ଘସିପୁରା,୧ା୧୨: କେନ୍ଦୁଝର ଜିଲା ଖଣି ବିଭାଗ ଏନ୍ଫୋର୍ସମେଣ୍ଟ୍ ଟିମ୍ ଉପରେ ବାଲି ମାଫିଆଙ୍କ ଆକ୍ରମଣ ଘଟଣା ଚର୍ଚ୍ଚାର ପରିସରକୁ ଆସିଛି। ଏହି ଆକ୍ରମଣରେ ଖଣି ବିଭାଗର କନିଷ୍ଠ ମାଇନିଂ ଅଫିସର ସୁରଜ ହେମ୍ବ୍ରମଙ୍କ ସହିତ ୩ ସୁରକ୍ଷାକର୍ମୀ ଓ ଗାଡ଼ିଚାଳକ ଆହତ ହୋଇଛନ୍ତି। ଆହତମାନେ ଉପଖଣ୍ଡ ଚିକିତ୍ସାଳୟରେ ପ୍ରାଥମିକ ଚିକିତ୍ସା କରାଇବା ସହିତ ଘସିପୁରା ଥାନାରେ ଲିଖିତ ଅଭିଯୋଗ କରିଥିବା ସୂଚନା ମିଳିଛି।
ସୂଚନାଯୋଗ୍ୟ, ରବିବାର ରାତିରେ ଆନନ୍ଦପୁର ବ୍ରିଜ୍ ଛକ ପାର୍ଶ୍ୱରୁ ଖଣିବିଭାଗ ଏନ୍ଫୋର୍ସମେଣ୍ଟ ଟିମ୍ ଗାଡ଼ି ବୈତରଣୀ ସେତୁ ଅତିକ୍ରମ କରିବା ପରେ ଘସିପୁରା ଥାନା ସିଂହସାହି ଛକ ନିକଟ ହମ୍ପସ୍ଠାରେ ପିଛାକରି ଆସୁଥିବା କେତେକ ଗାଡ଼ି ତାଙ୍କୁ ଆଡ୍ଡା ପକାଇ ଅଟକାଇଥିଲା। ପରେ ଦୁଇଟି ଗାଡ଼ିରୁ କିଛି ଲୋକ ଅତର୍କିତ ଭାବେ ବାହାରି ଲୁହା ପାଇପ୍ ସାହାଯ୍ୟରେ ଏନ୍ଫୋର୍ସମେଣ୍ଟ୍ଟ ଟିମ୍ ଗାଡ଼ିର କାଚ ଭାଙ୍ଗିବା ସହିତ ଖଣି ବିଭାଗ କନିଷ୍ଠ ଅଫିସର ଏବଂ ସୁରକ୍ଷାକର୍ମୀଙ୍କୁ ଅତର୍କିତ ଆକ୍ରମଣ କରି ଲହୁଲୁହାଣ କରି ଘଟଣାସ୍ଥଳରୁ ଫେରାର ହୋଇଯାଇଥିଲେ।
ରବିବାର ରାତିରେ ଏନ୍ଫୋର୍ସମେଣ୍ଟ୍ ଟିମ୍ ପ୍ରଥମେ କେନ୍ଦୁଝର କାର୍ଯ୍ୟାଳୟରୁ ବାହାରି ହରିଚନ୍ଦନପୁର ଅଞ୍ଚଳକୁ ଆସିଥିଲେ। ସେଠାରୁ ଫେରିବା ସମୟରେ ସେହି ଠାରୁ ହିଁ ଦୁଇଟି ଗାଡ଼ି ତାଙ୍କୁ ଫଲୋ କରିଥିବା ଖଣି ବିଭାଗ କନିଷ୍ଠ ଅଧିକାରୀ ପ୍ରକାଶ କରିଛନ୍ତି। କିନ୍ତୁ କିଛି ବାଟ ଆସିବା ପରେ ପିଛା କରୁଥିବା ଗାଡ଼ି ସମ୍ପର୍କରେ କିଛି ଜଣାପଡ଼ି ନ ଥିଲା। ଅପରପକ୍ଷେ ଖଣି ବିଭାଗ ଏନ୍ଫୋର୍ସମେଣ୍ଟ ଟିମ୍ ଆନନ୍ଦପୁରରେ ପହଞ୍ଚିବା ପରେ ବୈତରଣୀ ନଦୀ ପାର ହୋଇ ଆନନ୍ଦପୁର କଲେଜ ଅଭିମୁଖେ ଆସିଥିଲେ। କଲେଜ ନିକଟରୁ ଗାଡ଼ି ଫେରି ଆନନ୍ଦପୁର ବସ୍ଷ୍ଟାଣ୍ଡ ପରେ ଘସିପୁରା ଅଭିମୁଖେ ଆସିବା ସମୟରେ ଆନନ୍ଦପୁର ବ୍ରିଜ୍ଛକ ଠାରେ ଥିବା ୫ରୁ ୬ଟି ଚାରି ଚକିଆ ଗାଡ଼ିରେ କିଛି ଲୋକ ତାଙ୍କୁ ଫଲୋ କରିଥିଲେ। ସେତୁ ଅତିକ୍ରମ ପରେ ହମ୍ପସ୍ ନିକଟରେ ଗାଡ଼ି ଗତି ଧିମା ହେବାରୁ ଏନ୍ଫୋର୍ସମେଣ୍ଟ ଟିମ୍ ଗାଡ଼ିକୁ ଅଟକାଯାଇ ଅତର୍କିତ ଆକ୍ରମଣ କରାଯାଇଥିଲା। ଅଭିଯୋଗ ଆଧାରରେ ପୋଲିସ ଘଟଣାର ଅନୁସନ୍ଧାନ ଆରମ୍ଭ କରିଛି।