ମୁମ୍ବାଇ: ‘ଯୋଦ୍ଧା ଆକବର’ ଏବଂ ‘ବିଗ୍ ବ୍ରଦର’ ଭଳି ଫିଲ୍ମରେ ଅଭିନୟ କରିଥିବା ପଞ୍ଜାବର ପ୍ରସିଦ୍ଧ ଅଭିନେତା ଅମନ ଧାଲିଓ୍ବାଲଙ୍କ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ଏହି ଭିଡିଓରେ ଆମେରିକାର କାଲିଫର୍ନିଆର ଏକ ଜିମ୍ରେ ସେ ଓ୍ବାର୍କଆଉଟ୍ କରୁଥିବା ସମୟରେ କେହି ଜଣେ ଅଜଣା ବ୍ୟକ୍ତି ତାଙ୍କୁ କୁରାଢ଼ିରେ ଆକ୍ରମଣ କରିଛନ୍ତି।
ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓରେ ଅମନ ଆକ୍ରମଣକାରୀଙ୍କଠାରୁ ନିଜକୁ ରକ୍ଷା କରିବାକୁ ଯାଇ ଆହତ ହୋଇଥିବା ଦେଖିବାକୁ ମିଳିଛି।
ଏହି ଭିଡିଓକୁ ଜଣେ ୟୁଜର ସୋସିଆଲ ମିଡିଆରେ ଶେୟାର କରିଛନ୍ତି। ଯାହାକି ଆମେରିକାର ସ୍ଥାନୀୟ ସମୟ ଅନୁଯାୟୀ ସକାଳ ସାଢ଼େ ୯ଟାରେ ଘଟିଛି।
ଜିମ୍ ସେଣ୍ଟରରେ ଅମନ ଓ୍ବାର୍କଆଉଟ୍ କରୁଥିବା ବେଳେ ଜଣେ ଅଜଣା ବ୍ୟକ୍ତି କୁରାଢ଼ି ଧରି ହଠାତ୍ ତାଙ୍କୁ ଆକ୍ରମଣ କରୁଛନ୍ତି। ଅଜଣା ବ୍ୟକ୍ତିଙ୍କ କବଳରୁ ରକ୍ଷା ପାଇବା ପାଇଁ ଅମନଙ୍କର ତାଙ୍କ ସହ ଧସ୍ତାଧସ୍ତି ହେଉଛି। ଫଳରେ ଅମନ ରକ୍ତ ଜୁଡୁବୁଡୁ ହୋଇଥିବା ଦେଖିବାକୁ ମିଳିଛି। ଏହି ସମୟରେ ପାଖରେ ଥିବା କିଛି ଲୋକ ଅଜଣା ବ୍ୟକ୍ତିଙ୍କୁ କାବୁ କରି ନେଇଛନ୍ତି। ପରେ ପୋଲିସ ଆସି ତାଙ୍କୁ ନେଇଯାଇଛି।