ଓଡ଼ାପଡ଼ା, ୧୧ା୭(ଡି.ଏନ୍.ଏ.) – ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକରେ ଲଘୁ ଖଣିଜ ଚୋରାଚାଲାଣ ପାଇଁ ସ୍ବତନ୍ତ୍ର ଭାବେ ହ୍ବାଟ୍ସଆପ୍ ଗ୍ରୁପ୍ କରାଯିବା ଏବଂ ଏଥିରେ କେତେଜଣ ଅଧସ୍ତନ କର୍ମଚାରୀଙ୍କ ସମ୍ପୃକ୍ତି ଥିବା ନେଇ ଚର୍ଚ୍ଚା ହେବା ପରେ ଅଧିକାରୀଙ୍କ ମୁଣ୍ଡବ୍ୟଥା ବଢ଼ିଛି। ତେଣୁ ଚଢ଼ାଉ ପୂର୍ବରୁ ଯୋଜନା ବିଷୟରେ କାହାରିକୁ ନ ଜଣାଇ ଅତର୍କିତ ବେଆଇନ ଖାଦାନ ଦରାଣ୍ଡିବାକୁ ଯୋଜନା କରିଛନ୍ତି ଅଧିକାରୀ। ଏହି ପରିପ୍ରେକ୍ଷୀରେ ଶୁକ୍ରବାର ଭୋର୍ ସମୟରେ ବାଉତିରଗଡ଼ାସ୍ଥିତ ରୋଡ୍ ମେଟାଲ ଖଣି ଉପରେ ତହସିଲ ପ୍ରଶାସନ ପକ୍ଷରୁ ଅତର୍କିତ ଚଢ଼ାଉ କରାଯାଇଛି। ଚଢ଼ାଉ ସମ୍ପର୍କରେ ଖଣିଜ ଚୋରା ଚାଲାଣକାରୀମାନେ ଯେପରି ସାମାନ୍ୟତମ ସୁରାକ ନ ପାଆନ୍ତି ସେଥିଲାଗି ଅଧିକାରୀମାନେ ସରକାରୀ ଗାଡ଼ି ପରିବର୍ତ୍ତେ ବେସରକାରୀ ଗାଡ଼ି ବ୍ୟବହାର କରିଥିଲେ। ଘଟଣାସ୍ଥଳରୁ କଳା ମୁଗୁନିପଥର ଚାଲାଣ କରୁଥିବା ୪ଟି ଟିପ୍ପର (ନଂ. ଓଆର ୦୯ କେ ୨୪୬୩), (ଓଆର ୧୯ କେ ୧୩୫୭), (ଓଆର ୧୯ ଏଲ୍ ୧୩୫୭), (ଓଆର ୦୬ ଜେ ୬୮୧୭) ଏବଂ ଗୋଟିଏ ମାଟିଖୋଳା ମେଶିନ ଜବତ କରାଯାଇଛି। ଅତିରିକ୍ତ ତହସିଲଦାର ସାଗରିକା ସାହୁ, ଅନୁପମା ମୁର୍ମୁ, ଆର୍ଆଇ ଚିନ୍ମୟ ଦାସ, ସୌମ୍ୟରଞ୍ଜନ ପରିଡା, ଗଦାଶିଳା ଏଆରଆଇ ଉତ୍ସବ ଦେହୁରୀ, ମୋଟଙ୍ଗା ଏଆରଆଇ ଦୀନେଶ ରାଉତରାୟ ପ୍ରମୁଖ ଚଢ଼ାଉରେ ସାମିଲ ହୋଇଥିଲେ। ଜବତ ଗାଡିଗୁଡିକୁ ଗୁଡିଆକାଟେଣୀ ପୋଲିସ ବିଟ୍ ହାଉସ ଜିମା ଦିଆଯାଇଛି।