ନୂଆଦିଲ୍ଲୀ,୧୬ା୪:ଅଯୋଧ୍ୟାରୁ ଦିଲ୍ଲୀ ଯାଉଥିବା ଇଣ୍ଡିଗୋ ଏୟାରଲାଇନ୍ସର ଏକ ବିମାନକୁ ଶନିବାର ଖରାପ ପାଗ କାରଣରୁ ଚଣ୍ଡିଗଡ଼ରେ ଅବତରଣ କରିବାକୁ ପଡ଼ିଥିଲା। ଅବତରଣ ବେଳକୁ ବିମାନରେ ମାତ୍ର ୧ରୁ ୨ ମିନିଟ୍ର ଇନ୍ଧନ ଥିଲା ବୋଲି ଦିଲ୍ଲୀର ଜଣେ ପୋଲିସ ଅଧିକାରୀ କହିଛନ୍ତି। ତେବେ ଏୟାରଲାଇନ୍ସ ଉକ୍ତ ଖବରକୁ ଖଣ୍ଡନ କରି ବିମାନରେ ଯଥେଷ୍ଟ ତେଲ ଥିଲା ବୋଲି କହିଛି। ଦିଲ୍ଲୀ ପୋଲିସ ଡିସିପି ସତୀଶ କୁମାର ଏକ୍ସ’ରେ କରିଥିବା ଏକ ପୋଷ୍ଟରେ ଅଯୋଧ୍ୟାରୁ ଦିଲ୍ଲୀ ଯାତ୍ରାର ଦୁଃଖଦ ଅଭିଜ୍ଞତା ବର୍ଣ୍ଣନା କରିଛନ୍ତି। ୬ଇ ୨୭୦୨ ବିମାନଟି ଅପରାହ୍ନ ୩.୨୫ରେ ଅଯୋଧ୍ୟା ଛାଡ଼ି ୪ଟା ୩୦ରେ ଦିଲ୍ଲୀରେ ପହଞ୍ଚତ୍ବାର ଥିଲା। ତେବେ ଦିଲ୍ଲୀ ବିମାନବନ୍ଦରଠାରେ ପାଗ ଖରାପ ଏବଂ ବିମାନରେ ୪୫ ମିନିଟ୍ ପାଇଁ ଇନ୍ଧନ ଥିବା ପାଇଲଟ୍ ୪ଟା ୧୫ ସମୟରେ ଘୋଷଣା କରିଥିଲେ। ଇତିମଧ୍ୟରେ ସେ ଦୁଇଥର ଅବତରଣ ଉଦ୍ୟମ କରି ବିଫଳ ହୋଇଥିଲେ। ଘୋଷଣାର ୭୫ ମିନିଟ ପରେ ଅପରାହ୍ନ ୫ଟା ୩୦ରେ ବିମାନକୁ ଚଣ୍ଡିଗଡ଼ରେ ଅବତରଣ ଉଦ୍ୟମ କରାଯାଉଥିବା କୁହାଯାଇଥିଲା। ଶେଷରେ ୬ଟା ୧୦ ମିନିଟରେ ଏହା ଚଣ୍ଡିଗଡ଼ରେ ଅବତରଣ କରିଥିଲା। ସେତେବେଳକୁ ବିମାନରେ ମାତ୍ର ୧ ବା ୨ ମିନିଟ୍ର ଇନ୍ଧନ ଥିଲା ବୋଲି ଜଣେ କ୍ରିଉ ସଦସ୍ୟଙ୍କଠାରୁ ଜାଣିବାକୁ ପାଇଥିବା କୁମାର କହିଛନ୍ତି। ଉକ୍ତ ପୋଷ୍ଟରେ ଡିଜିସିଏ, ବିମାନ ଚଳାଚଳ ମନ୍ତ୍ରଣାଳୟ, ଦିଲ୍ଲୀ ଏୟାରପୋର୍ଟ ଏବଂ ଇଣ୍ଡିଗୋକୁ ଟ୍ୟାଗ୍ କରାଯାଇଛି। ସବୁ ଏସ୍ଓପି (ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର) ଅନୁପାଳନ ହୋଇଥିଲା ନା ଏହା ଅଳ୍ପକେ ବର୍ତ୍ତିଗଲା, ତଦନ୍ତ କରାଯାଉ ବୋଲି ଡିସିପି କହିଛନ୍ତି।