ଭୁବନେଶ୍ୱର, ୨।୧୨(ବ୍ୟୁରୋ): ଏଣିକି ଗର୍ଭବତୀ ମହିଳାଙ୍କର ଏଚ୍ଆଇଭି ଓ ସିଫିଲ୍ସ ଦ୍ୱୈତ ପରୀକ୍ଷଣ ଏକାସଙ୍ଗେ ହୋଇପାରିବ। ରାଷ୍ଟ୍ରୀୟ ସ୍ବାସ୍ଥ୍ୟ ମିଶନ ସହଯୋଗରେ ବିକଶିତ ଏଚ୍ଆଇଭି ଓ ସିଫିଲ୍ସ ଦ୍ୱୈତ ପରୀକ୍ଷଣ କିଟ୍କୁ ମଙ୍ଗଳବାର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ନବକିଶୋର ଦାସ ଲୋକାର୍ପଣ କରିଛନ୍ତି। ଗର୍ଭବତୀ ମହିଳାଙ୍କର ଗୋଟିଏ ଥର ରକ୍ତ ନମୁନା ସଂଗ୍ରହରେ ଏଚ୍ଆଇଭି ଓ ସିଫିଲ୍ସ ପରୀକ୍ଷା କରାଯାଇପାରିବ। ଦେଶରେ ପ୍ରଥମ ଥର ପାଇଁ ଓଡ଼ିଶାରେ ଏଭଳି କିଟ୍କୁ ଲୋକାର୍ପଣ କରାଯାଇଛି।
ବିଶ୍ୱ ଏଡ୍ସ ଦିବସ ଅବସରରେ ଓସାକ୍ସ ପକ୍ଷରୁ ଆୟୋଜିତ ରାଜ୍ୟସ୍ତରୀୟ ସମାରୋହକୁ ମନ୍ତ୍ରୀ ଦାସ ଅନ୍ଲାଇନରେ ଉଦ୍ଘାଟନ କରି କହିଥିଲେ ଯେ, ୨୦୧୦ ସୁଦ୍ଧା ୬ଲକ୍ଷ ଲୋକଙ୍କ ପରୀକ୍ଷା ହୋଇଥିଲାବେଳେ ୨୦୧୯ରେ ଏହା ୧୪ଲକ୍ଷରେ ପହଞ୍ଚତ୍ଛି। ଅଧିକ ସଂକ୍ରମଣପ୍ରବଣ ଗୋଷ୍ଠୀଙ୍କ ମଧ୍ୟରେ ସଚେତନତା ଓ ପ୍ରତିଷେଧକ ବ୍ୟବସ୍ଥା ତଥା ବ୍ୟାବହାରିକ ପରିବର୍ତ୍ତନ ଫଳରେ ଏଚ୍ଆଇଭିର ବ୍ୟାପକତା ୨୦୧୦ ଠାରୁ ହ୍ରାସ ପାଇ ୦.୩୧%ରୁ ୨୦୧୯ରେ ଏହା ୦.୧୪ ପ୍ରତିଶତରେ ପହଞ୍ଚତ୍ଛି। ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ଏହି କାର୍ଯ୍ୟକ୍ରମରେ ସଭାପତିତ୍ୱ କରି କହିଥିଲେ, ସମ୍ପ୍ରତି ଓଡ଼ିଶାରେ ଏଚ୍ଆଇଭିର ପ୍ରଭାବ ୦.୧୪% ରହିଛି, ଯାହା ଜାତୀୟ ହାର ୦.୨୨% ଠାରୁ କମ୍। ରାଜ୍ୟର ୫୩୧ଟି ନୂତନ ଜନ ସ୍ବାସ୍ଥ୍ୟକେନ୍ଦ୍ର ଏବଂ ୬୩୦ଟି ହେଲ୍ଥ ୱେଲନେସ୍ କେନ୍ଦ୍ରରେ ବିନା ମୂଲ୍ୟରେ ଏଚ୍ଆଇଭି ପରୀକ୍ଷା ସୁବିଧା ଯୋଗାଇ ଦିଆଯାଉଛି। ଗୋଟିଏ ପରୀକ୍ଷଣ କିଟ୍ ଜରିଆରେ ଗର୍ଭବତୀ ମହିଳାଙ୍କ ଏଚ୍ଆଇଭି ଓ ଯୌନ ସଂକ୍ରମଣ ସ୍ଥିତି ନିରୂପଣ କରାଯିବ। ସେ ରେଡ୍ରିବନ କ୍ଲବ କୋଅର୍ଡିନେଟରମାନଙ୍କୁ ସଚେତନତା ସୃଷ୍ଟି ପାଇଁ ଆହ୍ବାନ ଦେଇଥିଲେ। ଓସାକ୍ସର ପ୍ରକଳ୍ପ ନିର୍ଦ୍ଦେଶିକା ଡ. ସଂଯୁକ୍ତା ସାହୁ ୨୦୩୦ ସୁଦ୍ଧା ଏଡ୍ସ ସଂକ୍ରମଣର ମୂଳୋତ୍ପାଟନ ସହ ବିକାଶ ଲକ୍ଷ୍ୟ ହାସଲ ଦିଗରେ ଆଲୋକପାତ କରିଥିଲେ। ସମ୍ମାନିତ ଅତିଥି ଭାବେ ସ୍ବାସ୍ଥ୍ୟ ମିଶନ ନିର୍ଦ୍ଦେଶିକା ଶାଳିନୀ ପଣ୍ଡିତ, ସ୍ବାସ୍ଥ୍ୟ ବିଭାଗ ସ୍ବତନ୍ତ୍ର ସଚିବ ଡ. ଅଜିତ ମହାନ୍ତି ଯୋଗଦେଇଥିଲେ। ଓସାକ୍ସଠାରେ ଦୁଇଟି ଆଇସି ପ୍ରଚାର ଭ୍ୟାନର ଶୁଭାରମ୍ଭ ହୋଇଥିଲା। ରାଜ୍ୟର ବିଭିନ୍ନ ଜିଲାରୁ ମଙ୍ଗଳବାରଠାରୁ ସଚେତନତାଧର୍ମୀ ଆଇସି ପ୍ରଚାର ଭ୍ୟାନର ଆରମ୍ଭ କରାଯାଇଛି। ଏହା ୭ଦିନ ଧରି ସଚେତନ କରିବ। ଏହି ଅବସରରେ ଓସାକ୍ସର ଅର୍ଦ୍ଧବାର୍ଷିକ ନ୍ୟୁଜ ଲେଟର ଉନ୍ମୋଚନ ହୋଇଥିଲା।