ଭଣ୍ଡାରିପୋଖରୀ,୧୭।୧(ସ୍ବ.ପ୍ର.): ଭଦ୍ରକ ଜିଲା ଭଣ୍ଡାରିପୋଖରୀ ଥାନା ଅଧୀନ ଷୋଳମପୁର ପଞ୍ଚାୟତର ବରାହନୂଆପଡ଼ା ଗ୍ରାମରେ ସୋମବାର ରାସ୍ତାକାମକୁ ନେଇ ଦୁଇଗୋଷ୍ଠୀ ମଧ୍ୟରେ ମାଡ଼ପିଟ୍ ହୋଇଛି। ଆକ୍ରମଣରେ ଗୋଲକ ଚନ୍ଦ୍ର ମଲ୍ଲିକ ନାମକ ବୃଦ୍ଧଙ୍କ ମୃତ୍ୟୁ ଘଟିଛି। ସୂଚନା ଅନୁଯାୟୀ, ସକାଳେ ଗ୍ରାମରେ ଏକ ରାସ୍ତାକାମକୁ ନେଇ ଦୁଇଗୋଷ୍ଠୀ ମଧ୍ୟରେ ଗଣ୍ଡଗୋଳର ସୂତ୍ରପାତ ହୋଇଥିଲା। ଗୋଲକ, ଶଙ୍କର୍ଷଣ ମଲ୍ଲିକ, ସୁଦର୍ଶନ ପୁହାଣ, ଗୁରୁ ଚରଣ ସାହୁ ପ୍ରମୁଖଙ୍କୁ ଅପରପକ୍ଷର ପ୍ରାୟ ୨୦/୨୫ଜଣ ବ୍ୟକ୍ତି ମାରଣାସ୍ତ୍ରରେ ଆକ୍ରମଣ କରିଥିଲେ। ଏଥିରେ ଆହତ ହୋଇଥିବା ସମସ୍ତଙ୍କୁ ଯାଜପୁର ଡାକ୍ତରଖାନାକୁ ନିଆଯାଇଥିବା ବେଳେ ଗୁରୁତର ଥିବା ଗୋଲକ ଓ ଶଙ୍କର୍ଷଣଙ୍କୁ କଟକ ବଡ଼ ମେଡିକାଲକୁ ପଠାଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ଅପରାହ୍ନ ୨ଟା ବେଳେ ଗୋଲକଙ୍କର ମୃତ୍ୟୁ ଘଟିଥିଲା। ଏନେଇ ଥାନାରେ କୌଣସି ଅଭିଯୋଗ କରାଯାଇ ନ ଥିଲେ ହେଁ ଗିରଫ ଭୟରେ ଗାଁ ପୁରୁଷଶୂନ୍ୟ ହୋଇଯାଇଛି। ଏସ୍ଡିପିଓ ବିଜୟ ମହାପାତ୍ର ଓ ଥାନାଧିକାରୀ ଅମିତାଭ ଦାସ ସଦଳବଳ ଗ୍ରାମରେ ପହଞ୍ଚି ସ୍ଥିତି ଉପରେ ନଜର ରଖିଛନ୍ତି।