ଡେରାବିଶ,୧୯ା୬ (ବେବର୍ତ୍ତା ଅଜୟ ଦାସ): କେନ୍ଦ୍ରାପଡ଼ା ସଦର ଥାନା ଅନ୍ତର୍ଗତ ଡେରାବିଶ ବ୍ଲକ ବସପୁର ପଞ୍ଚାୟତ ଅନ୍ତର୍ଗତ ହାଟବାଣପୁର (ଜହ୍ନିମୂଳ) ଗାଁରେ ପାରିବାରିକ ଗଣ୍ଡଗୋଳକୁ ନେଇ ରବିବାର ନୃସିଂହ ଚରଣ ସାହୁଙ୍କ ଝିଅ ଜିନମୟୀଙ୍କୁ ତାଙ୍କ ଦିଅର ରମାକାନ୍ତ ସାହୁ କଟୁରିରେ ମରଣାନ୍ତକ ଆକ୍ରମଣ କରିଛନ୍ତି। ରମାକାନ୍ତଙ୍କୁ ଗାଁ ଲୋକଙ୍କ ହାତରେ ଧରି ପଡ଼ିଛନ୍ତି। ଏ ନେଇ ଥାନାରେ ଅଭିଯୋଗ ହେବା ପରେ ପୋଲିସ ଅଭିଯୁକ୍ତ ରମାକାନ୍ତ ଓ ତାଙ୍କ ୨ ସହଯୋଗୀ ଯୁବକଙ୍କୁ ଗିରଫ କରିଛି। ଏ ନେଇ ଥାନାରେ ନଂ. ୪୬୪/୨୩ରେ ମାମଲା ରୁଜୁ ହୋଇଛି।
ହାଟବାଣପୁର ଗ୍ରାମର ନୃସିଂହଙ୍କ ଝିଅ ଜିନମୟୀ (୩୦) ୬ ବର୍ଷ ତଳେ କଟକ ଜିଲା ନେମାଳ ଥାନା ଅନ୍ତର୍ଗତ ତିଲକଣା ଗାଁରେ ବିବାହ କରିଥିଲେ। ସେଠାରେ ସେ ୨ ବର୍ଷ ରହିବା ପରେ ତାଙ୍କର ଏକ ଝିଅ ହୋଇଥିଲା। ହେଲେ ଜିନମୟୀଙ୍କୁ ତାଙ୍କ ଶ୍ୱଶୁର ଘର ଲୋକ ନିର୍ଯାତନା ଦେବା କାରଣରୁ ସେ ବାପଘରକୁ ୩ ବର୍ଷ ହେଲା ପଳାଇ ଆସଛନ୍ତି। ନିଜର ଓ ନିଜ ଝିଅର ଭରଣ ପୋଷଣ ପାଇଁ ବିଚାରାଳୟରେ ସ୍ବାମୀଙ୍କ ନାମରେ ମାମଲା ରୁଜୁ କରିଥିଲେ। ଯେଉଁ କେସର ସୋମବାର ଶୁଣାଣି ହେବାର ତାରିଖ ରହିଛି। ହେଲେ ରବିବାର ଜିନମୟୀଙ୍କ ୪ ବର୍ଷୀୟା ଝିଅର ଜନ୍ମଦିନ ପାଳନ ଚାଲିଥିବା ବେଳେ ଦିଅର ରମାକାନ୍ତଙ୍କ ସହ ଅନ୍ୟ ୨ଜଣ ଯୁବକ ଏକ ବାଇକ୍ରେ ତାଙ୍କ ବାପଘରେ ପହଞ୍ଚତ୍ ଥିଲେ। ଝିଅର ଜନ୍ମଦିନ ପାଳନ ପାଇଁ ରୋଷେଇବାସ କରାଯାଇଥିବାରୁ ଖିଆପିଆ ମଧ୍ୟ କରିଥିଲେ। ହେଲେ ଭାଉଜ ସହ ଚାଲିଥିବା ମାମଲାର ସମାଧାନ ପାଇଁ ଦିଅର ଏକାନ୍ତରେ କଥା ହେବା ପାଇଁ ଚାହିଁବାରୁ ପରିବାର ଲୋକ ପଦାକୁ ଆସିଥିଲେ। ମାତ୍ର କିଛି ସମୟ ପରେ ଜିନମୟୀ ଚିତ୍କାର କରିଥିଲେ। ପରିବାର ଲୋକ ଘର ଭିତରକୁ ପଶି ଦେଖିଲେ ଯେ ଜିନମୟୀଙ୍କ ଶରୀରର ବିଭିନ୍ନ ସ୍ଥାନରେ ଏକ କଟୁରୀରେ ତାଙ୍କ ଦିଅର ଚୋଟ ମାରି ଗୁରୁତର କରି ପକାଇଛନ୍ତି। ଏହା ଦେଖି ପରିବାର ଲୋକ ବଡ଼ପାଟି କରି ଡାକିବାରୁ ଗଁାର ଲୋକମାନେ ଜମା ହୋଇ ଯାଇଥିଲେ। ଏହି ସମୟରେ ଖସିଯିବାକୁ ଉଦ୍ୟମ କରୁଥିବା ଜିନମୟୀଙ୍କ ରମାକାନ୍ତ ଓ ଅନ୍ୟ ୨ ସହଯୋଗୀଙ୍କୁ ଗ୍ରାମବାସୀ କାବୁ କରି ବାନ୍ଧି ପକାଇ ଥିଲେ। ପରେ ଏ ସମ୍ପର୍କରେ ଥାନାକୁ ଖବର ଦେଇଥିଲେ। ଖବର ପାଇ ପୋଲିସ୍ ଘଟଣାସ୍ଥଳରେ ପହଞ୍ଚତ୍ ପ୍ରଥମେ ଗୁରୁତର ଜିନମୟୀଙ୍କୁ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟକୁ ପଠାଇ ୩ ଅଭିଯୁକ୍ତଙ୍କୁ ଗିରଫ କରିଛି। ଏହି ଘଟଣାରେ ସେମାନଙ୍କଠାରୁ ବ୍ୟବହୃତ କଟୁରୀ, ବାଇକ୍ ଓ ବିଷ ବୋତଲକୁ ଜବତ କରାଯାଇଛି। ତେବେ ଜିନମୟୀଙ୍କ ଅବସ୍ଥା ଅଧିକ ଗୁରୁତର ହେବାରୁ ତାଙ୍କୁ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି। ଏପଟେ ପୋଲିସ୍ ଘଟଣାର ଅଧିକ ତଦନ୍ତ କରୁଥିବା ଜଣାଯାଇଛି।