ଗୁଆହାଟି,୧୬ ।୧: ନିଜ ବୟାନକୁ ନେଇ ଅନେକ ସମୟରେ ଚର୍ଚ୍ଚାରେ ରହୁଥିବା ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ସରମା ଏବେ ପୁଣି ଆସିଛନ୍ତି ଚର୍ଚ୍ଚାକୁ । ହେଲେ ଏଥର ବୟାନ ପାଇଁ ନୁହେଁ ଅନ୍ୟ କାରଣ ପାଇଁ ସେ ଚର୍ଚ୍ଚାକୁ ଆସିଛନ୍ତି । ସୋସିଆଲ ମିଡିଆରେ ସେ ଏକ ଭିଡିଓ ଶେୟାର କରିବା ପରେ ସମସ୍ତେ ଏହାକୁ ଖୁବ୍ ପସନ୍ଦ କରିଛନ୍ତି । ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ସରମା ରବିବାର ଗୁଆହାଟି ଚିଡିଆଖାନା ବୁଲିବାକୁ ଯାଇଥିଲେ । ସେଠାକୁ ସେ ଏକାଏକା ଗାଡି ଚଳାଇ ଯିବା ସହ ସେଠାରେ ଚାଲିଥିବା କାମର ସମିକ୍ଷା କରିଥିଲେ । ଏହି ସମୟରେ ମୁଖ୍ୟମନ୍ତ୍ରୀ ଘୋଷଣା କରିଛନ୍ତି କି ଚିଡିଆଖାନାକୁ ଏକ ପ୍ରସିଦ୍ଧ ପର୍ଯ୍ୟଟନ ସ୍ଥଳରେ ପରିବର୍ତ୍ତନ କରାଯିବ ।
ଏହି ସମୟରେ ସେ ଚିଡିଆଖାନା ପରିଦର୍ଶନ କରିବା ସହ ଅଧିକାରୀମାନଙ୍କ ସହ ଆଲୋଚନା ବି କରିଥିଲେ । ସେଠାରେ ଥିବା ଶୁଆଙ୍କୁ ନିଜ ହାତରେ ଖାଇବାକୁ ଦେବା ଓ ମକାଓକୁବି ନିଜ ହାତରେ ଖାଇବାକୁ ଦେଇଥିଲେ ମୁଖ୍ୟମନ୍ତ୍ରୀ । ତାଙ୍କର ଏହି ଭିନ୍ନ ରୂପ ସମସ୍ତଙ୍କ ମନକୁ ଛୁଇଁ ଯାଇଥିଲା । ମୁଖ୍ୟମନ୍ତ୍ରୀଙ୍କ ଘୋଷଣା ପରେ ଚିଡିଆଖାନାକୁ ଏକ ବନସ୍ପତି ଉଦ୍ୟାନ ଓ ନାଇଟ ସଫାରି ମିଳିବା ଆଶା କରାଯାଏ ।
ସୂଚନାଯୋଗ୍ୟ, ରାଜ୍ୟର ଏହି ଚିଡିଆଖାନାଟି ଗୁଆହାଟିରେ ୪୩୨ ଏକର ଜମିରେ ପ୍ରସାରିତ । ଏଠାରେ ପ୍ରାୟ ୧୧୩ ପ୍ରଜାତୀର ଜୀବ ରହିଛନ୍ତି । ଏହାସହ ପୂର୍ବୋତ୍ତର ଭାରତର ଏହା ସବୁଠାରୁ ବଡ ଚିଡିଆଖାନା ।