ଦାରିଙ୍ଗବାଡ଼ି,୧୧ା୭(ଡି.ଏନ୍.ଏ.) – ଦାରିଙ୍ଗବାଡ଼ି ସନୋଜ ଫିଲିଂ ଷ୍ଟେଶନରେ ଗୁରୁବାର ସନ୍ଧ୍ୟାରେ ଡାଇରେକ୍ଟର ଅଫ୍ ଲିଗାଲ ମେଟ୍ରୋଲୋଜି ବିଭାଗ ଚଢାଉ କରିଛି। ୬ମାସ ହେଲା ଏଠାରେ ମାପରେ ଠକେଇ ହେଉଥିବା ଚଢାଉରୁ ଜଣାପଡିବା ପରେ ବିକ୍ରି ବନ୍ଦ କରାଯାଇଛି। ଶୁକ୍ରବାର ସକାଳୁ ମଧ୍ୟ ପୁଣି ଥରେ ଯାଞ୍ଚ ଆରମ୍ଭ ହୋଇଛି। ପେଟ୍ରୋଲ ପମ୍ପର କର୍ମଚାରୀ ଓ ମାଲିକଙ୍କ ବୟାନ ରେକର୍ଡ ହୋଇଛି। ବିଭାଗର ଆସିଷ୍ଟାଣ୍ଟ କଣ୍ଟ୍ରୋଲର ବିଦ୍ୟାଧର ବିଶ୍ୱାଳଙ୍କ ନେତୃତ୍ୱରେ ଫୁଲବାଣୀ ଏବଂ ବାଲିଗୁଡ଼ା ଦାୟିତ୍ୱରେ ଥିବା ବିଭାଗୀୟ ଇନ୍ସପେକ୍ଟର ସାଗରିକା ସାବତ ପ୍ରମୁଖ ଚଢ଼ାଉ କରିଥିଲେ। ଏଠାରେ ତିନୋଟି ପେଟ୍ରୋଲ ଓ ତିନୋଟି ଡିଜେଲ ନୋଜଲ ରହିଛି। ସେଥିରୁ ୩ ପେଟ୍ରୋଲ ଓ ଗୋଟିଏ ଡିଜେଲ ନୋଜଲରେ କମ୍ ତେଲ ଆସୁଥିଲା। ଏହି ୪ ମେଶିନ୍ ସିଲ୍ କରାଯିବ ବୋଲି ଆସିଷ୍ଟାଣ୍ଟ କଣ୍ଟ୍ରୋଲର ବିଶ୍ୱାଳ କହିଛନ୍ତି। ଏନେଇ ଜରିମାନା ଆଦାୟ କରାଯିବ।
ବିଭାଗୀୟ ଇନ୍ସପେକ୍ଟର ସାବତ ପେଟ୍ରୋଲ ପମ୍ପ ଶୁଭାରମ୍ଭ ଦିନ ଯାଞ୍ଚ କରି ମେଶିନ୍ ଷ୍ଟାପିଂ କରିଥିଲେ। ହେଲେ ସେ ଠିକ୍ ଭାବେ କରି ନ ଥିବା ଯୋଗୁ ୬ମାସ ହେଲା ଗ୍ରାହକ ଠକାମିର ଶିକାର ହେଉଥିବା ଅଭିଯୋଗ ହୋଇଛି। ଏନେଇ ଇନ୍ସପେକ୍ଟର ସାଗରିକା ସାବତ କିଛି କହି ନ ଥିବାବେଳେ ଆସିଷ୍ଟାଣ୍ଟ କଣ୍ଟ୍ରୋଲର ବିଶ୍ୱାଳ ମେଶିନରେ ତ୍ରୁଟି ଯୋଗୁ ଏପରି ହୋଇଛି, ସମସ୍ତ ରିପୋର୍ଟ ଜିଲାପାଳଙ୍କୁ ଦିଆଯିବ ବୋଲି କହିଛନ୍ତି। ଏନେଇ କନ୍ଧମାଳ ଜିଲାପାଳ ଡ.ବୃନ୍ଦା ଡି କହିଛନ୍ତି ରିପୋର୍ଟ ମିଳିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଏନେଇ ମାଲିକ ସନୋଜ କୁମାର ସାହୁ କହିଛନ୍ତି, ସେ କମ୍ପାନୀରୁ ଫ୍ରାଞ୍ଚାଇଜ ନେଇଥିବାବେଳେ ଇନ୍ସପେକ୍ଟର ସାବତ ଷ୍ଟାପିଂ କରିଥିଲେ। ତ୍ରୁଟି ପାଇଁ କମ୍ପାନୀ ଓ ସମ୍ପୃକ୍ତ ଅଧିକାରୀ ଦାୟୀ।
