ନୂଆଦିଲ୍ଲୀ, ୨୯।୩ : ଦୀର୍ଘ ୫୦ ବର୍ଷ ଧରି ଆସାମ ଏବଂ ମେଘାଳୟ ମଧ୍ୟରେ ଜାରି ରହିଥିବା ସୀମା ବିବାଦ ଶେଷରେ ତୁଟିଛି। ଦୁଇରାଜ୍ୟର ମୁଖ୍ୟମନ୍ତ୍ରୀ ସ୍ବରାଷ୍ଟ୍ରନ୍ତ୍ରୀ ଅମିତ ଶାହାଙ୍କ ଉପସ୍ଥିତିରେ ଏକ ବୁଝାମଣା ପତ୍ରରେ ମଙ୍ଗଳବାର ସ୍ବାକ୍ଷର କରିଛନ୍ତି। ମେଘାଳୟ ଏବଂ ଆସାମର ମୁଖ୍ୟମନ୍ତ୍ରୀମାନେ ପ୍ରଥମ ପର୍ଯ୍ୟାୟରେ ତାରାବାରୀ, ଗିଜାଙ୍ଗ, ହାକିମ, ବୋକଲାପଡା, ଖାନପାରା-ପିଲାଙ୍ଗକାଟା ଏବଂ ରାଞ୍ଚେରା ଠାରେ ୬ଟି ସ୍ଥାନର ସୀମା ବିବାଦର ସମାଧାନ ପାଇଁ ଗୁଆହାଟୀରେ ଜାନୁୟାରୀ ୨୯ରେ ବୁଝାମଣାପତ୍ର ସ୍ବାକ୍ଷର କରିଥିଲେ। ପରେ ଏହାକୁ ଜାନୁଆରୀ ୩୧ରେ ସ୍ବରାଷ୍ଟ୍ର ମନ୍ତ୍ରଣାଳୟକୁ ପଠାଯାଇଥିଲା।
ମଙ୍ଗଳବାର ଆସାମର ମୁଖ୍ୟମନ୍ତ୍ରୀ ହିମନ୍ତ ବିଶ୍ୱା ସରମା ଏବଂ ତାଙ୍କ ମେଘାଳୟର ପ୍ରତିପକ୍ଷ କୋନରାଡ କେ ସାଙ୍ଗମା ଉଭୟ ରାଜ୍ୟର ମୁଖ୍ୟ ସଚିବ ତଥା ଅନ୍ୟ ଅଧିକାରୀ ଏବଂ ସ୍ବରାଷ୍ଟ୍ର ମନ୍ତ୍ରଣାଳୟର ଅଧିକାରୀଙ୍କ ଉପସ୍ଥିତିରେ ଏହି ଚୁକ୍ତିନାମା ସ୍ବାକ୍ଷର କରିଛନ୍ତି। ଆସାମ ଏବଂ ମେଘାଳୟର ସରକାର ୮୮୪ କିଲୋମିଟର ସୀମାରେ ଥିବା ୧୨ ଟି ମତଭେଦ ଅଞ୍ଚଳ ମଧ୍ୟରୁ ୬ଟିର ସୀମା ବିବାଦର ସମାଧାନ ପାଇଁ ଏକ ପ୍ରସ୍ତାବ ଆଣିଥିଲେ। ୩୬.୭୯ ବର୍ଗ କିଲୋମିଟର ଜମି ପାଇଁ ପ୍ରସ୍ତାବିତ ସୁପାରିଶ ଅନୁଯାୟୀ ଆସାମ ୧୮.୫୧ ବର୍ଗ କିମି ରଖିବ ଏବଂ ଅବଶିଷ୍ଟ ୧୮.୨୮ ବର୍ଗ କିମି ମେଘାଳୟକୁ ଦେବ।
ଆସାମ ଏବଂ ମେଘାଳୟ ମଧ୍ୟରେ ହୋଇଥିବା ଚୁକ୍ତି ଗୁରୁତ୍ୱପୂର୍ଣ୍ଣ କାରଣ ଦୁଇ ରାଜ୍ୟ ମଧ୍ୟରେ ସୀମା ବିବାଦ ବହୁତ ଦିନ ଧରି ବିଚାରାଧୀନ ରହିଥିଲା। ଉଲ୍ଲେଖଯୋଗ୍ୟ, ୧୯୭୨ ମସିହାରେ ମେଘାଳୟ ଆସାମରୁ ଅଲଗା ହୋଇ ଆସାମ ପୁନର୍ଗଠନ ଅଧିନିୟମ, ୧୯୭୧ କୁ ଚ୍ୟାଲେଞ୍ଜ କରି ୮୮୪.୯ କିଲୋମିଟର ସୀମାର ବିଭିନ୍ନ ଅଞ୍ଚଳରେ ୧୨ଟି ଅଞ୍ଚଳରେ ବିବାଦ ଦେଖାଦେଇଥିଲା। ପରେ ଏହାକୁ ନେଇ ରକ୍ତପାତ ମଧ୍ୟ ଘଟିଥିଲା।