ନୂଆଦିଲ୍ଲୀ,୧୦।୩ : ଉତ୍ତରପ୍ରଦେଶ, ମଣିପୁର, ଗୋଆ ମଣିପୁର ଏବଂ ଉତ୍ତରାଖଣ୍ଡ ଆଦି ପାଞ୍ଚଟି ରାଜ୍ୟର ବିଧାନସଭା ନିର୍ବାଚନର ଫଳାଫଳ କେବଳ ଲୋକ ସଭା ନିର୍ବାଚନ ପାଇଁ ରାଜନୈତିକ ଦଳର ଦିଗ ନିର୍ଣ୍ଣୟ କରିବ ନାହିଁ, ବରଂ ରାଷ୍ଟ୍ରପତି ନିର୍ବାଚନ ଦୃଷ୍ଟିରୁ ସମୀକରଣ ସୃଷ୍ଟି ଅବା ଭାଙ୍ଗିବାରେ ମଧ୍ୟ କାର୍ଯ୍ୟ କରିବ।
ଉଲ୍ଲେଖନୀୟ ବିଷୟ ହେଉଛି, ରାଷ୍ଟ୍ରପତି ରାମ ନାଥ କୋବିନ୍ଦଙ୍କ କାର୍ଯ୍ୟକାଳ ଜୁଲାଇ ୨୪ରେ ଶେଷ ହେଉଛି। ଏଭଳି ପରିସ୍ଥିତିରେ ଏହି ପାଞ୍ଚଟି ରାଜ୍ୟର ଫଳାଫଳ ସ୍ଥିର କରିବ ଯେ କେଉଁ ଦଳ ବା ମିଳିତ ମଞ୍ଚର ପ୍ରାର୍ଥୀ ଦେଶର ପରବର୍ତ୍ତୀ ରାଷ୍ଟ୍ରପତି ହେବେ। ବର୍ତ୍ତମାନ ଭାରତୀୟ ଜନତା ପାର୍ଟି ନିଜ ପ୍ରାର୍ଥୀଙ୍କୁ ଦେଶର ସର୍ବୋଚ୍ଚ ପଦବୀକୁ ସହଜରେ ଗ୍ରହଣ କରିପାରିବ। କିନ୍ତୁ ଉତ୍ତରପ୍ରଦେଶରେ ବିଧାନସଭା ଆସନରେ ପରିବର୍ତ୍ତନ ରାଷ୍ଟ୍ରପତି ପଦ ପାଇଁ ରାଜନୈତିକ ଗଣିତ ଉପରେ ପ୍ରଭାବ ପକାଇବ।
ରାଷ୍ଟ୍ରପତି ର୍ନିବାଚନରେ ଆଞ୍ଚଳିକ ଦଳର ଭୂମିକା ଗୁରୁତ୍ୱପୂର୍ଣ୍ଣ। ଏଭଳି ପରିସ୍ଥିତିରେ ଆଞ୍ଚଳିକ ଦଳର ଭୂମିକା ଗୁରୁତ୍ୱପୂର୍ଣ୍ଣ ହେବ। ଇତିମଧ୍ୟରେ ଏନେଇ ତେଲେଙ୍ଗାନାର କେସିଆରା ବହୁ ପୂର୍ବରୁ ଏହି ପ୍ରସଙ୍ଗରେ ସକ୍ରିୟ ହୋଇଯାଇଛନ୍ତି। ସେ ମୁମ୍ବାଇରେ ଉଦ୍ଧବ ଠାକରେ ଏବଂ ଶରଦ ପାୱାରଙ୍କୁ ମଧ୍ୟ ଭେଟିଛନ୍ତି। ରାଷ୍ଟ୍ରପତି ର୍ନିବାଚନ ପାଇଁ ଆବଶ୍ୟକ ଗଣିତରେ ବିଜୁ ଜନତା ଦଳ, ତେଲେଙ୍ଗାନା ରାଷ୍ଟ୍ର ସମିତି, ଓ୍ବାଇଏସ୍ଆର କଂଗ୍ରେସ ପାର୍ଟିଙ୍କର ଭୂମିକା ଅତି ଗୁରୁତ୍ୱପୂର୍ଣ୍ଣ। ତେବେ କେସିଆରଙ୍କ ବ୍ୟତୀତ ମମତା ବାନାର୍ଜୀ, ଅରବିନ୍ଦ କେଜ୍ରିୱାଲ ମଧ୍ୟ ଏକ୍ଷେତ୍ରରେ ଏକ ଭିନ୍ନ ଆଭିମୁଖ୍ୟ ଗ୍ରହଣ କରିଛନ୍ତି।ରାଷ୍ଟ୍ରପତି ନିର୍ବାଚନରେ ଉତ୍ତରପ୍ରଦେଶ ଏକ ପ୍ରମୁଖ ଭୂମିକା ଗ୍ରହଣ କରିଥାଏ।
ଜନସଂଖ୍ୟା ଦୃଷ୍ଟିରୁ ୟୁପିର ଜଣେ ବିଧାୟକଙ୍କ ଭୋଟ ମୂଲ୍ୟ ସର୍ବାଧିକ ୨୦୮ ରହିଛି। ରାଜ୍ୟରେ ମୋଟ ୪୦୩ ଜଣ ବିଧାୟକ ଅଛନ୍ତି। ଉତ୍ତରପ୍ରଦେଶ ବିଧାନସଭାର ମୋଟ ଭୋଟର ମୂଲ୍ୟ ହେଉଛି ୮୩ ହଜାର ୯୨୪। ଏହି ସଂଖ୍ୟା ଦେଶରେ ସର୍ବାଧିକ ହୋଇଥିବାବେଳେ ସିକ୍କିମରେ ଗୋଟିଏ ଭୋଟର ମୂଲ୍ୟ ସର୍ବନିମ୍ନ ୭ ରହିଛି। ଉତ୍ତରପ୍ରଦେଶ ପରେ ପଞ୍ଜାବର ବିଧାୟକଙ୍କ ଭୋଟ ମୂଲ୍ୟ ୧୧୬, ଉତ୍ତରାଖଣ୍ଡର ୬୪, ଗୋଆର ୨୦ ଏବଂ ମଣିପୁରର ୧୮ ରହିଛି। ଏହି ଉପାୟରେ ଭୋଟ ଗଣିବା ପରେ, ଭାଜପା ନେତୃତ୍ୱାଧୀନ ଏନଡିଏ ମେଣ୍ଟର ଶକ୍ତି ମାତ୍ର ୫୦ ପ୍ରତିଶତ ମାର୍କରୁ ସାମାନ୍ୟ କମ ରହିଛି। ଏଭଳି ପରିସ୍ଥିତିରେ ରାଷ୍ଟ୍ରପତି ପ୍ରାର୍ଥୀଙ୍କ ଦୃଢ଼ ଦାବି ପାଇଁ ସହଯୋଗୀ ଦଳର ସମର୍ଥନ ଉପରେ ନିର୍ଭର କରିବାକୁ ପଡିବ।
ସୂଚନାଯୋଗ୍ୟ ଯେ ରାଷ୍ଟ୍ରପତି ନିର୍ବାଚନ ପାଇଁ ଲୋକ ସଭା, ରାଜ୍ୟ ସଭା ଏବଂ ବିଧାନସଭା ନିର୍ବାଚନରେ ନିର୍ବାଚିତ ସଦସ୍ୟଙ୍କୁ ନେଇ ଇଲେକ୍ଟ୍ରୋଲ କଲେଜ ଗଠିତ ହୋଇଥାଏ। ବିଶେଷ କଥା ହେଉଛି ବିଧାନ ପରିଷଦ ଏବଂ ମନୋନୀତ ସଦସ୍ୟମାନେ ଅଂଶ ନୁହଁନ୍ତି। ପରିସଂଖ୍ୟାନ ଅନୁଯାୟୀ, ଇଲେକ୍ଟ୍ରୋଲ କଲେଜରେ ରାଜ୍ୟ ସଭାର ୨୩୩ ଜଣ ସଦସ୍ୟ, ଲୋକ ସଭାର ୫୪୩ ସଦସ୍ୟ ଏବଂ ଦେଶର ସମସ୍ତ ବିଧାନସଭାର ୪,୧୨୦ ସଦସ୍ୟଙ୍କୁ ନେଇ ଗଠିତ। ଏଠାରେ ରାଷ୍ଟ୍ରପତିଙ୍କୁ ଚୟନ କରିବା ସଂଖ୍ୟା ହେଉଛି ୪,୮୯୬।