ବନ୍ତ, ୭।୧୨ (ଡି.ଏନ.ଏ.)-ସକାଳ ହେଲେ ସାଇକେଲ ଖଣ୍ଡିଏ ଧରି ଘରୁ ବାହାରି ଯାଆନ୍ତି। ଦୁଇଘଣ୍ଟା ଧରି ବଜାର, ସ୍କୁଲ ଓ ରାସ୍ତାଘାଟ ଆଦି ସଫା କରିବା ପରେ ବିଶ୍ରାମ ନିଅନ୍ତି। ସେହିପରି ସନ୍ଧ୍ୟା ପୂର୍ବରୁ ମଧ୍ୟ ଏସବୁ ସ୍ଥାନକୁ ସଫା କରିଥାନ୍ତି। ସଫେଇ କରିବା ପରେ ଅଳିଆ ଆବର୍ଜନା ସବୁ ଗୋଟିଏ ସ୍ଥାନରେ ରଖି ନିଅଁା ଲଗାଇ ପୋଡ଼ି ଦିଅନ୍ତି। ରାତି ପାହିଲା ମାତ୍ରେ ତାଙ୍କୁ ପରିବେଶ ଚିନ୍ତା। ଏହାଦ୍ୱାରା ପରିବେଶ ସଫାସୁତୁରା ରହିଥାଏ ଓ ଏଥିରୁ ତାଙ୍କୁ ଆତ୍ମସନ୍ତୋଷ ମିଳେ ବୋଲି କହନ୍ତି ଭଦ୍ରକ ଜିଲା ବନ୍ତ ବ୍ଲକ ଅଧୀନ ନିଳୋକ ପଞ୍ଚାୟତ ଭଣ୍ଡାରଗଢ଼ିଆ ଗ୍ରାମର ଗୋପୀନାଥ ଲେଙ୍କା(୪୮)।
ସେ ୫ ଶ୍ରେଣୀ ପର୍ଯ୍ୟନ୍ତ ପାଠ ପଢ଼ିଛନ୍ତି। ଆର୍ଥତ୍କ ଅଭାବ ଯୋଗୁ ଅଧିକ ପାଠ ପଢ଼ି ପାରି ନ ଥିଲେ। ଗଁା ଗହଳିରେ ରୋଷେଇ କାର୍ଯ୍ୟ ଶିଖିଥିଲେ। ପରେ ଭଦ୍ରକର ଏକ କ୍ୟାଟେରିଂ ସଂସ୍ଥାରେ ଦୀର୍ଘ ୩୨ବର୍ଷ ଧରି ଚାକିରି କରି ଯାହା ପାଉଥିଲେ ସେଥିରୁ ପରିବାର ଚଳାଉଥିଲେ। ଘରେ ତାଙ୍କର ସ୍ତ୍ରୀ, ଗୋଟିଏ ପୁଅ ଓ ଝିଅ ଅଛନ୍ତି। ଗତ ୩ ବର୍ଷ ହେବ କୌଣସି କାରଣରୁ କ୍ୟାଟେରି ସଂସ୍ଥା ଛାଡ଼ିବା ପରେ ଏବେ ସଫେଇ କାର୍ଯ୍ୟରେ ଲାଗିଛନ୍ତି। ପ୍ରତିଦିନ ସକାଳୁ ଆସି ନିଳୋକ ବଜାରକୁ ପ୍ରଥମେ ସଫା କରିବା ପରେ ହାଇସ୍କୁଲ ପରିସର ଓ ରାସ୍ତାଘାଟ ସଫେଇ କରିଥାନ୍ତି। ଏଥିରୁ ତାଙ୍କୁ କିଛି ପାରିଶ୍ରମିକ ମିଳୁ ନ ଥିଲେ ମଧ୍ୟ ସେ ସଫେଇ କରି ଖୁସି ପାଉଥିବା କହିଛନ୍ତି। ତାଙ୍କର ଏହି କାମ ଯୋଗୁ ବଜାର ଅଞ୍ଚଳ ସବୁବେଳେ ପରିଷ୍କାର ପରିଚ୍ଛନ୍ନ ରହୁଛି। ଏଭଳି ମହତ୍ କାର୍ଯ୍ୟ ପାଇଁ ଲୋକେ ତାଙ୍କୁ ପ୍ରଶଂସା କରନ୍ତି। ତେବେ ତାଙ୍କର ଜମିବାଡ଼ି କହିଲେ ୫ ଗୁଣ୍ଠ ହେବ। ସରକାରୀ ସହାୟତା ଭାବେ କେବଳ ରାଶନ ସାମଗ୍ରୀ ପାଇଆସୁଛନ୍ତି। ଏହାରି ଭିତରେ ବଜାର ଦୋକାନୀଙ୍କର କାମଧନ୍ଦା କରି ସ୍ବଳ୍ପ ଅର୍ଥ ଉପାର୍ଜନ କରୁଛନ୍ତି। ସେଥିରେ ପରିବାର ଚଳାଇବା କଷ୍ଟକର ହୋଇପଡୁଛି। ତଥାପି ସେ ପରିବେଶକୁ ସ୍ବଚ୍ଛ ରଖିବା ଲକ୍ଷ୍ୟରେ ଏହି କାମ କରିଚାଲିଛନ୍ତି ବୋଲି କହିଛନ୍ତି।