ଆଳି,୧୫।୨(ଡି.ଏନ.ଏ.): କେନ୍ଦ୍ରାପଡ଼ା ଜିଲା ଆଳି ବ୍ଲକର ୩୪ ପଞ୍ଚାୟତ ମଧ୍ୟରୁ ମାଣିକପାଟଣାରେ ଗୋଟିଏ ପରିବାର ଏକ ପକ୍ଷରୁ ହେଉଥିବା ଭୋଜି ଖାଇବାକୁ ନ ଯିବାରୁ ଆକ୍ରମଣ କରାଯାଇଛି। ଆକ୍ରମଣରେ ପରିବାରର ୩ ଜଣ ଗୁରୁତର ହୋଇଥିବା ଜଣାପଡ଼ିଛି। ଆଳି ଥାନାରେ ଗାଁର ସଞ୍ଜୟ ଦାସ କରିଥିବା ଅଭିଯୋଗ ଅନୁଯାୟୀ, ରବିବାର ରାତିରେ ଚିନ୍ମୟ ତରାଇ ତାଙ୍କ ପୁତୁରାକୁ ଭୋଜି ଖାଇବାକୁ ଡାକିଥିଲେ। ସେ ଏତେ ରାତିରେ ଭୋଜି ଖାଇବାକୁ ଯିବନାହଁ ବୋଲି କହିବାରୁ ଚିନ୍ମୟ ତାଙ୍କ ସହ ଯୁକ୍ତିତର୍କ କରିଥିଲେ। ସେଠାରୁ ପଳାଇଯାଇ କିଛି ସମୟ ପରେ ଚିନ୍ମୟ, ପପି ତରାଇ, ବାପି ତରାଇ, ନିରଞ୍ଜନ ତରାଇ, ପ୍ରତାପ ଜେନା, ସୁଧାଂଶୁ ଜେନା, ହିମାଂଶୁ ଜେନାଙ୍କ ସମେତ ପ୍ରାୟ ୩୦ରୁ ଊର୍ଦ୍ଧ୍ୱ ବ୍ୟକ୍ତି ତାଙ୍କ ଘର ବାହାରେ ପହଞ୍ଚତ୍ ବିଭିନ୍ନ ପ୍ରକାର ମାରଣାସ୍ତ୍ରରେ ଘରର କବାଟ, ଝରକା ତାଡ଼ି ପରିବାର ଲୋକଙ୍କୁ ଆକ୍ରମଣ କରିଥିଲେ। ସେମାନଙ୍କ ଆକ୍ରମଣରେ ସେ ଓ ତାଙ୍କ ଦୁଇଭାଇ ଗୁରୁତର ଆହତ ହୋଇ ଆଳି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସିତ ହେବାପରେ ଥାନାରେ ଅଭିଯୋଗ କରିଛନ୍ତି। ମନୋରଞ୍ଜନ ତରାଇ ଅଭିଯୋଗ କରିଛନ୍ତି ଯେ, ସେ ଗତ ରାତିରେ ବଜାରରୁ ଘରକୁ ଫେରୁଥିବା ବେଳେ ରାସ୍ତାରେ ରାଜୀବ ଦାସଙ୍କ ସମେତ ଅନ୍ୟମାନେ ଆକ୍ରମଣ କରିଛନ୍ତି। ଉଭୟ ଗୋଷ୍ଠୀ ପକ୍ଷରୁ ଥାନାରେ ପୃଥକ୍ ଅଭିଯୋଗ କରାଯାଇଥିବା ଆଇଆଇସି ସଲିଲ ପ୍ରଧାନ ସୂଚନା ଦେଇଛନ୍ତି। ଥାନାରେ ନଂ.୪୬/୨୨ ଓ ୪୭/୨୨ରେ ମାମଲା ରୁଜୁ ହୋଇଛି।