ବାଲିଗୁଡା,୨୦ା୭(ଡି.ଏନ୍.ଏ.)- କୋଭିଡ୍ ନିୟମ ଉଲ୍ଲଂଘନ କରି ଶୁଦ୍ଧିକ୍ରିୟା ଚାଲିଥିଲା। ତହସିଲଦାର ପହଞ୍ଚି ବାରଣ କରିବାରୁ ଜଣେ ଅଧ୍ୟାପକ ତାଙ୍କୁ ଆକ୍ରମଣ କରିଥିଲେ। ଥାନାରେ ଅଭିଯୋଗ ପରେ ପୋଲିସ ସମ୍ପୃକ୍ତ ଅଧ୍ୟାପକଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେ ହେଲେ ବାଲିଗୁଡା ଆଦିବାସୀ ମହାବିଦ୍ୟାଳୟ ଅଧ୍ୟାପକ ତେଜେଶ୍ୱର ନାୟକ।
ବାଲିଗୁଡା ଥାନା ମୁଣ୍ଡାସାହି ଅଞ୍ଚଳରେ କୋଭିଡ୍ ନିୟମ ଉଲ୍ଲଂଘନ କରି ଶନିବାର ଏକ ଶୁଦ୍ଧିକ୍ରିୟା ଚାଲିଥିଲା। କୋଲକାତାରୁ ଆସି ଗୋଟିଏ ପରିବାରର ୪ ଜଣ ସଦସ୍ୟ ଯୋଗ ଦେଇଥିବା ସୂଚନା ପାଇ ବାଲିଗୁଡା ତହସିଲଦାର କ୍ଷୀରାବ୍ଧିତନୟା ସାହୁ ପହଞ୍ଚତ୍ଥିଲେ। ଏନେଇ ସେମାନେ ଅନୁମତି ଆଣି ନ ଥିବା ଜଣାପଡିଥିଲା। ତହସିଲଦାର ତଦନ୍ତ କରୁଥିବାବେଳେ ଅଧ୍ୟାପକ ଗାଳିଗୁଲଜ କରିବା ସହ ତହସିଲଦାରଙ୍କୁ ଧକ୍କା ମାରିଥିଲେ। ତହସିଲଦାର ସାହୁ ଏନେଇ ବାଲିଗୁଡା ଥାନାରେ ଏତଲା ଦେବା ସହ କନ୍ଧମାଳ ଜିଲାପାଳ ଓ ଉପଜିଲାପାଳଙ୍କୁ ମଧ୍ୟ ଅବଗତ କରାଇଥିବା କହିଛନ୍ତି। ନଂ. ୧୩୪/୨୦ରେ ମାମଲା ରୁଜୁକରି ଅଧ୍ୟାପକଙ୍କୁ ରବିବାର କୋର୍ଟ ଚାଲାଣ କରାଯାଇଥିବା ବାଲିଗୁଡା ଡିଏସ୍ପି ମନୋଜ କୁମାର ପୂଜାରୀ କହିଛନ୍ତି।