ଗୁଆହାଟି,୨୨ ।୧୧: ଆସାମ-ମେଘାଳୟ ସୀମାରେ ମଙ୍ଗଳବାର ସକାଳେ ଫାୟରିଂ ପରେ ହିଂସା ପରିସ୍ଥିତି ଉପୁଜିଥିଲା । ଏଥିରେ ଏବେ ପର୍ଯ୍ୟନ୍ତ ୬ ଜଣଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ପୋଲିସ ଏକ ଚୋରାକାଠ ବ୍ୟବସାୟ କରୁଥିବା ଟ୍ରକକୁ ଅଟକାଇବା ପରେ ଏଭଳି ପରିସ୍ଥିତି ଉପୁଜିଥିଲା । ଏଥିରେ ଜଣେ ଫରେଷ୍ଟ ଗାର୍ଡଙ୍କ ସମେତ ୬ ଜଣଙ୍କ ମୃତ୍ୟୁ ହୋଇଛି । ଏହି ଘଟଣା ପରେ ମେଘାଳୟ ସରକାର ଆସନ୍ତା ୪୮ ଘଣ୍ଟା ପାଇଁ ୭ ଜିଲାରେ ମୋବାଇଲ ଇଣ୍ଟରନେଟ ସେବାକୁ ବନ୍ଦ କରି ଦେଇଛନ୍ତି ।
ସୂଚନାଯୋଗ୍ୟ, ଚୋରା କାଠ ଚାଲାଣ ହେଉଥିବା ଟ୍ରକକୁ ମେଘାଳୟ ସୀମାରେ ପଶ୍ଚିମ କାର୍ବି ଆଙ୍ଗଲୋଙ୍ଗ ଜିଲାରେ ମୋଇକ୍ରାଙ୍ଗରେ ଆସାମ ବନ ବିଭାଗର ଟିମ୍ ସକାଳ ପ୍ରାୟ ୩ଟାରେ ଅଟକାଇଥିଲେ । ଟ୍ରକ ଚାଳକ ଖସି ପଳାଇଯିବାକୁ ଚେଷ୍ଟା କରିବା ସମୟରେ ଫରେଷ୍ଟ ଗାର୍ଡ ତାଙ୍କୁ ପିଛା କରିଥିଲେ । ମେଘାଳୟ ମୁଖ୍ୟମନ୍ତ୍ରୀ କୋନରାଡ ସାଙ୍ଗମା କହିଛନ୍ତି ଏହି ଘଟଣାରେ ମେଘାଳୟର ୫ ଓ ଆସାମର ଜଣେ ବନ ରକ୍ଷକ ବା ଫରେଷ୍ଟ ଗାର୍ଡଙ୍କ ସମେତ ୬ ଜଣଙ୍କ ମୃତ୍ୟୁ ହୋଇଛି । ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ମେଘାଳୟ ପୋଲିସ ପକ୍ଷରୁ ଘଟଣାର ଯାଞ୍ଚ ଆରମ୍ଭ କରାଯାଇଛି ।
