ସମ୍ବଲପୁର,୨୧ା୧୨(ପ୍ରମୋଦ ବହିଦାର): ସମ୍ବଲପୁରଠାରେ ଥିବା ଅହମିଆ କବି ଲକ୍ଷ୍ମୀକାନ୍ତ ବେଜବରୁଆଙ୍କ ବାସଗୃହ ଓ ସାହିତ୍ୟ ସାଧନା ପୀଠକୁ ଗୁରୁବାର ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମାଙ୍କ ପରିବାର ସଦସ୍ୟ ପରିଦର୍ଶନ କରିଛନ୍ତି। ଏଥିରେ ତାଙ୍କ ମା’ ମ୍ରିଣାଳିନୀ ଦେବୀ, ଜ୍ୟେଷ୍ଠଭ୍ରାତା ଦିଗନ୍ତ ବିଶ୍ୱଶର୍ମା ଓ ଧର୍ମପତ୍ନୀ ଦୀପାରାଣୀ ଗୋଶ୍ୱାମୀ ବିଶ୍ୱଶର୍ମା ପ୍ରମୁଖ ସାମିଲ ଥିଲେ।
ସେମାନେ ସଡ଼କପଥରେ ଭୁବନେଶ୍ୱରରୁ ବାହାରି ମଧ୍ୟାହ୍ନରେ ସମ୍ବଲପୁରରେ ପହଞ୍ଚିଥିଲେ। ଏହି ସମୟରେ ବେଜବରୁଆ ସ୍ମୃତିରକ୍ଷା କମିଟି ଆହାବକ ଦୀପକ ପଣ୍ଡାଙ୍କ ନେତୃତ୍ୱରେ କମିଟି ସଦସ୍ୟ ପ୍ରଫୁଲ୍ଲ ହୋତା, କମଳ ଲୋଚନ ପଣ୍ଡା, ଲଳିତ ମୋହନ ବେବର୍ତ୍ତା, ପିଙ୍କି ପ୍ରଧାନ, ସୂର୍ଯ୍ୟ ପାଣିଗ୍ରାହୀ, ତର୍ପଣ ପ୍ରଧାନ ପ୍ରମୁଖଙ୍କ ସହ ଜିଲା ସୂଚନା ଓ ଲୋକସମ୍ପର୍କ ଅଧିକାରୀ ଫକୀର ମୋହନ ମାଝି ସେମାନଙ୍କୁ ସ୍ବାଗତ ଜଣାଇଥିଲେ।
ଆସାମ ମୁଖ୍ୟମନ୍ତ୍ରୀଙ୍କ ପରିବାର ସ୍ମୃତିରକ୍ଷା କମିଟି ସଦସ୍ୟଙ୍କ ଗହଣରେ ସ୍ବର୍ଗତ ବେଜବରୁଆଙ୍କ ସ୍ମୃତି ଓ ସାଧନାପୀଠ ସହ ତାଙ୍କ ବାସଗୃହ ପରିଦର୍ଶନ କରିଥିଲେ। ବେଜବରୁଆଙ୍କ କର୍ମଭୂମି ସମ୍ବଲପୁର ବୁଲିବାର ଅଭିଳାସ ପୂରଣ ହୋଇଥିବାରୁ ବିଶେଷ ଆନନ୍ଦିତ ବୋଲି ପରିବାର ଲୋକେ କହିଛନ୍ତି। ଏହାସହ ଏଠାରେ ତାଙ୍କୁ ମିଳିଥିବା ଆତ୍ମିୟତା ଓ ଆତିଥ୍ୟକୁ ସେମାନେ ଭୂୟଶୀ ପ୍ରଶଂସା କରିଥିଲେ।
ସୂଚନାଯୋଗ୍ୟ, ଆସାମ ମୁଖ୍ୟମନ୍ତ୍ରୀଙ୍କ ମା’ ମ୍ରିଣାଳିନୀ ଦେବୀ ଜଣେ ଅହମିଆ ସାହିତି୍ୟକା ତଥା ଆସାମ ସାହିତ୍ୟ ସଭାର ପୂର୍ବତନ ଅଧ୍ୟକ୍ଷା ଓ ଜ୍ୟେଷ୍ଠଭ୍ରାତା ଦିଗନ୍ତ ବିଶ୍ୱଶର୍ମା ମଧ୍ୟ ଜଣେ ସୁସାହିତି୍ୟକ ଓ ଆସାମ ସାହିତ୍ୟ ପରିଷଦର କାର୍ଯ୍ୟକାରୀ ସଦସ୍ୟ ତଥା ଉପଦେଷ୍ଟା କମିଟିରଆବାହକ ଅଟନ୍ତି। ଉଭୟ ମା’ପୁଅ ସପରିବାର ଭୁବନେଶ୍ୱରରେ ଅନୁଷ୍ଠିତ ଅଖିଳ ଭାରତୀୟ ସାହିତ୍ୟ ପରିଷଦର ଏକ କାର୍ଯ୍ୟକ୍ରମରେ ଯୋଗଦେବାକୁ ଆସିଥିଲେ। ପରିବାର ସଦସ୍ୟ ସମ୍ବଲପୁର ଆରାଧ୍ୟ ଦେବୀ ମା’ ସମଲେଶ୍ୱରୀଙ୍କୁ ଦର୍ଶନ କରି ମଧ୍ୟାହ୍ନ ଭୋଜନ ପରେ ଭୁବନେଶ୍ୱର ଫେରି ଯାଇଛନ୍ତି।