କଟକ ଅଫିସ୍,୧୬।୨: ଆୟ ବହିର୍ଭୁତ ସମ୍ପତ୍ତି ଠୁଳ ଅଭିଯୋଗରେ ପୋଲିସ କମ୍ୟୁନିକେଶନ୍ ସେଲ୍ରେ କାର୍ଯ୍ୟରତ ଅତିରିକ୍ତ ଏସ୍ପି ତ୍ରିନାଥ ମିଶ୍ର ବୁଧବାର ଗିରଫ ହୋଇଛନ୍ତି। ତାଙ୍କୁ ଭିଜିଲାନ୍ସ ପକ୍ଷରୁ ଗିରଫ କରାଯାଇଥିବା ସୂଚନା ମିଳିଛି। ଏହାସହ ତାଙ୍କ ସ୍ତ୍ରୀଙ୍କ ନାଁେରେ ମଧ୍ୟ ଏକ ମାମଲା ରୁଜୁ ହୋଇଛି।
ସୂଚନାଯୋଗ୍ୟ, କଟକ ଭିଜିଲାନ୍ସ ସ୍ବତନ୍ତ୍ର କୋର୍ଟଙ୍କ ଦ୍ୱାରା ଜାରି ଓ୍ବାରେଣ୍ଟ ବଳରେ ଦୁର୍ନୀତି ନିବାରଣ ବିଭାଗର ୩ଜଣ ଅତିରିକ୍ତ ଏସ୍ପି, ୧୦ଜଣ ଡିଏସ୍ପି, ୧୩ଜଣ ଇନ୍ସପେକ୍ଟରଙ୍କ ସମେତ ୪୦ରୁ ଊର୍ଦ୍ଧ୍ୱ କର୍ମଚାରୀ ଭୋର ୪ଟାରୁ ଏକକାଳୀନ କଟକ, ଭୁବନେଶ୍ୱର, ଯାଜପୁର ଏବଂ ନବରଙ୍ଗପୁରର ୧୧ଟି ସ୍ଥାନରେ ଚଢ଼ାଉ କରିଥିଲେ। ରାତି ସୁଦ୍ଧା ମିଳିଥିବା ରିପୋର୍ଟ ଅନୁଯାୟୀ ମିଶ୍ରଙ୍କ ପ୍ରାୟ ସାଢ଼େ ୭କୋଟିରୁ ଊର୍ଦ୍ଧ୍ୱ ଟଙ୍କା ମୂଲ୍ୟର ଘର, ନର୍ସିଂହୋମ, ଔଷଧ ଦୋକାନ ଓ ବିଳାସପୂର୍ଣ୍ଣ ୭ଟି ଗାଡ଼ି ଠାବ ହୋଇଛି। ସେଥିମଧ୍ୟରେ ବିଏମ୍ଡବ୍ଲ୍ୟୁ ସମେତ ୪ଟି କାର୍ ଏବଂ ୩ଟି ସୁପର ବାଇକ୍ ଠାବ କରାଯାଇଛି। କେବଳ ଗାଡ଼ିଗୁଡ଼ିିକର ଆନୁମାନିକ ମୂଲ୍ୟ ପ୍ରାୟ ଦେଢ଼ କୋଟିରୁ ଊର୍ଦ୍ଧ୍ୱ ଟଙ୍କା ହେବ।