଟ୍(ଲଗୁା ସଫାରେ ବ୍ୟବହୃତ ବ୍ୟାଟ୍)ରେ ସ୍ତ୍ରୀଙ୍କୁ ପିଟିଥିଲେ। ସେଥିରେ ତାଙ୍କ ମନ ଭରି ନ ଥିଲା ଯେ, ମାଡ଼ ଖାଇ ଆହତ ଅବସ୍ଥାରେ ଥିବା ସ୍ତ୍ରୀଙ୍କୁ କୂଅରେ ନେଇ ପକାଇ ଦେଇଥିଲେ। ଘରେ ଥିବା ତାଙ୍କ ଝିଅ ନିକିତା ଏହାର ପ୍ରତିବାଦ କରିଥିଲେ ହେଁ ଦିନେଶ କାହାରି କଥା ଶୁଣି ନ ଥିଲେ। ଘଟଣା ପରେ ଝିଅ ନିକିତା ଏ କଥା ତାଙ୍କ ସମ୍ପର୍କୀୟଙ୍କୁ କହିଥିଲେ। ପୋଲିସ ଘଟଣା ସମ୍ପର୍କରେ ଜାଣିବା ପରେ ସେଠାରେ ପହଞ୍ଚି କୂଅରୁ ଯଶୋଦାଙ୍କ ମୃତଦେହ ଜବତ କରିଥିଲା। ବ୍ୟବଚ୍ଛେଦ ପାଇଁ ମୃତଦେହକୁ ସ୍ଥାନୀୟ ଡାକ୍ତରଖାନାକୁ ପଠାଇ ଦିଆଯାଇଛି। ଦିନେଶଙ୍କ ବିରୋଧରେ ଆଇପିସି ଧାରା ୩୦୨, ୨୯୪,୩୨୩ ଏବଂ ୨୦୧ ଅନ୍ତର୍ଗତ ମାମଲା ରୁଜୁ କରିବା ପରେ ତାଙ୍କୁ ଗିରଫ କରାଯାଇଛି।
