ସୁନ୍ଦରଗଡ଼ରୁ ଅନିଲ ଦାସ,୧୯ା୫: ଭୋଟ୍ ବେଲେ ମାଗି ଆଏସନ୍, ପଛେ ଦେଖା ନି ମିଲେ। ଏହାର ଅର୍ଥ ନେତାମାନେ ନିିର୍ବାଚନ ସମୟରେ ଭୋଟ ମାଗିବାକୁ ଘରକୁ ଆସୁଥିବା ବେଳେ ଅନ୍ୟ ସମୟରେ ସେମାନଙ୍କର ଦେଖା ମିଳେନାହିଁ। ସୁନ୍ଦରଗଡ଼ ସହରରୁ ୩୦ କିଲୋମିଟର ଦୂରରେ ଥିବା ଖପ୍ରିଖମନ ଗ୍ରାମର କେତେଜଣ ବୟସ୍କ ମତଦାତା ଧରିତ୍ରୀ ଟିମ୍କୁ ଏଭଳି ପ୍ରତିକ୍ରିୟା ଦେଇ କହିିଛନ୍ତି। ଆମେ ଯେତେବେଳେ ସେମାନଙ୍କୁ ଭେଟିଲୁ, ସେମାନେ କ୍ଷୋଭ ପ୍ରକାଶ କରି କହିଲେ, ନିର୍ବାଚନ ଚାଲୁଛି, ନେତା ଆସୁଛନ୍ତି ଯାଉଛନ୍ତି, କିଏ କ’ଣ କରୁଛି ଆମେ ଜାଣିନୁ। ଆମେ ଗରିବ ଲୋକ, କାମଧନ୍ଦା କରି ପେଟ ପୋଷୁଛୁ। ପିଇବା ପାଣି ମିଳୁନି, କାମଧନ୍ଦା ମିଳୁନି। କେନ୍ଦୁପତ୍ର, ମହୁଲ ବିକ୍ରି ହେଉନି। ଆମକୁ ଠିକ୍ ଦାମ୍ ମିଳୁନି। ଶୌଚାଳୟରେ ପାଣି ନାହିଁ। ଆମେ ବହୁତ ଅସୁବିଧାରେ ଅଛୁ। ଭୋଟ ମାଗିବାକୁ ଆସୁଛନ୍ତି। ଭୋଟ ତ ଦେବୁ। ଖପ୍ରିଖମନ ଗାଁର ମହିଳା ଭୋଟର ସୁଭଦ୍ରା କିଷାନ କହିଛନ୍ତି, ଆମେ ଗରିବ ଲୋକ, କାମଧନ୍ଦା କରି ପେଟ ପୋଷୁଛୁ। ସବୁଦିନ କାମ ମିଳୁନି। ବାଡ଼ିବଗିଚାର ପନିପରିବା, କେନ୍ଦୁପତ୍ର, ମହୁଲ ଫୁଲ ବିକି ବହୁତ କଷ୍ଟରେ ଚଳୁଛୁ। ବର୍ଷାଦିନେ ଆମ ନାଳରେ ପାଣି ଆସି ଅସୁବିଧା କରୁଛି। ଏଥର ପୋଲ ହେଉଛି। ଟିକେ ସୁବିଧା ହେବ। ଆମ ଘରେ ଶୌଚାଳୟ ହୋଇଛି। ପାଣି ନାହିଁ। ପିଇବାକୁ ପାଣି ମିଳୁନି। ଶୌଚାଳୟ ପାଇଁ ପାଣି ଆଣିବୁ କେଉଁଠୁ। ଗାଁରେ ଗୋଟେ ନଳକୂଅ ଅଛେ। ଗାଁ ଗୋଟାଯାକର ଲୋକେ ସେଇଠୁ ପାନି ନେଉଛୁ। ଯିଏ ଆମର କାମ୍ କର୍ବା, ତାଙ୍କେ ଭୋଟ୍ ଦେମୁ। କୁମର ବାଗ କହିଛନ୍ତି, ଖାଇକାଜେ ପାନି ନି ମିଲ୍ବାର। ଲାଟ୍ରିନ୍ ପାଇଁ ପାନି କେନୁ ଆନୁମ୍। ସରକାର୍ ଇଟା ସୁବିଧା କଲେ ଭଲ ହେଇତା। ଏହି ଭୋଟରମାନଙ୍କ କଥାରୁ ସ୍ପଷ୍ଟ ହେଉଛି ଯେ ବିକାଶ ସତେଯେମିତି ଏମାନଙ୍କ ପାଖରେ ଅପହଞ୍ଚ। ତେବେ ନିର୍ବାଚନ ଋତୁରେ ବିଭିନ୍ନ ରାଜନୈତିକ ଦଳର ପ୍ରାର୍ଥୀ ଏଇଟା କରିଦେବୁ, ସେଇଟା କରିଦେବୁ କହି ଲୋକଙ୍କୁ ନିଜ ଆଡ଼କୁ ଆକର୍ଷିତ କରାଉଛନ୍ତି। ଏଭଳି ସ୍ଥିତିରେ ରାଜନୀତି ଜାଣି ନ ଥିବା ସାଧାରଣ ଲୋକଙ୍କ ମତ କୁଆଡ଼େ ଯାଉଛି ଆଉ ଦିନ କେଇଟା ପରେ ସ୍ପଷ୍ଟ ହୋଇଯିବ।