ଭୁବନେଶ୍ୱର,୫ା୧୧(ସୂର୍ଯ୍ୟକାନ୍ତ ବେହେରା): ଭୁବନେଶ୍ୱର ବରମୁଣ୍ଡା ବସ୍ଷ୍ଟାଣ୍ଡ ନିକଟରେ ଟାଟା ଏସିଇ ଓ ଅଟୋ ମଧ୍ୟରେ ସୋମବାର ଅପରାହ୍ନରେ ଧକ୍କା ପରେ ସ୍ଥାନୀୟ ଅଞ୍ଚଳରେ ପ୍ରବଳ ଚାପା ଉତ୍ତେଜନା ପ୍ରକାଶ ପାଇଛି। ଦୁର୍ଘଟଣା ପରେ ଟାଟା ଏସିଇ ଚାଳକ ଜଣଙ୍କ କେତେଜଣ ସହଯୋଗୀଙ୍କ ସହ ମିଶି ଅନ୍ଲାଇନ ଅଟୋଚାଳକଙ୍କୁ ଆକ୍ରମଣ କରିଥିଲେ। ଏଥିରେ ଅଟୋଚାଳକ ସନ୍ତୋଷ କୁମାର ରାଉତରାୟଙ୍କ ମୁଣ୍ଡରେ ଗଭୀର ଆଘାତ ଲାଗିବା ସହ ସେ ଗୁରୁତର ଆହତ ହୋଇଥିଲେ।
ଏନେଇ ଖଣ୍ଡଗିରି ଥାନାରେ ଅଭିଯୋଗ କରିଥିଲେ ମଧ୍ୟ ପୋଲିସ ଅଭିଯୁକ୍ତଙ୍କୁ ଗିରଫ କରିବାରେ ବିଳମ୍ବ କରିଥିଲା। ତେଣୁ ଆକ୍ରମଣକୁ ବିରୋଧ କରିବା ସହ ଅଭିଯୁକ୍ତଙ୍କୁ ଗିରଫ ଦାବିରେ ଅନ୍ଲାଇନ ଅଟୋ ଚାଳକ ସଂଘ ଖଣ୍ଡଗିରି ଥାନା ଘେରାଉ କରିଥିଲା। ଏପିରି କି ଶହଶହ ଅଟୋ ଚାଳକ ଖଣ୍ଡଗିରି ଥାନା ଆଗରେ ଏକତ୍ରିତ ହୋଇ ରାସ୍ତାରେ ଅଟୋକୁ ରଖିବା ସହ ବିଭିନ୍ନ ନାରାବାଜି କରିଥିଲେ। ସନ୍ଧ୍ୟା ୫ଟାରୁ ୭ଟା ପର୍ଯ୍ୟନ୍ତ ପ୍ରାୟ ଦୁଇ ଘଣ୍ଟା କାଳ ରାଜପଥରେ ଯାତାୟାତ ବାଧାପ୍ରାପ୍ତ ହୋଇଥିଲା। ଖଣ୍ତଗିରି ଥାନା ଅଧିକାରୀ ଉତ୍ତ୍ୟକ୍ତ ଅଟୋଚାଳକଙ୍କୁ ବୁଝାଶୁଝା କରିବା ସହ ତୁରନ୍ତ ଅଭିଯୁକ୍ତଙ୍କୁ ଗିରଫ କରିବା ପାଇଁ ପ୍ରତିଶ୍ରୁତି ଦେବା ପରେ ଆନ୍ଦୋଳନ ହଟିଥିଲା।
ସୂଚନା ଅନୁସାରେ ସୋମବାର ଅପରାହ୍ନ ୨ଟାବେଳେ ଖଣ୍ଡଗିରି ଥାନା ବରମୁଣ୍ଡା ବସ୍ଷ୍ଟାଣ୍ଡ ନିକଟରେ ଏକ ସ୍ମାର୍ଟ ସିଟି ଅନ୍ଲାଇନ ଅଟୋ ଯାଉଥିଲା। ଏହି ସମୟରେ ଆଉ ଏକ ଟାଟା ଏସିଇ ଆସି ଧକ୍କା ଦେଇଥିଲା। ଦୁର୍ଘଟଣାକୁ ନେଇ ଦୁଇ ଚାଳକଙ୍କ ଯୁକ୍ତିତର୍କ ହୋଇଥିଲା। ଟାଟା ଏସିଇ ଚାଳକଜଣକ ସ୍ଥାନୀୟ ଅଞ୍ଚଳର ହୋଇଥିବାରୁ ସେ କିଛି ସହଯୋଗୀଙ୍କୁ ଡାକି ଅନ୍ଲାଇନ ଅଟୋ ଚାଳକ ସନ୍ତୋଷଙ୍କୁ ମରଣାନ୍ତକ ଆକ୍ରମଣ କରିଥିଲେ।