ଦୁବାଇ, ୨୬।୯: ଆଇପିଏଲ୍ର ୭ମ ମୁକାବିଲାରେ ଶୁକ୍ରବାର ଚେନ୍ନାଇ ସୁପର୍ କିଙ୍ଗ୍ସର ମୁକାବିଲା ଦିଲ୍ଲୀ କ୍ୟାପିଟାଲ୍ସ ସହ ହୋଇଥିଲା। ଏହି ମ୍ୟାଚ୍ରେ ଚେନ୍ନାଇ ୪୪ ରନରେ ଦିଲ୍ଲୀ ନିକଟରୁ ପରାସ୍ତ ହୋଇଥିଲା। ଚେନ୍ନାଇ ଅଧିନାୟକ ମହେନ୍ଦ୍ର ସିଂ ଧୋନୀ ଏହି ମ୍ୟାଚ୍ରେ ବ୍ୟାଟିଂରେ କମାଲ କରିପାରି ନ ଥିଲେ ମଧ୍ୟ ଉଇକେଟ୍ ପଛରେ ନିଜର ପୁରୁଣା ଯାଦୁ ଦେଖାଇଥିଲେ। ଧୋନୀ ଏଭଳି ଏକ କ୍ୟାଚ୍ ଧରିଥିଲେ ଯାହାକୁ ‘ସୁପର୍ ମ୍ୟାନ୍ କ୍ୟାଚ୍’ ବୋଲି କୁହାଯାଉଛି। ଏହାକୁ ନେଇ ସୋସିଆଲ ମିଡିଆରେ ବେଶ୍ ଚର୍ଚ୍ଚା ଚାଲିଛି।
ବ୍ୟାଟିଂ କରିଥିବା ଦିଲ୍ଲୀ ଇନିଂସର ୧୯ତମ ଓଭରର ଅନ୍ତିମ ବଲ୍ରେ ଧୋନୀ ଏହି ଚମତ୍କାର କ୍ୟାଚ୍ ଧରିଥିଲେ। ସାମ୍ କୁରାନଙ୍କ ବଲ୍ ଦିଲ୍ଲୀ ଅଧିନାୟକ ଶ୍ରେୟାସ ଆୟାରଙ୍କ ବ୍ୟାଟ୍ରେ ଏଜ୍ ଲାଗି ଉଇକେଟ୍କିପର ଧୋନୀଙ୍କ ନିକଟରେ ଚାଲିଯାଇଥିଲା। ଧୋନୀ କିନ୍ତୁ ନିଜର ଡାହାଣ ପାର୍ଶ୍ୱକୁ ଲମ୍ବା ଡିଆଁ ମାରି ଏହାକୁ ଧରିବାରେ ସଫଳ ହୋଇଥିଲେ। ଧୋନୀଙ୍କ ଏଭଳି କ୍ୟାଚ୍କୁ ଦେଖି ଆୟାର ନିଜେ ମଧ୍ୟ ଚକିତ ହୋଇଯାଇଥିଲେ। ଧୋନୀଙ୍କ ଏହି ‘ସୁପର୍ ମ୍ୟାନ୍ କ୍ୟାଚ୍’ ଏବେ ସୋସିଆଲ ମିଡିଆରେ ବେଶ୍ ଭାଇରାଲ୍ ହେବାରେ ଲାଗିଛି।