କଥାରେ ଅଛି-ଏ ମନ ଖୋଜୁଥାଏ ଯାହା କାଳେ ପ୍ରାପତ ହୁଏ ତାହା। ଦେଖୁନାହାନ୍ତି, ନିଜର ଆଶା ପୂରଣ ହେବା ପରେ କିଆରା କେମିତି ଖୁସିରେ ଉଛୁଳୁଛନ୍ତି। କଥା କ’ଣ କି ସେ ନିକଟରେ ଏକ ନୂଆ ସିନେମା ସାଇନ୍ କରିଛନ୍ତି। ପୁଣି ତାହାର ପ୍ରଯୋଜକ କିଏ ଜାଣନ୍ତି ? କରନ୍ ଜୋହର। ଫିଲ୍ମଟି ସାଇନ୍ କରିବା ପରେ କିଆରା ଆଡଓ୍ବାନୀ କରନ୍ଙ୍କ ଅଫିସରୁ ବାହାରିବା ସମୟରେ ସାମ୍ବାଦିକ ହାବୁଡରେ ପଡିଯାଇଥିଲେ। କଥାଟିକୁ ଯେତେ ଲୁଚାଇବାକୁ ଚାହିଁଲେ କ’ଣ ହେବ ଶେଷରେ ନୂଆ ସିନେମା ବିଷୟରେ ସୂଚନା ଦେଇଥିଲେ ସେ। ହେଲେ ଏଥିରେ ତାଙ୍କ ସହ ସ୍କ୍ରିନ୍ ଶେୟାର କରିବେ ବରୁଣ ଧାଓ୍ବନ। ଏ ବିଷୟରେ କିଆରା କହନ୍ତି, ‘ବରୁଣଙ୍କ ସହ ମୁଁ ପ୍ରଥମ ଥର ପାଇଁ ଅଭିନୟ କରିବାକୁ ଯାଉଛି। କରନ୍ଙ୍କ ପରି ପ୍ରଯୋଜକ ଏବଂ ବରୁଣଙ୍କ ପରି ଆକ୍ଟରଙ୍କ ସହ କାମ କରିବାର ସୁଯୋଗ ମିଳିଛି ତାହା ମୋ ପାଇଁ ବଡ କଥା।’ ଏହି ଫିଲ୍ମର ନିର୍ଦ୍ଦେଶନା ଦେବେ ‘ଗୁଡ ନ୍ୟୁଜ୍’ର ନିର୍ଦ୍ଦେଶକ ରାଜ୍ ମେହେଟ୍ଟା। ଅନ୍ୟପକ୍ଷରେ ଏବେ ଫିଲ୍ମର ପ୍ରାରମ୍ଭିକ କାମ ଚାଲିଛି, ତେଣୁ କାହାଣୀ ଏବଂ ସମ୍ପୂର୍ଣ୍ଣ କାଷ୍ଟିଂ ସମ୍ପର୍କରେ ପରବର୍ତ୍ତୀ ସମୟରେ ସୂଚନା ଦିଆଯିବ ବୋଲି କହିଛନ୍ତି ନିର୍ଦ୍ଦେଶକ। ତେବେ ପ୍ରଥମ ଥର ପାଇଁ ବରୁଣଙ୍କ ନାୟିକା ସାଜିଥିବା କିଆରାଙ୍କୁ ଏହି ଫିଲ୍ମରୁ କେତେ ମାଇଲେଜ ମିଳୁଛି ତାହା ଦେଖିବାକୁ ବାକି ରହିଲା।
