ନୂଆଦିଲ୍ଲୀ,୧୧।୧୨: ବହୁଚର୍ଚ୍ଚିତ ଲଖିମପୁର ଖେରି ହିଂସା ଘଟଣାର ମୁଖ୍ୟ ସାକ୍ଷୀ ପ୍ରବଜୋତ୍ ସିଂ ଏବଂ ତାଙ୍କ ସାନଭାଇ ସରଓ୍ବଜିତ୍ ସିଂଙ୍କୁ ମରଣାନ୍ତକ ଆକ୍ରମଣ କରାଯାଇଛି। ଫଳରେ ପ୍ରବଜୋତ୍ ଓ ସରଓ୍ବଜିତ୍ଙ୍କ ମୁଣ୍ଡରେ ଗଭୀର ଆଘାତ ଲାଗିଛି । ଉଭୟଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ଏହି ଆକ୍ରମଣ ଦୁଇ ଗୋଷ୍ଠୀ ମଧ୍ୟରେ ଶତ୍ରୁତା ଏବଂ ଗଣ୍ଡଗୋଳରୁ ହୋଇଥିବା ପୋଲିସ କହୁଥିବା ବେଳେ ଲଖିମପୁର ଖେରି ହିଂସା ମାମଲା ଲିଙ୍କ୍କୁ ପୋଲିସ ଅସ୍ବୀକାର କରିଛି।
ମିଳିଥିବା ସୂଚନା ମୁତାବକ, ପ୍ରବଜୋତ୍ ଏବଂ ତାଙ୍କ ଭାଇ ଏକ ସମାରୋହରେ ଯୋଗଦେବାକୁ ଯାଇଥିଲା ବେଳେ ୩ ଜଣ ଯୁବକ ଅତର୍କିତ ଭାବେ ଉଭୟଙ୍କୁ ଆକ୍ରମଣ କରିଥିଲେ।
ସୂଚନାଯୋଗ୍ୟ, ଲଖିମପୁର ଖେରି ହିଂସାର ମୁଖ୍ୟ ଅଭିଯୁକ୍ତ ତଥା କେନ୍ଦ୍ର ମନ୍ତ୍ରୀ ଅଜୟ ମିଶ୍ରାଙ୍କ ପୁଅ ଆଶିଷ ମିଶ୍ରା ଏଥିରେ ସମ୍ପୃକ୍ତି ରହିଥିବା ଅଭିଯୋଗ ହୋଇଛି । ତାଙ୍କର ଘନିଷ୍ଠ ଏହି ଆକ୍ରମଣ କରିଥିବା ଅଭିଯୋଗ ହୋଇଛି। ହେଲେ ପୋଲିସ ଏଫ୍ଆଇଆର୍ରୁ ଆଶିଷଙ୍କ ନାଁ ହଟାଇବାକୁ ବାଧ୍ୟ କରୁଛି ବୋଲି ଆକ୍ରମଣର ଶିକାର ହୋଇଥିବା ପ୍ରବଜୋତ୍ ଅଭିଯୋଗ କରିଛନ୍ତି।
ସେପଟେ ଦୁଇ ଗୋଷ୍ଠୀ ଗଣ୍ଡଗୋଳରୁ ଏହି ଆକ୍ରମଣ ହୋଇଛି ବୋଲି ପୋଲିସ କହିଛି । ଲଖିମପୁର ଖେରି ମାମଲାରେ ଡିସେମ୍ବର ୬ ତାରିଖରେ କେନ୍ଦ୍ର ମନ୍ତ୍ରୀ ମିଶ୍ରାଙ୍କ ପୁଅ ଆଶିଷ ମିଶ୍ରାଙ୍କ ସମେତ ସମସ୍ତ ୧୪ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ ହୋଇଥିଲା। ପୋଲିସ ତାଙ୍କ ବିରୋଧରେ ଆଇପିସିର ବିଭିନ୍ନ ଧାରା ସମେତ ମୋଟର ଯାନ ଅଧିନିୟମର ଧାରା ୧୭୭ ଅନୁଯାୟୀ ଚାର୍ଜଶିଟ ଦାଖଲ କରିଛି। ଡିସେମ୍ବର ୧୬ରୁ ମାମଲାର ଶୁଣାଣି ଆରମ୍ଭ ହେବ।