କୋରେଇ,୩୦।୩(ଚନ୍ଦ୍ରକାନ୍ତ ପତି): ଚୋରି ବାଇକ୍କୁ ଜବତ କରିବାକୁ ଯାଇଥିବା ଯାଜପୁର ଜିଲା କୋରେଇ ଥାନା ପୋଲିସ ଟିମ୍କୁ ପୂର୍ବକୋଟ ତେଲେଙ୍ଗା ବସ୍ତିର ଲୋକମାନେ ଆକ୍ରମଣ କରିବା ସହିତ ୨ ଅଭିଯୁକ୍ତଙ୍କୁ ଛଡ଼ାଇନେଇଛନ୍ତି । ଏହାକୁ ନେଇ ସେଠାରେ ଉତ୍ତେଜନା ଲାଗି ରହିଛି ା ପୋଲିସ ଏହି ଘଟଣାରେ ୨୦ଜଣଙ୍କୁ ଅଟକ ରଖି ତଦନ୍ତ ଚଳାଇଛି ା ଘଟଣାସ୍ଥଳରେ ପୋଲିସ ମୁତୟନ କରାଯାଇଛି ା
ସୂଚନା ଅନୁଯାୟୀ, କୁଆଖିଆ ଥାନା ଅଧୀନ ଆମ୍ପର ଗ୍ରାମର ନରେନ୍ଦ୍ର ରଣା (୪୯) ଗତ ସପ୍ତାହରେ କୁଆଖିଆ ମେଳଣ ବୁଲୁଥିବା ସମୟରେ ତାଙ୍କ ବାଇକ୍ ଚୋରି ହୋଇଥିଲା । ଏନେଇ ସେ କୁଆଖିଆ ଥାନାରେ ଲିଖିତ ଅଭିଯୋଗ କରିଥିଲେ। ଚୋରି ବାଇକ୍ କୋରେଇ ଥାନା ଅଧୀନ କନ୍ତୋର ପଞ୍ଚାୟତ ପୂର୍ବକୋଟ ହାଟ ପଡ଼ିଆରେ ଥିବା କୌଣସି ସୂତ୍ରରୁ ଖବର ପାଇ ଗାଡ଼ି ମାଲିକ ନରେନ୍ଦ୍ର ସେଠାରେ ପହଞ୍ଚିଥିଲେ । ହାଟ ପଡ଼ିଆରେ ତାଙ୍କ ବାଇକ୍ ଥିବା ଦେଖି ସେ କୋରେଇ ପୋଲିସକୁ ଖବର ଦେଇଥିଲେ ।
ରବିବାର ସନ୍ଧ୍ୟା ପ୍ରାୟ ୭ଟା ସମୟରେ କୋରେଇ ଥାନା ଅଧିକାରୀ ରାକେଶ ତ୍ରିପାଠୀ ଘଟଣାସ୍ଥଳରେ ପହଞ୍ଚି ବାଇକ୍ ଜବତ କରିବା ସହିତ ସେଠାରେ ଉପସ୍ଥିତ ଥିବା ତେଲେଙ୍ଗା ବସ୍ତିର ୨ ଯୁବକଙ୍କୁ ଅଟକ ରଖି ପଚରାଉଚରା ପାଇଁ ଥାନାକୁ ନେବାକୁ ଗାଡ଼ିରେ ବସାଇଥିଲେ। ଏଥିରେ ଉତ୍କ୍ଷିପ୍ତ ହୋଇ ତେଲେଙ୍ଗା ବସ୍ତିର ଶତାଧିକ ମହିଳା ଓ ପୁରୁଷ ସଂଘବଦ୍ଧ ଭାବେ ଥାନାଧିକାରୀ ଏବଂ ପୋଲିସ ଗାଡ଼ି ଉପରକୁ ଅତର୍କିତ ଆକ୍ରମଣ କରି ୨ ସନ୍ଦିଗ୍ଧଙ୍କୁ ଛଡାଇ ନେଇଥିଲେ ।
ଏନେଇ ଥାନାଧିକାରୀ ଜିଲା ଆରକ୍ଷୀ ଅଧୀକ୍ଷକଙ୍କୁ ସୂଚନା ଦେବା ପରେ ଘଟଣାସ୍ଥଳରେ ୨ ପ୍ଲାଟୁନ ପୋଲିସ ଫୋର୍ସ ପହଞ୍ଚି ତେଲେଙ୍ଗା ବସ୍ତି ଉପରେ ଚଢ଼ାଉ କରିଥିଲେ । କନ୍ତୋର ସରପଞ୍ଚ ସାରଙ୍ଗ ପ୍ରଧାନଙ୍କ ସମେତ ଏହି ଘଟଣାରେ ସମ୍ପୃକ୍ତ ଥିବା ୨୦ରୁ ଊଦ୍ଧର୍ବ ଆକ୍ରମଣକାରୀଙ୍କୁ ପୋଲିସ ଉଠାଇ ନେଇ ଅଟକ ରଖିଛି ।
ଏଥିସହିତ ସେମାନଙ୍କ ନିକଟରୁ ୪ ବାଇକ୍ ଏବଂ ୫ରୁ ଉର୍ଦ୍ଧ ମୋବାଇଲ ଜବତ ହୋଇଛି ।
ଅନ୍ୟପକ୍ଷେ ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି । ପୂର୍ବକୋଟ ତେଲେଙ୍ଗା ବସ୍ତିରେ ବାସ କରୁଥିବା ଅଧିକାଂଶ ଲୋକ ସର୍ବଦା ଲୁଟ୍, ଚୋରି ଘଟଣାରେ ସମ୍ପୃକ୍ତ ରହୁଛନ୍ତି । ମାସରେ ଏକାଧିକ ଥର ବାହାର ରାଜ୍ୟର ପୋଲିସ ଏହି ବସ୍ତିରେ ଚଢ଼ାଉ କରି ଚୋରା ସୁନାଗହଣା ସହ ମୋବାଇଲ,ବାଇକ୍ ଆଦି ଜବତ କରୁଥିବା ନଜିର ରହିଛି । ଏନେଇ କୋରେଇ ଥାନାଧିକାରୀ ତ୍ରିପାଠୀଙ୍କୁ ପଚାରିବାରେ ୨୦ରୁ ଊଦ୍ଧର୍ବ ଆକ୍ରମଣକାରୀଙ୍କୁ ଅଟକ ରଖାଯାଇଛି ା ଘଟଣାର ଅଧିକ ତଦନ୍ତ ଚାଲିଥିବା କହିିଛନ୍ତି ।
