ଜଲାଲାବାଦ୍, ୨।୨: ପଞ୍ଜାବ ଜଲାଲାବାଦ୍ରେ ଅକାଳୀ ଦଳ ନେତା ସୁଖବୀର ସିଂ ବାଦଲଙ୍କ ଉପରେ ଆକ୍ରମଣ ହୋଇଛି। ମଙ୍ଗଳବାର ସେ ନଗର ପରିଷଦ ନିର୍ବାଚନ ପାଇଁ ଅକାଳୀ ଦଳ ପ୍ରାର୍ଥୀଙ୍କର ନାମାଙ୍କନ କରିବା ପାଇଁ ସମୟ ଧାର୍ଯ୍ୟ କରାଯାଇଥିଲା। ତେବେ ସୁଖବୀରଙ୍କ ଗାଡ଼ି ଉପରେ ଆକ୍ରମଣ କରାଯିବା ଯୋଗୁ ଜମାହୋଇଥିବା ଲୋକଙ୍କ ମଧ୍ୟରେ ଦୌଡ଼ି ଦୌଡ଼ି ଆରମ୍ଭ ହୋଇଥିଲା। କିଛି ଅଜଣା ଲୋକ ସୁଖବୀରଙ୍କ ଗାଡ଼ି ଉପରେ ପଥରମାଡ଼ କରିଥିଲେ। ତେବେ ପଥରମାଡ଼ ସମୟରେ ସୁଖବୀର ଗାଡ଼ିରେ ନ ଥିଲେ। ତାଙ୍କ ସୁରକ୍ଷାକର୍ମୀ ତାଙ୍କୁ ସୁରକ୍ଷିତ ସ୍ଥାନକୁ ନେଇ ଯାଇଥିଲେ। କଂଗ୍ରେସ ଏବଂ ଅକାଳୀ ଦଳ ସମର୍ଥକଙ୍କ ମଧ୍ୟରେ ହୋଇଥିବା ଉତ୍ତେଜନା ସମୟରେ କିଛି ରାଉଣ୍ଡ ଗୁଳି ଚାଳନା ମଧ୍ୟ କରାଯାଇଛି। କଂଗ୍ରେସ ଏଭଳି କରି ଅକାଳୀ ଦଳ ପ୍ରାର୍ଥୀଙ୍କ ନାମାଙ୍କନରେ ବାଧା ସୃଷ୍ଟି କରୁଥିବା ଅଭିଯୋଗ ହୋଇଛି।