ଭୁବନେଶ୍ୱର,୧୧।୧(ବ୍ୟୁରୋ): ଖଣ୍ଡଗିରି ଥାନା ଅନ୍ତର୍ଗତ ଏକ ଘରୋଇ କଲେଜର ବିଟେକ୍ ପ୍ରଥମ ବର୍ଷର ଛାତ୍ର ପ୍ରୀତମ କୁମାର ଷଡ଼ଙ୍ଗୀଙ୍କୁ ସୋମବାର ସାରେ ମରଣାନ୍ତକ ଆକ୍ରମଣ ସହ ଉଠାଇ ନେଇ ଅଟକ ରଖି ହତ୍ୟା ଧମକ ଘଟଣାରେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଅଭିଯୁକ୍ତ ସିନିୟର ଛାତ୍ର ନୀତୀଶ କୁମାର ତ୍ରିପାଠୀଙ୍କୁ ଗିରଫ କରି ମଙ୍ଗଳବାର କୋର୍ଟଚାଲାଣ କରିଛି। ନୀତୀଶ ଉକ୍ତ କଲେଜର ବିଟେକ୍ ଦ୍ୱିତୀୟ ବର୍ଷ ଛାତ୍ର ହୋଇଥିବା ବେଳେ ତାଙ୍କ ଘର ଯାଜପୁର ଜିଲା ମଙ୍ଗଳପୁର ଥାନା ଅଞ୍ଚଳରେ। ତେବେ କୋର୍ଟରେ ଜାମିନ ନାମଞ୍ଜୁର ହେବାରୁ ନୀତିଶ୍ଙ୍କୁ ଝାରପଡ଼ା ଜେଲକୁ ପଠାଇ ଦିଆଯାଇଛି। ପୋଲିସ ତାଙ୍କଠାରୁ ଗୋଟିଏ ବାଇକ୍ ଓ ଆକ୍ରମଣରେ ବ୍ୟବହୃତ ଲୁହାରଡ୍କୁ ଜବତ କରିଛି। ପୂର୍ବଶତ୍ରୁତାକୁ କେନ୍ଦ୍ର କରି ଅଭିଯୁକ୍ତ ନୀତିଶ୍ ଏଭଳି କାଣ୍ଡ କରିଥିବା ପୋଲିସ ପକ୍ଷରୁ ସୂଚନା ଦିଆଯାଇଛି।
ସୂଚନାଯୋଗ୍ୟ, ପ୍ରୀତମ ଏବଂ ଅଭିଯୁକ୍ତ ନୀତୀଶ୍ଙ୍କ ମଧ୍ୟରେ କଲେଜ୍ ୱେଲ୍କେମ୍ ସମୟରୁ ଶତ୍ରୁତା ଥିଲା। ଏନେଇ ପୂର୍ବରୁ ନୀତୀଶଙ୍କ ନଁାରେ ପ୍ରୀତମ ଥାନାରେ ଅଭିଯୋଗ କରିଥିଲେ। ଏହାକୁ ନେଇ ସୋମବାର ପ୍ରୀତମଙ୍କୁ ନୀତିଶ୍ ଗାଳିଗୁଲଜ କରିଥିଲେ। ପରେ ସା ପ୍ରାୟ ୭ଟା ୩୦ବେଳେ ପ୍ରୀତମ ହଷ୍ଟେଲକୁ ଫେରୁଥିବା ବେଳେ ସାଙ୍ଗମାନଙ୍କ ସହ ନୀତୀଶ ପୂର୍ବ କଥାକୁ ନେଇ ତାଙ୍କ ସହ ଯୁକ୍ତିତର୍କ କରି ଲୁହାରଡ଼ରେ ଆକ୍ରମଣ କରିଥିଲେ। ଆକ୍ରମଣରେ ପ୍ରୀତମଙ୍କ ମଣ୍ଡ ଫାଟିଯିବାରୁ ରକ୍ତସ୍ରାବ ହୋଇଥିଲା। ପରେ ନୀତୀଶ ତାଙ୍କ ସହଯୋଗୀଙ୍କ ସହ ପ୍ରୀତମଙ୍କୁ ବାଇକ୍ରେ ବସାଇ ଜଟଣୀକୁ ନେଇଯାଇଥିଲେ। ସେଠାରେ ଏକ ମେଡିସିନ୍ ଦୋକାନରେ ତାଙ୍କ ଚିକିତ୍ସା କରିବା ପରେ ଏକ ଖୋଲାସ୍ଥାନରେ ପ୍ରୀତମଙ୍କୁ ବଳପୂର୍ବକ ଅଟକ ରଖିଥିଲେ। ଏପଟେ ପ୍ରୀତମ ହଷ୍ଟେଲ ନ ଫେରିବାରୁ ତାଙ୍କ ସାଙ୍ଗମାନେ ଏ ନେଇ ଥାନାରେ ଜଣାଇଥିଲେ। ପ୍ରୀତମଙ୍କ ଫୋନକୁ ଟ୍ରାକ୍ କରି ରାତି ପ୍ରାୟ ୧୨ଟା ୩୦ଟା ବେଳେ ପୋଲିସ ଜଟଣୀ ଅଞ୍ଚଳରୁ ତାଙ୍କୁ ଉଦ୍ଧାର କରିବା ସହ ନୀତୀଶଙ୍କୁ କାବୁ କରିଥିଲେ। ପରେ ପ୍ରୀତମଙ୍କ ଅଭିଯୋଗକ୍ରମେ ପୋଲିସ ମାମଲା (ନଂ.୨୦/୨୩) ରୁଜୁ କରିଥିଲା।