ବଲିଉଡ ଅଭିନେତା କାର୍ତ୍ତିକ ଆର୍ଯ୍ୟନ ଆଜିକାଲି ଚର୍ଚ୍ଚାରେ ଅଛନ୍ତି। ତାଙ୍କର ଫିଲ୍ମ ‘ଭୁଲ୍ ଭୁଲେୟା ୨’ ବକ୍ସ ଅଫିସରେ ସୁପରହିଟ୍ ସାବ୍ୟସ୍ତ ହୋଇଛି। ଏହି ଫିଲ୍ମ ଏପର୍ଯ୍ୟନ୍ତ ୧୮୦ କୋଟି ବ୍ୟବସାୟ କରିସାରିଛି ଏବଂ ଖୁବ ଶୀଘ୍ର ୨୦୦ କୋଟି କ୍ଲବରେ ଯୋଗଦେବ। କାର୍ତ୍ତିକ ଫିଲ୍ମର ସଫଳତାକୁ ନେଇ ବେଶ୍ ଖୁସି ଅଛନ୍ତି। ଏହି ଖୁସିକୁ ତାଙ୍କ ପ୍ରଶଂସକଙ୍କ ସହ ଶେୟାର କରିବାକୁ ଆଦୌ ଭୁଲି ନାହାନ୍ତି। କାର୍ତ୍ତିକ ସୋସିଆଲ ମିଡିଆ ମାଧ୍ୟମରେ ତାଙ୍କ ପ୍ରଶଂସକଙ୍କ ସହ ଯୋଡି ହୋଇ ରହିବାକୁ ଚେଷ୍ଟା କରନ୍ତି। ନିକଟରେ କାର୍ତ୍ତିକ ଟୁଇଟର୍ରେ ତାଙ୍କ ପ୍ରଶଂସକଙ୍କ ସହ ସିଧାସଳଖ କଥାବାର୍ତ୍ତା କରିଥିଲେ। ଏହି ସମୟରେ ସେ ପ୍ରଶଂସକଙ୍କ ଅନେକ ପ୍ରଶ୍ନର ଉତ୍ତର ଦେଇଥିଲେ।
କାର୍ତ୍ତିକ ଟୁଇଟର୍ରେ #ଆସ୍କକାର୍ତ୍ତିକ ଅଧିବେଶନ କରିଥିଲେ। ଏଠାରେ ତାଙ୍କୁ ପ୍ରଶଂସକମାନେ ଅନେକ ପ୍ରଶ୍ନ ପଚାରିଥିଲେ, ଯାହାର ସେ ମଜାଳିଆ ଉତ୍ତର ଦେଇଥିଲେ। ଜଣେ ପ୍ରଶଂସକ କାର୍ତ୍ତିକଙ୍କୁ ପଚାରିଥିଲେ ଯେ, ସେ ଗୋଟିଏ ସପ୍ତାହରେ କେତେ ବିବାହ ପ୍ରସ୍ତାବ ପାଇଛନ୍ତି। ଏହାର ଉତ୍ତରରେ କାର୍ତ୍ତିକ ୧୮୦ କୋଟି ବିବାହ ପ୍ରସ୍ତାବ ଆସିଥିବା କହିଛନ୍ତି। କାର୍ତ୍ତିକ ଏହି ପ୍ରସ୍ତାବଗୁଡ଼ିକୁ ‘ଭୁଲ୍ ଭୁଲେୟା ୨’ର କଲେକ୍ସନ ସହିତ ଯୋଡି ମଜାଳିଆ ଢଙ୍ଗରେ ଜବାବ ଦେଇଛନ୍ତି।
‘ଭୁଲ ଭୁଲେୟା-୨’ରେ କିଆରା ଆଡଭାନୀ, ତବୁ, ରାଜପାଲ ଯାଦବ ଏବଂ ସଞ୍ଜୟ ମିଶ୍ର ମୁଖ୍ୟ ଭୂମିକାରେ ଅଭିନୟ କରିଛନ୍ତି। ଆନିସ ବାଜମିଙ୍କ ନିର୍ଦ୍ଦେଶିତ ଏହି ଫିଲ୍ମଟି ଏବେ ଓଟିଟିରେ ରିଲିଜ୍ ହୋଇଛି।