ରୋଷ ଚୁଲି ପାଇଁ ସେବାୟତଙ୍କୁ ଆକ୍ରମଣ
- ପୁରୀ ଅଫିସ,୧୦।୭: ଶ୍ରୀମନ୍ଦିରରେ ରୋଷ ଚୁଲିକୁ ନେଇ ଦୁଇ ସେବାୟତଙ୍କ ମଧ୍ୟରେ ବିବାଦ ଦେଖାଦେଇଛି। ସେବାୟତ ରଘୁନାଥ ମହାପାତ୍ର ନିଜ ଦାୟିତ୍ୱରେ ଥିବା ଚୁଲିକୁ ମରାମତି କରୁଥିବା ବେଳେ ତାଙ୍କୁ ଆକ୍ରମଣ କରାଯାଇଥିବା ସିଂହଦ୍ୱାର ଥାନାରେ ଅଭିଯୋଗ କରିଛନ୍ତି। ଅଭିଯୋଗ ଅନୁଯାୟୀ, ଚୁଲିଂ ନମ୍ବର ୭୪, ୭୫, ୭୬ ଓ ୭୭ରେ ସେବାୟତ ରଘୁନାଥ ମହାପାତ୍ର ଗଲା ବାରବର୍ଷ ହେବ ରୋଷେଇ କରି ମହାପ୍ରଭୁଙ୍କ ପାଖରେ ଭୋଗ ଲଗାଉଛନ୍ତି। ଆସନ୍ତା ୧୩ତାରିଖରେ ନୀଳାଚଳ ଅବଢ଼ା ବାହାରିବାକୁ ଥିବା ହେତୁ ଶନିବାର ମିସ୍ତ୍ରି ନେଇ ନିଜର ଚୁଲିଗୁଡ଼ିକୁ ମରାମତି କରୁଥିଲେ। ସେହି ସମୟରେ ଅନ୍ୟ ଜଣେ ସେବାୟତ ୫ରୁ ୬ଜଣ ଅସାମାଜିକ ବ୍ୟକ୍ତିଙ୍କୁ ସାଙ୍ଗରେ ନେଇ ସେଠାରେ ଚୁଲି ମରାମତି ନ କରିବା ପାଇଁ କହିଥିଲେ। ସେବାୟତ ରଘୁନାଥ ଏହାର ପ୍ରତିବାଦ କରିବାରୁ ଏକ ଗୋଟା ଇଟା ତାଙ୍କ ମୁଣ୍ଡକୁ ନରସିଂହ ମାରିଥିଲେ। ରଘୁନାଥଙ୍କ ପରିବାର ଲୋକେ ଓ ଶ୍ରୀମନ୍ଦିର କର୍ମଚାରୀମାନେ ତାଙ୍କୁ ଉଦ୍ଧାର କରି ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ତେବେ ରଘୁନାଥ ନିଜ ଚୁଲିର ସୁରକ୍ଷା ମାଗି ପୋଲିସର ଦ୍ୱାରସ୍ଥ ହୋଇଛନ୍ତି। ସେ କହିଛନ୍ତି, ୧୨ ବର୍ଷ ହେବ ଯେଉଁ ଚୁଲିରେ ରୋଷେଇ କରୁଛି, ସେହି ଚୁଲି ଉପରେ ଆକ୍ରମଣକାରୀ ସେବାୟତଙ୍କ ନଜର ରହିଛି। ଏ ନେଇ ପୋଲିସ ପ୍ରାଥମିକ ତଦନ୍ତ ଚଳାଇଛି। ଉଲ୍ଲେଖଯୋଗ୍ୟ, ମହାସୁଆର ନିଯୋଗ ମହାପ୍ରଭୁଙ୍କ ନବଦିନାତ୍ମକ ଯାତ୍ରା ସମୟରେ ସୁଆରମାନେ ନିଜ ନିଜର ଚୁଲି ମରାମତି କାର୍ଯ୍ୟ କରିଥାଆନ୍ତି।