ପତ୍ନୀଙ୍କ ଉପରେ ଲାଗିଥିବା ଅଭିଯୋଗ ପ୍ରମାଣ ହେଲେ, ସାର୍ବଜନିକ ଜୀବନରୁ ସନ୍ୟାସ ନେବି: ଆସାମ ମୁଖ୍ୟମନ୍ତ୍ରୀ

ଗୁଆହାଟୀ,୧୪।୯: କଂଗ୍ରେସ ପକ୍ଷରୁ ଲଗାଯାଇଥିବା ଅଭିଯୋଗକୁ ନେଇ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ସରମା ଏବଂ ଗୌରବ ଗୋଗୋଇଙ୍କ ମଧ୍ୟରେ ଏକ ଟୁଇଟର (ବର୍ତ୍ତମାନ ଏକ୍ସ) ଯୁଦ୍ଧ ଆରମ୍ଭ ହୋଇଛି। ଗୁରୁବାର ହିମନ୍ତ ବିଶ୍ୱ ସରମା କହିଛନ୍ତି ଯେ ଯଦି ତାଙ୍କ ପତ୍ନୀଙ୍କ ବିରୋଧରେ ଅଭିଯୋଗ ପ୍ରମାଣିତ ହୁଏ ତେବେ ସେ ସାଧାରଣ ଜୀବନରୁ ଅବସର ନେବେ।

ବୁଧବାର କଂଗ୍ରେସ ଅଭିଯୋଗ କରିଛି ଯେ ଆସାମର ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ସରମାଙ୍କ ପତ୍ନୀଙ୍କ ସହ ଜଡିତ ଏକ ମିଡିଆ ତଥା ମନୋରଞ୍ଜନ କମ୍ପାନୀ ଏକ ସ୍ବତନ୍ତ୍ର କେନ୍ଦ୍ରୀୟ ଯୋଜନା ଅଧୀନରେ ଖାଦ୍ୟ ପ୍ରକ୍ରିୟାକରଣ ମନ୍ତ୍ରଣାଳୟରୁ ଋଣ ସମ୍ବନ୍ଧୀୟ ସବସିଡି ପାଇଛି। ୧୦କୋଟି ଟଙ୍କା ପାଇଛି। ତେବେ ଭାଜପା ନେତା ଏହି ଅଭିଯୋଗକୁ ସମ୍ପୂର୍ଣ୍ଣ ରୂପେ ପ୍ରତ୍ୟାଖ୍ୟାନ କରିଛନ୍ତି।
ଲୋକ ସଭାରେ କଂଗ୍ରେସର ଡେପୁଟି ନେତା ତଥା ଆସାମର ଏମପି ଗୌରବ ଗୋଗୋଇ ଟୁଇଟରରେ ପୋଷ୍ଟ କରି ଅଭିଯୋଗ କରିଛନ୍ତି ଯେ ଭାରତର କୃଷକଙ୍କ ଆୟକୁ ଦ୍ୱିଗୁଣିତ କରିବା ପାଇଁ ପ୍ରଧାନମନ୍ତ୍ରୀ ମୋଦି କିଷାନ ସମ୍ପଦ ଯୋଜନା ଆରମ୍ଭ କରିଥିଲେ, କିନ୍ତୁ ଆସାମର ମୁଖ୍ୟମନ୍ତ୍ରୀ ତାଙ୍କ ପ୍ରଭାବକୁ ବ୍ୟବହାର କରିଥିଲେ, ତାଙ୍କ ପତ୍ନୀଙ୍କ କମ୍ପାନୀକୁ ଋଣ ସବସିଡିର ଅଂଶ ଭାବରେ ୧୦ କୋଟି ଟଙ୍କା ପାଇବାରେ ସାହାଯ୍ୟ କରିଛି। ସେ ପ୍ରଶ୍ନ କରିଛନ୍ତି, କେନ୍ଦ୍ର ସରକାରଙ୍କ ଯୋଜନାଗୁଡ଼ିକ ଭାଜପାକୁ ସମୃଦ୍ଧ କରିବା ପାଇଁ ଉଦ୍ଦିଷ୍ଟ ରହିଛି।