କଟକ ଅଫିସ,୨୫।୨: କଟକ ଜିଲା ମାନସିଂପାଟଣା ମସ୍ତରାମ ମଠ ଗଳିରେ ଥିବା ଏକ ଭଡ଼ାଘରେ ଜଣେ କଲେଜ ଛାତ୍ରୀଙ୍କ ହାତ ଗୋଡ଼ ବାନ୍ଧି କିରୋସିନ ଢ଼ାଳି ନିଆଁ ଲଗାଇଦେଇଛନ୍ତି ଦୁର୍ବୃତ୍ତ। ଗୁରୁବାର ପୂର୍ବାହ୍ନ ସାଢ଼େ ୧୧ରୁ ୧୨ରେ ଘଟଣା ଘଟିଥିବା ବେଳେ ଖବର ପାଇଁ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବା ସହ ଛାତ୍ରୀଙ୍କୁ ଉଦ୍ଧାର କରିଛନ୍ତି। ତାଙ୍କୁ ଗୁରୁତର ଅବସ୍ଥାରେ କଟକ ମେଡିକାଲକୁ ସ୍ଥାନାନ୍ତର କରାଯାଇଥିବା ସୂଚନା ମିଳିଛି।
ସୂଚନାନୁଯାୟୀ, ଉକ୍ତ ଭଡାଘରେ ଘର ମାଲିକ ଉପରେ ରହୁଥିବା ବେଳେ ତଳେ ଭଡାଟିଆମାନେ ରହୁଥିଲେ। ସେଠାରେ ଛାତ୍ରୀଙ୍କ ପରିବାର ମଧ୍ୟ ରହୁଥିଲେ। ତାଙ୍କ ବାପା ଅଟୋ ଚଲାଉ ଥିବା ବେଳେ ମା’ ଗୃହିଣୀ। ସକାଳେ ଝିଅ କଲେଜରୁ ଫେରିବା ପରେ ମା’ ଘର ବାହାରପଟୁ ତାଲା ଦେଇ ନିକଟସ୍ଥ ମନ୍ଦିରକୁ ଯାଇଥିଲେ। ବାପା କାମରେ ଭୁବନେଶ୍ୱର ଯାଇଥିଲେ। ଏହି ସମୟରେ ୪ ଜଣ ଯୁବକ ଆସି ତାଙ୍କ ଘର ତାଲା ଭାଙ୍ଗି ଭିତରେ ପଶିଥିଲେ। ପରେ ସେମାନେ ଛାତ୍ରୀଜଣଙ୍କୁ ମାର୍ପିଟ କରିବା ସହ ପିନ୍ଧିଥିବା ଓଢ଼ଣୀରେ ତାଙ୍କ ଗୋଡ଼ହାତ ଏବଂ ମୁହଁକୁ ବାନ୍ଧି ଦେଇଥିଲେ। ପରେ ସେମାନେ ନିଶା ଇଞ୍ଜେକ୍ସନ ଦେଇ କିରୋସିନ ପକାଇ ନିଆଁ ଲଗାଇ ସେଠାରୁ ଚମ୍ପଟ ମାରିଥିଲେ। ଘରମାଲିକ ଧୂଆଁ ବାହାରୁଥିବା ଦେଖି ଛାତ୍ରୀଙ୍କ କୋଠରିରେ ପହଞ୍ଚି ଚକିତ ହୋଇଯାଇଥିଲେ। ସେ ଟାଣିଟାଣି ଝିଅକୁ ବାହାର କରିବା ସହ ଅଗ୍ନିଶମବିଭାଗ ଏବଂ ତାଙ୍କ ମା’ବାପାଙ୍କୁ ଖବର ଦେଇଥିଲେ। ନିଆଁରେ ଘରର ସମସ୍ତ ଆସବାବପତ୍ର ପୋଡ଼ି ପାଉଁଶ ହୋଇଯାଇଥିବା ବେଳେ ଝିଅ କିଛି ମାତ୍ରାରେ ପୋଡ଼ି ଯାଇଛନ୍ତି। ଖବର ପାଇ ଲାଲ୍ବାଗ ଥାନା ପୋଲିସ ପହଞ୍ଚି ଛାତ୍ରୀଙ୍କୁ ଡାକ୍ତରଖାନା ପଠାଇବା ସହ ତଦନ୍ତ ଆରମ୍ଭ କରିଛି। ଏ ସକ୍ରାନ୍ତରେ ପଡୋଶୀଙ୍କୁ ପଚରାଯାଇଥିଲେ ହେଁ ସେମାନେ ତାଙ୍କ ସହ ମିଳାମିଶା କରୁ ନ ଥିବାରୁ ସବିଶେଷ ଜାଣି ନ ଥିବା କହିଛନ୍ତି। ତେବେ କେଉଁ କାରଣ ଯୋଗୁ ଯୁବକମାନେ ଏଭଳି ଲୋମହର୍ଷଣକାରୀ କାଣ୍ଡ ଘଟାଇଲେ ସେ ନେଇ ଚର୍ଚ୍ଚା ଲାଗି ରହିଛି।