ନୂଆଦିଲ୍ଲୀ,୪୬: ଓଡ଼ିଶା ସହିତ ପଡ଼ୋଶୀ ରାଜ୍ୟ ଆନ୍ଧ୍ରପ୍ରଦେଶରେ ଆରମ୍ଭ ହୋଇଛି ବିଧାନସଭା ନିର୍ବାଚନ ଭୋଟ ଗଣତି| ୧୪୭ ଆସନ ବିଶିଷ୍ଟ ଓଡ଼ିଶା ବିଧାନସଭା ପାଇଁ ମେ ୧୩ ତାରିଖରୁ ଜୁନ୍ ୧ ତାରିଖ ମଧ୍ୟରେ ୪ଟି ପଯର୍ୟାୟରେ ନିର୍ବାଚନ ଅନୁଷ୍ଠିତ ହୋଇଥିଲା| ବିଧାନସଭା ସହିତ ଲୋକସଭା ପାଇଁ ମିଳିତ ଭାବେ ମତଦାନ କରିଥିଲେ ଭୋଟର| ୨୪ ବର୍ଷ ଧରି ଶାସନ କରିଆସୁଥିବା ବିଜୁ ଜନତା ଦଳ ପୁଣିଥରେ ଶାସନ କରିବା ନେଇ ଆଶା ପ୍ରକଟ କରିଛି| ବିଜୁ ଜନତା ଦଳ ସମସ୍ତ ୧୪୭ ଆସନରେ ପ୍ରାର୍ଥୀ ଦେଇଥିବା ବେଳେ ଭାଜପା ୧୪୭ ଏବଂ କଂଗ୍ରେସ ୧୪୫ ଆସନରେ ପ୍ରାର୍ଥୀ ଦେଇଥିଲା|
ସେହିପରି ଆନ୍ଧ୍ର ପ୍ରଦେଶ ବିଧାନସଭା ପାଇଁ ମେ ୧୩ ତାରିଖରେ ନିର୍ବାଚନ ଅନୁଷ୍ଠିତ ହୋଇଥିଲା| ଏହା ସହିତ ଲୋକସଭା ପାଇଁ ମିଳିତ ଭାବେ ନିର୍ବାଚନ ମଧ୍ୟ ହୋଇଥିଲା| ଆନ୍ଧ୍ରରେ ବର୍ତ୍ତମାନ ଶାସନରେ ଥିବା ଓ୍ୱାଇଏସ୍ଆର କଂଗ୍ରେସ ପୁଣିଥରେ ରାଜ୍ୟରେ ବାଜିମାତ୍ କରିବା ନେଇ ଆଶା କରିଛି| ଓ୍ୱାଇଏସ୍ଆର କଂଗ୍ରେସ ସମସ୍ତ ୧୭୫ ଆସନ ପାଇଁ ନିର୍ବାଚନ ଲଢ଼ିଥିବା ବେଳେ ପ୍ରତିପକ୍ଷ ଦଳ ଟିଡିପି ୧୪୪ଟି ଆସନରେ ନିର୍ବାଚନ ଲଢ଼ିଥିଲା | ସେହିପରି ଅଭିନେତା ପଓ୍ୱନ କଲ୍ୟାଣଙ୍କ ଜନ ସେନା ପାର୍ଟି ୨୧ଟି ଆସନରେ ଏବଂ ଭାଜପା ୧୦ଟି ଆସନରେ ନିର୍ବାଚନ ଲଢ଼ିଥିଲା| ବର୍ତ୍ତମାନର ମୁଖ୍ୟମନ୍ତ୍ରୀ ଓ୍ୱାଇଏସ୍ ଜଗନ ମୋହନ ରେଡ୍ଡିଙ୍କ ସମେତ ଟିଡିପି ମୁଖ୍ୟ ଏନ୍ ଚନ୍ଦ୍ରବାବୁ ନାଇଡ଼ୁ ଏବଂ ଜେଏସ୍ପି ମୁଖ୍ୟ ପଓ୍ୱନ କଲ୍ୟାଣ ନିର୍ବାଚନରେ ମଇଦାନକୁ ଓହ୍ଲାଇଥିଲେ|