ଢେଙ୍କାନାଳ ଅଫିସ,୨୭ା୧୦: ଢେଙ୍କାନାଳ ଜିଲା ଗଁଦିଆ ଥାନା ବରପଦା ଶ୍ରୀରାମଚନ୍ଦ୍ର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ସମ୍ମୁଖରେ ଥିବା ଷ୍ଟେଟ୍ବ୍ୟାଙ୍କ ଅଫ୍ ଇଣ୍ଡିଆର ଏକ ଏଟିଏମ୍କୁ ଗତ ୩ ତାରିଖ ରାତିରେ ତାଡ଼ି ୭ ଜଣ ଦୁର୍ବୃତ୍ତ ୨୨ ଲକ୍ଷ ୧୭ ହଜାର ୯୦୦ ଟଙ୍କା ଲୁଟି ନେଇ କାର୍ରେ ପଳାଇଥିଲେ। ଖବର ପାଇ ଗଁଦିଆ ପୋଲିସ ସେମାନଙ୍କୁ ଗୋଡ଼ାଇବାରୁ ଦୁର୍ବୃତ୍ତମାନେ କାର୍ଟିକୁ ନିକଟସ୍ଥ ଏକ କାଜୁ ଜଙ୍ଗଲରେ ଛାଡ଼ି ଚାଲିଯାଇଥିଲେ। ଏସ୍ପି ଲୋଗାନୟାଗି ଦିବ୍ୟା ଭିଙ୍କ ନିର୍ଦ୍ଦେଶରେ ସଦର ଏସ୍ଡିପିଓ ସୂର୍ଯ୍ୟମଣି ପ୍ରଧାନ ଓ ଗଁଦିଆ ଥାନାଧିକାରୀ ସତ୍ୟବ୍ରତ ଭୁଡ଼ିଆ ରାଜ୍ୟର ଭଦ୍ରକ, ଖୋର୍ଦ୍ଧା ଓ ଢେଙ୍କାନାଳ ଜିଲାର ବିଭିନ୍ନ ଅଞ୍ଚଳରୁ ୩ ଜଣଙ୍କୁ ଗିରଫ କରିଛନ୍ତି। ଘଟଣାରେ ବ୍ୟବହୃତ ତଥା କାଜୁ ଜଙ୍ଗଲରୁ କଳା ରଙ୍ଗର କାର୍ ଓ ଏକ ବାଇକ୍କୁ ମଧ୍ୟ ଜବତ କରିଛନ୍ତି। ଦୁର୍ବୃତ୍ତମାନଙ୍କଠାରୁ ୨ ଲକ୍ଷ ୫୬ ହଜାର ଟଙ୍କା ଜବତ ହୋଇଛି। ଅନ୍ୟ ୪ ଜଣ ଫେରାର ଅଛନ୍ତି। ଗିରଫଙ୍କ ମଧ୍ୟରେ ଏଟିଏମ୍ ତାଡ଼ି ଟଙ୍କା ଲୁଟ୍ରେ ଜଣେ ପ୍ରମୁଖ ଅଭିଯୁକ୍ତ ଗିରଫ ହୋଇଥିବା ବେଳେ ଆଉ ୨ ଜଣ ସହଯୋଗୀ ଗିରଫ ହୋଇଛନ୍ତି। ଗିରଫ ଅଭିଯୁକ୍ତ ମାନେ ହେଲେ ଢେଙ୍କାନାଳ ଜିଲା ସଦର ଥାନା କଙ୍କଡ଼ାହାଡ଼ ଗ୍ରାମର ଜିତେନ୍ଦ୍ର ନାୟକ, ଭଦ୍ରକ ଜିଲା ବାସୁଦେବପୁର ଥାନା ଆଲବାଗ ଗ୍ରାମର ନିରଞ୍ଜନ ପାଣି ଏବଂ ଖୋର୍ଦ୍ଧା ଜିଲା ଜଟଣି ଥାନା ବଡ଼ତୋଟା ଗ୍ରାମର ରାକେଶ ଦାସ। ସେମାନଙ୍କଠାରୁ ଲୁହା ଛଡ଼, ବ୍ୟାଗ୍, ସିସିଟିଭି କ୍ୟାମେରାର ଡିଭିଆର ଓ ୨ଟି ପେନ୍ଡ୍ରାଇଭ ଜବତ କରାଯାଇଛି। ଅନ୍ୟମାନଙ୍କୁ ଧରିବା ପାଇଁ ଉଦ୍ୟମ ଚାଲିଛି ବୋଲି ଗୁରୁବାର ପୂର୍ବାହ୍ନରେ ଜିଲା ପୋଲିସ କାର୍ଯ୍ୟାଳୟ ସମ୍ମିଳନୀ କକ୍ଷରେ ଆୟୋଜିତ ଖବରଦାତା ସମ୍ମିଳନୀରେ ଏସ୍ପି ସୂଚନା ଦେଇଛନ୍ତି।