ଢେଙ୍କାନାଳ ଅଫିସ,୧୧ା୧୨: ଢେଙ୍କାନାଳ ଜିଲା ସଦର ଥାନା ଗୋବିନ୍ଦପୁର ଫାଣ୍ଡି କୁରମଟାଙ୍ଗର ଗ୍ରାମରେ ନିକଟରେ ଶନିବାର ବିଳମ୍ବିତ ରାତିରେ ପଥର ମାଫିଆମାନେ ଜିଲା ବନଖଣ୍ଡ ଅଧିକାରୀ ତଥା ଡିଏଫ୍ଓ ଡ. ପ୍ରକାଶ ଚାନ୍ଦ ଗୋଗିନେନିଙ୍କୁ ମରଣାନ୍ତକ ଆକ୍ରମଣ କରିଛନ୍ତି। ତାଙ୍କ ମୁଣ୍ଡର ଡାହାଣ ପାର୍ଶ୍ୱରେ ଗଭୀର ଆଘାତ ଲାଗିଛି। ସେ ରାତିରେ ଜିଲା ମୁଖ୍ୟ ଚିକିତ୍ସାଳୟକୁ ଯାଇ ଚିକିତ୍ସିତ ହୋଇଥିଲେ। ଜିଲା ବନଖଣ୍ଡ ଅଧିକାରୀ ଶନିବାର ବିଳମ୍ବିତ ରାତିରେ କୁରମଟାଙ୍ଗର ଗ୍ରାମ ନିକଟରେ ସଦର ରେଞ୍ଜ କପିଳାସ ଅଭୟାରଣ୍ୟରେ ହାତୀମାନଙ୍କ ଗତିବିଧି ଓ ହାତୀ ସ୍କ୍ବାଡ ସଦସ୍ୟ କିଭଳି ପାଟ୍ରୋଲିଂ କରୁଛନ୍ତି ଏହାକୁ ଦେଖିବା ପାଇଁ ହଠାତ୍ ଯାଇ ସେଠାରେ ପହଞ୍ଚିଥିଲେ। ସେହି ସମୟରେ ଅଭୟାରଣ୍ୟ ନିକଟରେ ଥିବା ବେଆଇନ ପଥର ଖାଦାନରେ ମାଫିଆମାନେ ପଥର ଚୋରାଚାଲାଣ କରୁଥିଲେ। ଜିଲା ବନଖଣ୍ଡ ଅଧିକାରୀ ଗାଡ଼ି ରଖି ସେମାନଙ୍କୁ ପଚରାଉଚରା କରିବା ସହିତ କାଗଜପତ୍ର ଦେଖାଇବାକୁ କହିବାରୁ ପଥର ମାଫିଆମାନେ ଇଟ୍ଟା ଧରି ତାଙ୍କ ମୁଣ୍ଡକୁ ଆକ୍ରମଣ କରି ଫେରାର ହୋଇ ଯାଇଥିଲେ। ଏ ସଂକ୍ରାନ୍ତରେ ଜିଲା ବନଖଣ୍ଡ ଅଧିକାରୀ ରବିବାର ପୂର୍ବାହ୍ନ ୧୧ ଠାରେ ସଦର ଥାନାରେ ଲିଖିତ ଅଭିଯୋଗ କରିଛନ୍ତି। ଖବର ପାଇଁ ସଦର ଥାନା ପୋଲିସ ୬ ଜଣଙ୍କୁ ଅଟକ ରଖି ପଚରାଉଚରା କରୁଛି। ଘଟଣାସ୍ଥଳରୁ ଗୋଟିଏ ପଥର ବୋଝେଇ ଟ୍ରକକୁ ବନ ବିଭାଗ ଜବତ କରିଛି। ପଥର ମାଫିଆମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲା ବନଖଣ୍ଡ ଅଧିକାରୀ କହିଛନ୍ତି। କାର୍ଯ୍ୟରତ ସରକାରୀ ଅଧିକାରୀ ଓ କର୍ମଚାରୀଙ୍କୁ ଆକ୍ରମଣ ଘଟଣାକୁ ବରଦାସ୍ତ କରାଯିବନି। ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲାପାଳ ସରୋଜ କୁମାର ସେଠୀ କହିଛନ୍ତି।