ଜଗନ୍ନାଥପ୍ରସାଦ,୧୩ା୩(ଡି.ଏନ୍.ଏ.)-ଜଗନ୍ନାଥପ୍ରସାଦ ପୋଲିସ ରବିବାର ଏକ ଦେଶୀ ବନ୍ଧୁକ କାରଖାନା ଠାବ କରିଛି। କାରଖାନାରେ ବେଆଇନ ସାମଗ୍ରୀ ରଖିବା ଅଭିଯୋଗରେ ମୋହନ ମଳିକଙ୍କୁ ସୋମବାର କୋର୍ଟଚାଲାଣ କରାଯାଇଛି। ଗତ ୨୬ ତାରିଖ ରାତ୍ର ପାଟ୍ରୋଲିଂ ବେଳେ ସ୍ଥାନୀୟ ପୋଲିସ ଖଇରପଟି ଗ୍ରାମର ସୁଶାନ୍ତ ନାଇକଙ୍କୁ ଧରିଥିଲା। ତାଙ୍କ ନିକଟରୁ ଗୋଟିଏ ହାତତିଆରି ବନ୍ଧୁକ ଜବତ କରିଥିଲା। ପଚରାଉଚରା ପରେ ଏହାକୁ ସେ କିଣିଥିବା କହିଥିଲେ। ଏଥିସହ ବନ୍ଧୁକ ବିକୁଥିବା ଲୋକର ଠିକଣା ମଧ୍ୟ ପୋଲିସ ଆଗରେ ପ୍ରକାଶ କରିଥିଲେ। ପୋଲିସ ୧୨ ତାରିଖ ରାତିରେ ଓଡ଼ଗାଁ ଥାନା ଗୁଉମି ଗ୍ରାମପଞ୍ଚାୟତ ଅଧୀନ ଡିମିରିପଲ୍ଲୀ ଗ୍ରାମର ମୋହନ ମଳିକଙ୍କ ଘରେ ଚଢ଼ାଉ କରି ସେଠାରେ ଚାଲିଥିବା ହାତତିଆରି ବନ୍ଧୁକ କାରଖାନା ଠାବ କରିଥିଲା। ସେଠାରୁ ୩ଟି ବନ୍ଧୁକ ଜବତ କରିଥିଲା। ପଚରାଉଚରା ବେଳେ ମୋହନ ଏଠାରେ ୩୦ ବର୍ଷ ଧରି ବନ୍ଧୁକ ତିଆରି କରୁଥିବା କହିଥିଲେ। ଏହା ନୟାଗଡ଼, ଦଶପଲ୍ଲା, ଗଞ୍ଜାମ, କନ୍ଧମାଳ ଅଞ୍ଚଳରେ ବିକ୍ରି ହେଉଥିବା ବେଳେ ଲୋକମାନେ ଏହାକୁ ବନ୍ୟଜନ୍ତୁ ଶିକାର ପାଇଁ ବ୍ୟବହାର କରୁଥିବା କହିଥିଲେ। ସେଠାରୁ ପୋଲିସ ବନ୍ଧୁକ ନିର୍ମାଣରେ ବ୍ୟବହୃତ ସାମଗ୍ରୀ ଜବତ କରି ଥାନାକୁ ଆଣିଥିଲା। ଏ ନେଇ ପୋଲିସ ନଂ.୧୨୬/୨୩ରେ ମାମଲା ରୁଜୁ କରିଛି।
