ବାଲିପାଟଣା,୧୭ା୫(ଡି.ଏନ୍.ଏ.):ଚୋରାରେ ମଦ ବିକ୍ରି କରୁଥିବା ଦୋକାନ ଉପରେ ଚଢ଼ାଉ ବେଳେ ପୋଲିସଙ୍କୁ ଆକ୍ରମଣ ହୋଇଛି। ଏଥିସହ ମଦ ବେପାର କରୁଥିବା ଦୋକାନୀଙ୍କ ପରିବାର ଓ ସମର୍ଥକମାନେ ରାସ୍ତାରୋକୋ କରିଥିଲେ। ରାଜଧାନୀ ଉପକଣ୍ଠ ବାଲିପାଟଣା ଥାନା ଅନ୍ତର୍ଗତ ନରଦା ବଜାରରେ ଏପରି ଘଟଣା ଦେଖିବାକୁ ମିଳିଛି। ଏହି ଘଟଣାରେ ସୋମବାର ପୋଲିସ ୬ଜଣଙ୍କୁ ଗରଫ କରି କୋର୍ଟଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ ତୁରିନ୍ତିରା ପଞ୍ଚାୟତର ସମିତିସଭ୍ୟ ସନାତନ ସେଠୀ, ନରଦା ଅଞ୍ଚଳର ବିନୟ ମହାରଣା, ପୁଷ୍ପଲତା ସାହୁ, ଯୋଗେନ୍ଦ୍ର ସାହୁ, ପୀର ସେଠୀ ଓ ସୁରେନ୍ଦ୍ର ସେଠୀ। ତେବେ ଅନ୍ୟ ଅଭିଯୁକ୍ତମାନେ ଫେରାର ଥିବା ପୋଲିସ କହିଛି।
ସୂଚନା ମୁତାବକ, ନରଦା ବଜାରରେ ଦୀର୍ଘଦିନ ହେବ ଚୋରା ମଦ କାରବାର ହେଉଥିବା ନେଇ ପୋଲିସକୁ ସୂଚନା ମିଳିଥିଲା। ଥାନା ଅଧିକାରୀ କୃପାସିନ୍ଧୁ ବରାଡ଼ଙ୍କ ନେତୃତ୍ୱରେ ରବିବାର ରାତିରେ ଏକ ଟିମ୍ ନରଦା ବଜାରରେ ଥିବା ବଳରାମ ସାହୁ ଓରଫ ଗାଣ୍ଡୁଙ୍କ ଦୋକାନରେ ଚଢ଼ାଉ କରିବା ସହ ମଦ ଜବତ କରିଥିଲା। ଏହାକୁ ବିରୋଧ କରି ଦୋକାନୀଙ୍କ ପରିବାର ଓ ସମର୍ଥକମାନେ ପୋଲିସଙ୍କୁ ଆକ୍ରମଣ କରିବା ସହ ଗାଳିଗୁଲଜ କରି ମଦ ଛଡ଼ାଇ ନେଇଥିଲେ। ଏହା ପରେ ପୋଲିସ ଟିମ୍ ଫେରି ଆସିଥିଲା। ତେବେ ମଦ ଜବତ ବେଳେ ପୋଲିସ ଓ ମଦ ବେପାରୀ ମୁହଁାମୁହିଁ ନେଇ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ପୋଲିସ ଦୁର୍ବ୍ୟବହାର କରିଥିବା ଅଭିଯୋଗ ଆଣି ସୋମବାର ସକାଳେ ଚୋରା ମଦ ଦୋକାନୀ ଓ ସେମାନଙ୍କ ପରିବାର, ସମର୍ଥକମାନେ ନରଦା ଛକରେ ଟାୟାର ଜାଳି ରାସ୍ତାରୋକୋ କରିଥିଲେ। ଖବରପାଇ ପୋଲିସ ପହଞ୍ଚି ୬ଜଣଙ୍କୁ ଗିରଫ କରିଥିବା ବେଳେ ଅନ୍ୟମାନେ ଫେରାର ହୋଇଯାଇଥିଲେ। ପୋଲିସଙ୍କୁ ଆକ୍ରମଣ ଘଟଣାରେ ଏକ ମାମଲା (ନଂ.୧୨୭/୨୨)ରଜୁ ହୋଇଥିବା ବେଳେ ରାସ୍ତାରୋକୋ ଘଟଣାରେ ଆଉ ଏକ ମାମଲା (ନଂ.୧୨୮/୨୨)ରୁଜୁ ହୋଇଛି। ଖୁବଶୀଘ୍ର ଅନ୍ୟ ଅଭିଯୁକ୍ତମାନଙ୍କୁ ଗିରଫ କରାଯିବ ବୋଲି ଥାନା ଅଧିକାରୀ ବରାଡ଼ କହିଛନ୍ତି।
