କୋଲକାତା,୧୦।୭(ପି.ଟି.): ଏଟିକେ ମୋହନ ବାଗାନ ପୂର୍ବପରି ତା’ର ପ୍ରସିଦ୍ଧ ସବୁଜ ଓ ମେରୁନ୍ ଜର୍ସିକୁ ବଜାୟ ରଖିବାକୁ ନିଷ୍ପତ୍ତି ନେଇଛି। ଏହି ଜର୍ସି ମୋହନ ବାଗାନ ସହ ୧୩୧ ବର୍ଷଧରି ଜଡିତ ରହିଆସିଥିଲା। ବିଲୟ ହେବା ପରେ କ୍ଲବର ନାମ ପରିବର୍ତ୍ତନ କରାଯାଇଛି। ସେହିପରି ଲୋଗୋରେ ମୋହନ ବାଗାନ ବୋଟ ସହ ଏଟିକେ ଉଲ୍ଲେଖ ରହିବ। ଦୀର୍ଘବର୍ଷ ଧରି ଯେଉଁ ପ୍ରତିଷ୍ଠା ମଳିଛି ତାହାକୁ ବଜାୟ ରଖିବାକୁ ଏଟିକେ ମୋହନବାଗାନର ବୋର୍ଡ ନିଷ୍ପତ୍ତି ନେଇଛି। ଏହାଦ୍ୱାରା ଫୁଟବଲ ଆହୁରି ଉନ୍ନତି ହେବା ସହିତ ପ୍ରଚାର ଓ ପ୍ରସାର ହେବ ବୋଲି କ୍ଲବ ତରଫରୁ କୁହାଯାଇଛି।
ବେଙ୍ଗଲ୍ରେ ବିଶ୍ୱସ୍ତରୀୟ ଫୁଟବଲ ଏକାଡେମୀ ସ୍ଥାପନ କରିବାକୁ କ୍ଲବ ଘୋଷଣା କରିଛି। ଏହା ଦ୍ୱାରା ଏସିଆନ ଫୁଟବଲ କନ୍ଫେଡେରେଶନ (ଏଏଫ୍ସି) ଘରୋଇ ମ୍ୟାଚ୍ ଆୟୋଜନ ହୋଇପାରିବ ବୋଲି କୁହାଯାଇଛି। ଖୁବ୍ଶୀଘ୍ର ଏଟିକେ ମୋହନବାଗାନର ଭିତ୍ତିଭୂମିକୁ ଉଚ୍ଚକୋଟୀର କରାଯିବ। ଅନ୍ତର୍ଜାତୀୟସ୍ତରରେ ପ୍ରତିଯୋଗିତା କରିବାକୁ ଏହା ଦ୍ୱାରା ଆବଶ୍ୟକ ଟ୍ରେନିଂ ନେଇ ହେବ ମୋହନ ବାଗାନର ୮୦ ପ୍ରତିଶତ ଅଂଶଧନର ମାଲିକ ସଞ୍ଜୀବ ଗୋଏଙ୍କା କହିଛନ୍ତି। ଏହି କ୍ଲବ୍କୁ ବିଶ୍ୱସ୍ତରର ପ୍ରତିଷ୍ଠା କରିବାକୁ ଆମର ଲକ୍ଷ୍ୟ ରହିଛି ବୋଲି ସେ କହିଛନ୍ତି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସଭାପତି ସୌରଭ ଗାଙ୍ଗୁଲି ମଧ୍ୟ ଏଟିକେର ଅନ୍ୟତମ ମାଲିକ ରହିଛନ୍ତି ଓ ସେ ମଧ୍ୟ ବୋର୍ଡର ଭର୍ଚୁଆଲ ବୈଠକରେ ଯୋଗ ଦେଇଥିଲେ।
ଉଲ୍ଲେଖଥାଉ କି, ପୂର୍ବରୁ ଗତ ଜାନୁୟାରୀରେ ଏଟିକେ ଓ ମୋହନ ବାଗାନର ବିଲୟ ହୋଇଥିଲା। ଏଟିକେ ୩ଥର ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍) ଟାଇଟଲ ହାସଲ କରିଛି। ଅନ୍ୟପଟେ ମୋହନ ବାଗାନ ୪ ରାଉଣ୍ଡ ବାକିଥିଲେ ମଧ୍ୟ କରୋନା ଭାଇରସ କାରଣରୁ ଚାମ୍ପିୟନ ଘୋଷିତ ହୋଇଥିଲା। ଡେମ୍ପୋ ଭଳି ମୋହନବାଗାନ ୧୯୯୬-୯୭ରୁ ଆରମ୍ଭ ହୋଇଥିବା ଏହି ନ୍ୟାଶନାଲ ଲିଗ୍ରେ ୫ଥର ଚାମ୍ପିୟନ ହୋଇଛି।