ନୂଆଦିଲ୍ଲୀ/ଗୁଆହାଟୀ/ଲକ୍ଷ୍ନୌ,୧୨।୭:ଆସାମରେ ବ୍ରହ୍ମପୁତ୍ର ନଦୀ ଓ ଏହାର ଶାଖା ନଦୀଗୁଡ଼ିକରେ ବନ୍ୟା ଯୋଗୁ ଗତ ୨୪ ଘଣ୍ଟା ମଧ୍ୟରେ ଆଉ ୫ ଜଣ ବ୍ୟକ୍ତିଙ୍କ ମୃତ୍ୟୁ ଘଟିଛି। ଏହାସହ ରାଜ୍ୟରେ ବନ୍ୟାଜନିତ ମୃତ୍ୟୁସଂଖ୍ୟା ୮୪କୁ ବୃଦ୍ଧି ପାଇଥିବା ଆସାମର ବିପର୍ଯ୍ୟୟ ରିପୋର୍ଟିଂ ଓ ସୂଚନା ପରିଚାଳନା ବ୍ୟବସ୍ଥା ବିଭାଗ ପକ୍ଷରୁ ଗୁରୁବାର ସୂଚନା ଦିଆଯାଇଛି। ଏହି ବନ୍ୟାରେ ରାଜ୍ୟର ୨୭ ଜିଲାର ୧୪.୪ ଲକ୍ଷ ଲୋକ ପ୍ରଭାବିତ ହୋଇଛନ୍ତି। ଅସୁରକ୍ଷିତ ଅବସ୍ଥାରେ ଥିବା ୧ ଲକ୍ଷ ୫୭ ହଜାର ଲୋକଙ୍କୁ ୩୬୫ଟି ରିଲିଫ୍ କ୍ୟାମ୍ପକୁ ସ୍ଥାନାନ୍ତର କରାଯାଇଛି। ଏବେ ମଧ୍ୟ ତେଜପୁର, ଗୁଆହାଟୀ, ଧୁବ୍ରୀ, ନେମାଟିଘାଟ୍ ଆଦି ଅଞ୍ଚଳରେ ବ୍ରହ୍ମପୁତ୍ର ନଦୀର ଜଳସ୍ତର ବିପଦ ସଙ୍କେତ ଉପରେ ପ୍ରଭାବିତ ହେଉଛି। ବନ୍ୟା ଯୋଗୁ କାଜିରଙ୍ଗା ଜାତୀୟ ଉଦ୍ୟାନରେ ୧୨୮ ହଗ୍ ଡିୟର, ୯ଟି ଗଣ୍ଡା ସମେତ ୧୫୯ ବନ୍ୟାପ୍ରାଣୀ ଗୁରୁବାର ସୁଦ୍ଧା ପ୍ରାଣ ହରାଇଥିବା ରାଜ୍ୟ ଜଙ୍ଗଲ ଓ ପରିବେଶ ବିଭାଗ ସୂଚନା ଦେଇଛି।
ସେହିପରି ଉତ୍ତରପ୍ରଦେଶର ବିଭିନ୍ନ ନଦୀରେ ଜଳସ୍ତର ବୃଦ୍ଧି ଯୋଗୁ ୧୨ ଜିଲାର ୩୩ ତହସିଲ ଅନ୍ତର୍ଗତ ୬୩୩ ଗ୍ରାମର ୧୮ ଲକ୍ଷ ଲୋକ ବନ୍ୟା ଦ୍ୱାରା ପ୍ରଭାବିତ ହୋଇଛନ୍ତି। ୨୪ ଘଣ୍ଟା ମଧ୍ୟରେ ଲଗାଣ ବର୍ଷା ଓ ବଜ୍ରପାତ ଯୋଗୁ ୧୯ ଜଣଙ୍କର ମୃତ୍ୟୁ ଘଟିଥିବା ଉତ୍ତରପ୍ରଦେଶ ରିଲିଫ୍ ବିଭାଗ ପକ୍ଷରୁ କୁହାଯାଇଛି। ତେବେ ସୀତାପୁର ଜିଲାରେ ବନ୍ୟା ସ୍ରୋତରେ ବହି ଆସି ଶାରଦା ନଦୀରୁ ୨୦୦ ମିଟର ଦୂରରେ ଅବସ୍ଥିତ ଘରେ ଗୋଟିଏ କୁମ୍ଭୀର ବୁଧବାର ପଶିଆସିଥିଲା। ଫଳରେ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଥିଲା। ଖବରପାଇ ବନ ବିଭାଗର ଟିମ୍ ଉକ୍ତ କୁମ୍ଭୀରକୁ ଉଦ୍ଧାର କରି ପୁଣି ଥରେ ନଦୀରେ ଛାଡ଼ିଦେଇଥିଲା। ରାଜ୍ୟର ସର୍ବାଧିକ ପ୍ରଭାବିତ ଶ୍ରାବସ୍ତୀ ଓ ବଳରାମପୁର ଜିଲାରେ ଗୁରୁବାର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଆକାଶମାର୍ଗରୁ ସ୍ଥିତି ଅନୁଧ୍ୟାନ କରିଛନ୍ତି। ଏହି ବନ୍ୟାରେ ୧ ଲକ୍ଷ ୪୫ ହଜାରରୁ ଅଧିକ କୃଷିଜମିର ଫସଲ ନଷ୍ଟ ହୋଇଥିବା ସହ ବନ୍ୟା ପ୍ରଭାବିତ ଲୋକଙ୍କ ପାଇଁ ରାଜ୍ୟରେ ୧୦୩୩ଟି ଆଶ୍ରୟସ୍ଥଳ ନିର୍ମାଣ କରାଯାଇଥିବା ସେ କହିଛନ୍ତି।
ଅନ୍ୟପକ୍ଷରେ ବିହାରରେ ଲଗାଣ ବର୍ଷା ଯୋଗୁ କୋଶୀ, ଗଣ୍ଡକ, ବାଗମତୀ ଆଦି ନଦୀର ଜଳସ୍ତର ବୃଦ୍ଧି ଘଟିବାରେ ଲାଗିଛି। ଫଳରେ ରାଜ୍ୟର ଦରଭଙ୍ଗା, ମଧୁବନୀ, ଗୋପାଳଗଞ୍ଜ, ପଶ୍ଚିମ ଚମ୍ପାରନ୍, ସାରନ୍ ଆଦି ଜିଲାର ତଳିଆ ଅଞ୍ଚଳରେ ବନ୍ୟାପାଣି ପ୍ରବେଶ କରିଛି। ସେପଟେ ଦିଲ୍ଲୀର ବଓ୍ବାନା ଅଞ୍ଚଳରେ ଥିବା ମୁନକ କେନାଲର ଏକ ଅଂଶ ବୁଧବାର ବିଳମ୍ବିତ ରାତ୍ରିରେ ଭାଙ୍ଗଯିବାରୁ ଗୁରୁବାର ଦିଲ୍ଲୀର ଜେ.ଜେ କଲୋନୀ ଓ ଏହାର ଆଖପାଖ ଅଞ୍ଚଳରେ ବନ୍ୟାସ୍ଥିତି ଦେଖାଦେଇଛି। ବଓ୍ବାନା ଅଞ୍ଚଳର ଅନେକ ଘରେ ପାଣି ଜମାହେବା ସହ ବିଦ୍ୟୁତ୍ କାଟ୍ କରାଯିବାରୁ ଜନ ଅସନ୍ତୋଷ ବୃଦ୍ଧି ପାଇଛି। ତେବେ ମୁନକ କେନାଲର ମରାମତି କାର୍ଯ୍ୟ ଆରମ୍ଭ ହୋଇଛି ଏବଂ ଏହା ୨୪ ଘଣ୍ଟା ମଧ୍ୟରେ ଶେଷ ହେବ ବୋଲି ଦିଲ୍ଲୀ ଜଳ ସମ୍ପଦ ମନ୍ତ୍ରୀ ଆତିଶୀ ସୂଚନା ଦେଇଛନ୍ତି।