ମୁମ୍ବାଇ,୨୪।୬: କରୋନା ମହାମାରୀକୁ ନେଇ ଦେଶରେ ଗତ ମାର୍ଚ୍ଚ ମାସଠାରୁ ଆରମ୍ଭ ହୋଇଥିଲା ଲକ୍ଡାଉନ। ଏହି ସମୟରେ କରୋନା ସଂକ୍ରମିତ ହାର କମ୍ ଥିଲେ ମଧ୍ୟ ଏବେ ଏହା ଦ୍ରୁତ ଗତିରେ ବଢିବାରେ ଲାଗିଛି। ତେବେ କରୋନା ଯୁଦ୍ଧରେ ଲଢିବାକୁ କିଏ କେତେ ପ୍ରକାର ସହଯୋଗ କରିଥିବା ବେଳେ ମୁମ୍ବାଇର ଏକ ନବ ଦମ୍ପତି ତାଙ୍କ ବିବାହରେ କୋଡିଭ ସେଣ୍ଟରକୁ ୫୦ ବେଡ୍ ଦାନ କରିଥିବା ଜଣାପଡିଛି। ମୁମ୍ବାଇର ବସଇ ଅଞ୍ଚଳରେ ରହୁଥିବା ଏରିକ ଓ ମର୍ଲିନଙ୍କ ବିବାହ ଖ୍ରୀଷ୍ଟିଆନ୍ ରୀତିନୀତି ଅନୁଯାୟୀ ଚର୍ଚ୍ଚରେ ହୋଇଥିଲା। ଏହାପରେ ଏମାନେ କୋଭିଡ ସେଣ୍ଟର ଯାଇ କରୋନା ସଂକ୍ରମିତଙ୍କ ପାଇଁ ୫୦ ବେଡ୍ ଦାନ କରିଥିଲେ। ଏହାତାଙ୍କ ବିବାହର ସବୁଠାରୁ ବଡ ଉପହାର ବୋଲି ସେମାନେ କହିଛନ୍ତି। ସୂଚନାଯୋଗ୍ୟ, ଗତ ୨ ମାସ ହେବ କରୋନା ସଂକ୍ରମଣରେ ସମଗ୍ର ମହାରାଷ୍ଟ୍ର ବ୍ୟସ୍ତବିବ୍ରତ ହୋଇ ପଡିଥିବା ବେଳେ ମୁମ୍ବାଇରେ ସବୁଠାରୁ ଅଧିକ ସଂକ୍ରମିତଙ୍କୁ ଚିହ୍ନଟ କରାଯାଇଥିଲା। ଏବେ କିନ୍ତୁ ସେଠାରେ କରୋନା ସଂକ୍ରମଣ ସାମାନ୍ୟ କମ୍ ହୋଇଛି ବୋଲି କୁହାଯାଉଛି। ତେବେ କରୋନା ମହାମାରୀକୁ ନେଇ ସାରା ଦେଶରେ ଲକ୍ଡାଉନ ଚାଲିଥିବା ବେଳେ ମୁମ୍ବାଇରୁ ବହୁ ସଂଖ୍ୟାରେ ପ୍ରବାସୀ ନିଜ ନିଜ ରାଜ୍ୟକୁ ଫେରିବାକୁ ବ୍ୟାକୁଳ ହୋଇ ପଡିଥିଲେ। ଏହି ସମୟରେ ସେଲିବ୍ରିଟି, ବ୍ୟବସାୟୀ ଏମିତିକି କେତେଜଣ ସାଧାରଣ ଜନତା ମଧ୍ୟ ସହଯୋଗର ହାତ ବଢାଇଥିବା ଦେଖାଯାଇଥିଲା।