ଉମରକୋଟ, ୨୧।୩(ସ୍ବ.ପ୍ର.):ଅଦିନିଆ ବର୍ଷାର ପ୍ରଭାବରେ ମକାଚାଷୀଙ୍କ ବ୍ୟାପକ କ୍ଷୟକ୍ଷତି ହୋଇଛି। ପଶ୍ଚିମାଝଡ଼ ପ୍ରଭାବରେ ଚାଷୀଙ୍କ ଆର୍ଥିକ ସ୍ଥିତି ଦୋହଲିଯାଇଛି। ନବରଙ୍ଗପୁର ଜିଲା ଉମରକୋଟ ବ୍ଲକରେ ୨ଦିନରେ ୬୪.୨୦ମି.ମି. ବର୍ଷା ସହ କୁଆପଥର ମାଡ଼ ହୋଇଥିଲା। ଅତି ଜୋରରେ ପବନ ବହିବା ଯୋଗୁ ବହୁ ପରିମାଣର ମକାଚାଷ ନଷ୍ଟ ହୋଇଛି। ପଶ୍ଚିମାଝଡ଼ ପ୍ରଭାବରେ ନବରଙ୍ଗପୁର ଜିଲା ଉମରକୋଟ ବ୍ଲକରେ ଅନେକ କ୍ଷତି ହୋଇଛି। ଉମରକୋଟ ବ୍ଲକର ମୂର୍ତ୍ତୁମା, ଚିକଲପଦର, ବେହେଡ଼ା, ଖଡ଼କା, ସିଲାଟି ବେନରା ଭଳି ଅଞ୍ଚଳରେ ବହୁ ପରିମାଣରେ ମକା ଫସଲ ନଷ୍ଟ ହୋଇଛି। ଅନେକ ଏକର ମକାଚାଷ ମାଟିରେ ମିଶିଯାଇଛି। ବର୍ତ୍ତମାନ ଅମଳ ସମୟ। ମକା ଗଛରେ ଫଳ ଫଳିବା ଆରମ୍ଭ ହୋଇଥିଲା। ଆଉ ମାସକ ମଧ୍ୟରେ ଅମଳ ହୋଇଥାନ୍ତା, କିନ୍ତୁ ପଶ୍ଚିମାଝଡ଼ ସବୁ ଉଜାଡ଼ି ଦେଇଛି ବୋଲି କହି ଚାଷୀ ମୁଣ୍ଡରେ ହାତ ଦେଇ ବସିଛନ୍ତି। ରବିଋତୁରେ ଜଳସେଚନ ଥିବା ଜମିରେ ମକାଚାଷ ପାଇଁ ଏକର ପିଛା ପ୍ରାୟ ୨୨ ହଜାରରୁ ୨୫ ହଜାର ଟଙ୍କା ଖର୍ଚ୍ଚ ହୋଇଥାଏ। ଚାଷୀ କରଜ କରି ମକାଚାଷ କରିଥିଲେ। ବର୍ତ୍ତମାନ ଋଣ ଶୁଝିବା ଓ ପରିବାର ପ୍ରତିପୋଷଣ କରିବା ଚିନ୍ତାରେ ଚାଷୀ। କୃଷି ବିଭାଗ କିମ୍ବା ରାଜସ୍ବ ବିଭାଗର କୌଣସି ଅଧିକାରୀ କ୍ଷୟକ୍ଷତି ଅଞ୍ଚଳକୁ ବର୍ତ୍ତମାନ ସୁଦ୍ଧା ପହଞ୍ଚତ୍ ନ ଥିବା ଅଭିଯୋଗ କରିଛନ୍ତି ଚାଷୀ। ଗତ ବର୍ଷ ମଧ୍ୟ କ୍ଷୟକ୍ଷତିର କୌଣସି ଆର୍ଥିକ ସହାୟତା ଚାଷୀ ପାଇନାହାନ୍ତି। ଚଳିତ ଥର ଯଦି ସେଭଳି ହୁଏ ଆମେ ଆତ୍ମହତ୍ୟା କରିବାକୁ ବାଧ୍ୟ ହେବୁ ବୋଲି ଚାଷୀ ଦୁଃଖରେ କହିଛନ୍ତି। ଘଟଣା ସମ୍ପର୍କରେ କୃଷି ଜିଲା ଅଧିକାରୀ ବିଜୟ କୁମାର ପଟ୍ଟନାୟକଙ୍କୁ ପଚାରିବାରୁ ଜିଲାର ଚାରିଟି ବ୍ଲକରେ କ୍ଷୟକ୍ଷତି ଘଟିଛି। ବିଭାଗର କର୍ମଚାରୀମାନେ କ୍ଷେତ୍ର ପରିଦର୍ଶନକରି କ୍ଷୟକ୍ଷତି ଆକଳନ କାର୍ଯ୍ୟରେ ଲାଗିଛନ୍ତି। ରିପୋର୍ଟ ଆସିଲେ ସରକାରଙ୍କୁ ଜଣାଇ ଦିଆଯିବ। ବିପର୍ଯ୍ୟୟ କ୍ଷୟକ୍ଷତି ନିୟମ ଅନୁଯାୟୀ ଚାଷୀଙ୍କୁ ଆର୍ଥିକ ସହାୟତା ମିଳିବ ବୋଲି ସେ କହିଛନ୍ତି।
