ଗୁଆହାଟୀ,୨୨।୧ : ପଠାନ ଫିଲ୍ମକୁ ନେଇ ଉପୁଜି ଥିବା ବିବାଦକୁ ନେଇ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ସରମା ଶନିବାର କହିଥିଲେ ଯେ, ଶାହାରୁଖ ଖାନ୍ କିଏ ମୁଁ ତାଙ୍କୁ ଚିହ୍ନି ନାହିଁ। ଜାନୁୟାରୀ ୨୫ରେ ଏହି ଫିଲ୍ମ ରିଲିଜ ହେବାକୁ ଯାଉଥିବାବେଳେ ବଜରଙ୍ଗ ଦଳ ପକ୍ଷରୁ ରାଜ୍ୟରେ ବିରୋଧ ପ୍ରଦର୍ଶନ ଜାରି ରହିଛି। ହିମନ୍ତ କହିଥିଲେ ଯେ, ସେହିଦିନ ଆସାମରେ ଡାକ୍ତର ବେଜ ବରୁଆ ପାର୍ଟ-୨ ରିଲିଜ ହେଉଛି। ଲୋକେ ତାକୁ ଦେଖନ୍ତୁ। ପଠାନ ଦେଖିବାର ଆବଶ୍ୟକତା ନାହିଁ।
ମୁଖ୍ୟମନ୍ତ୍ରୀ ଏଭଳି କହିବାର କିଛି ଘଣ୍ଟା ପରେ କିଙ୍ଗ୍ ଖାନ୍ ତାଙ୍କ ପାଖକୁ ଫୋନ କରିଛନ୍ତି। ଏନେଇ ଏକ ଟୁଇଟରେ ମୁଖ୍ୟମନ୍ତ୍ରୀ କହିଛନ୍ତି, ବଲିଉଡ ଅଭିନେତା ଶାହାରୁଖ ମୋତେ ଫୋନ କରିଥିଲେ ଏବଂ ଆମେ ଶନିବାର-ରବିବାର ରାତି ୨ ଟାରେ କଥା ହୋଇଛୁ। ତାଙ୍କ ଫିଲ୍ମର ସ୍କ୍ରିନିଂ ସମୟରେ ଗୁଆହାଟୀରେ ଘଟିଥିବା ଏକ ଘଟଣାକୁ ନେଇ ସେ ଉଦବେଗ ପ୍ରକାଶ କରିଥିଲେ। ମୁଁ ତାଙ୍କୁ ଆଶ୍ୱାସନା ଦେଇଥିଲି ଯେ ଆଇନ ଏବଂ ଶୃଙ୍ଖଳା ବଜାୟ ରଖିବା ରାଜ୍ୟ ସରକାରଙ୍କ କର୍ତ୍ତବ୍ୟ। ଆମେ ଅନୁସନ୍ଧାନ କରିବୁ ଏବଂ ନିଶ୍ଚିତ କରିବୁ ଯେ ଆଉ ଯେପରି ଏପରି ଅପ୍ରିୟ ଘଟଣା ଘଟିବ ନାହିଁ।
ସୂଚନାଯୋଗ୍ୟ, ଫିଲ୍ମର ବେସରମ ରଙ୍ଗ… ଗୀତରେ ଅଭିନେତ୍ରୀ ଦୀପିକା ଏକ ଗୈରିକ ରଙ୍ଗର ବିକିନ ପିନ୍ଧିଛନ୍ତି। ଏହାକୁ ନେଇ ବିବାଦ ସୃଷ୍ଟି ହୋଇଛି।