ମସ୍କୋ,୬।୧୨: ରୁଷୀୟ ତୈଳକୁ ୟୁରୋପୀୟ ରାଷ୍ଟ୍ରଗୁଡ଼ିକ ବ୍ୟାରେଲ ପିଛା ୬୦ ଡଲାରରେ ସୀମିତ ରଖି ମସ୍କୋକୁ ଆର୍ଥିକ ଝଟକା ଦେଇଛନ୍ତି। ଏହି ପଦକ୍ଷେପକୁ ନେଇ କ୍ଷୁବ୍ଧ ରୁଷିଆର ସାମରିକ ବଳ ସୋମବାର ୟୁକ୍ରେନ୍ ଉପରେ ଘନଘନ ମିଶାଇଲ୍ ମାଡ଼ କରିଛି। ରୁଷିଆ ପକ୍ଷରୁ ଦେଶର ବିଭିନ୍ନ ସ୍ଥାନରେ ୭୦ କ୍ଷେପଣାସ୍ତ୍ର ଜରିଆରେ ଟାର୍ଗେଟ୍ କରାଯାଇଥିବାବେଳେ ତହିଁରୁ ୬୦ଟିକୁ ୟୁକ୍ରେନୀୟ ସୈନ୍ୟ ଖସାଇ ଦେଇଥିବା ଦାବି କରିଛନ୍ତି। ତେବେ ଜାପୋରିଝିଆସ୍ଥିତ ଆଣବିକ ଶକ୍ତିକେନ୍ଦ୍ରରେ ହୋଇଥିବା ମିଶାଇଲ ଆକ୍ରମଣରେ ୨ ଜଣ ନିହତ ହୋଇଛନ୍ତି। ଏହି ଆକ୍ରମଣକୁ ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ଙ୍କ ଆଉ ଏକ ବର୍ବରତା ବୋଲି ହ୍ବାଇଟ୍ ହାଉସ୍ ପକ୍ଷରୁ ନିନ୍ଦା କରାଯାଇଛି। ଇତିମଧ୍ୟରେ ଜାତିସଂଘ ମାନବ ଅଧିକାର ଉଚ୍ଚାୟୁକ୍ତ ଭୋଲ୍କର ଟର୍କ କିଭ୍ ଗସ୍ତ କରି ଯୁଦ୍ଧ ଶେଷ ପାଇଁ ମସ୍କୋକୁ ପରାମର୍ଶ ଦେଇଛନ୍ତି। ସେପଟେ ପୁଟିନ୍ ରୁଷିଆ ସହ କ୍ରିମିଆ ଉପଦ୍ୱୀପକୁ ସଂଯୋଗ କରୁଥିବା ବ୍ରିଜ୍ରେ ଗାଡ଼ି ଚଳାଇଛନ୍ତି। ଗତ ଅକ୍ଟୋବରରେ ହୋଇଥିବା ଆକ୍ରମଣରେ ଏହି ବ୍ରିଜ୍ର କିଛି ଅଂଶ ଧ୍ୱସ୍ତବିଧ୍ୱସ୍ତ ହୋଇଯାଇଥିଲା। ଏହାକୁ ଯୁଦ୍ଧକାଳୀନଭିତ୍ତିରେ ମରାମତି କରିବା ପରେ ବାହାଦୁରି ମାରିବା ପାଇଁ ପୁଟିନ୍ ବ୍ରିଜ୍ ଉପରେ ନିଜେ ଡ୍ରାଇଭିଂ କରିଥିବା କୁହାଯାଉଛି। ପ୍ରକାଶ ଯେ, ୨୦୧୪ରେ ରୁଷିଆ କ୍ରିମିଆକୁ ଦଖଲ କରିବା ପରେ ପୁଟିନ୍ଙ୍କ ନିର୍ଦ୍ଦେଶକ୍ରମେ ୧୨ ମାଇଲ୍ ବିଶିଷ୍ଟ ଏହି ବ୍ରିଜ୍ ନିର୍ମାଣ କରାଯାଇଥିଲା।