ସମ୍ବଲପୁର,୯ା୧୨(ବ୍ୟୁରୋ): ସମ୍ବଲପୁର ଜିଲା ଯୁଯୁମୁରା ପଞ୍ଚାୟତ ସମିତି ପକ୍ଷରୁ ତହସିଲ ଅଫିସ ପଛପଟେ ମିନି ଷ୍ଟାଡିୟମ ନିର୍ମାଣ କାମରେ ଅନିୟମିତତା ଅଭିଯୋଗ ହୋଇଥିଲା। ଯୁଯୁମୁରା ସରପଞ୍ଚ ବାସନ୍ତି ପ୍ରଧାନ ଓ ସମିତି ସଭ୍ୟ ଜୟନ୍ତ ପ୍ରଧାନ ବିଡିଓଙ୍କୁ ଏ ନେଇ ଅଭିଯୋଗ କରିଥିଲେ। ଏହା ଜଣାପଡିବା ପରେ ଠିକା ନେଇଥିବା ବ୍ୟକ୍ତି ଓ ବ୍ଲକ ପ୍ରଶାସନ ଘଟଣାକୁ ଚପାଇବାକୁ ଉଦ୍ୟମ କରିଛନ୍ତି। ସୂଚନାଫଳକ ନ ଥିବା ନେଇ ହୋଇଥିବା ଅଭିଯୋଗକୁ ଚପାଇବାକୁ ଯାଇ ପୁରୁଣା ସୂଚନା ଫଳକରେ ରଙ୍ଗ ଲଗାଇ ପୁଣି ଲେଖି ଦିଆଯାଇଛି। ୨୦୧୪ରେ ଜମିର ଉନ୍ନତିକରଣ ପାଇଁ ଅନୁଦାନ ଆସିଥିବା କାମର ସୂଚନା ରହିଥିଲା। ହେଲେ ଏହା ଉପରେ ରଙ୍ଗ ଲଗାଇ ନୂତନ କାମର ସୂଚନା ଲେଖାଯାଇଛି। ପୂର୍ବ ଓ ପର ଫଟୋ ଦେଖିଲେ ଏହା ସ୍ପଷ୍ଟ ହୋଇଯାଉଛି। ଅନ୍ୟପଟେ ଏହି ଯୋଜନାରେ ସରକାରୀ ଜମି ଜବରଦଖଲ ଆଶଙ୍କା, କିମ୍ବା ଜବରଦଖଲ ହୋଇଥିବା ମୂଲ୍ୟବାନ ଜମିକୁ ଉଚ୍ଛେଦ କରି ପାଚେରି ନିର୍ମାଣ କରିବାକୁ ନିୟମ ରହିଛି। ପାଚେରି କାନ୍ଥ ଉଚ୍ଚତା ମଧ୍ୟ କମ ରଖିବାକୁ ନିର୍ଦ୍ଦେଶ ଅଛି। ହେଲେ ଏହି କାମରେ ବ୍ୟାପକ ଅନମିୟତା କରାଯାଉଥିବା ଅଭିଯୋଗ ହେଉଛି। ପୂର୍ବରୁ ଏହି ମିନି ଷ୍ଟାଡିୟମର ଉନ୍ନତି କରିବା ପାଇଁ ପ୍ରଥମେ ୧୦ ଲକ୍ଷ ଓ ପରେ ୫ ଲକ୍ଷ ଟଙ୍କାର କାମ ହୋଇସାରିଛି। ଜମି ଚିହ୍ନଟ ହୋଇ ପଟ୍ଟା ମଧ୍ୟ ହୋଇସାରିଛି। ଜବରଦଖଲ ହେବାର କୌଣସି ଭୟ ନାହିିଁ। ହେଲେ ଏହି ସ୍ଥାନରେ କାହା ସ୍ବାର୍ଥରେ ୧୦ ଲକ୍ଷ ଟଙ୍କା ବ୍ୟୟ ଅଟକଳ କରାଯାଇ କାମ ଆରମ୍ଭ କରାଯାଇଥିଲା ବୋଲି ପ୍ରଶ୍ନ ଉଠୁଛି। ସୂଚନାଯୋଗ୍ୟ, ଯୁଯୁମୁରା ତହସିଲ ପକ୍ଷରୁ ବ୍ଲକ ପ୍ରଶାସନକୁ ୨୬ ଲକ୍ଷ ଟଙ୍କା ଅନୁଦାନ ଦିଆଯାଇଥିଲା। ସରକାରୀ ଜମି ରକ୍ଷଣାବେକ୍ଷଣ କରିବା ନେଇ ଖର୍ଚ୍ଚ କରିବାକୁ ଚିଠି କରାଯାଇଥିଲା। କୁକୁଡାପାଲି, ଜୟନ୍ତପୁର, ଯୁଯୁମୁରା ୩ ସ୍ଥାନରେ ଟଙ୍କା ଖର୍ଚ୍ଚ କରିବାକୁ ପ୍ରସ୍ତାବ ଦିଆଯାଇଥିଲା। ହେଲେ ଯୁଯୁମୁରା କାମରେ ଅନିୟମିତତା ହୋଇଥିବା ଅଭିଯୋଗ ହୋଇଛି। ପାଚେରି ନିର୍ମାଣ କାମ ମଧ୍ୟ ନିମ୍ନମାନର ହୋଇଛି। ଏ ସମ୍ପର୍କରେ ଯୁଯୁମୁରା ତହସିଲଦାର ଅଭିଷେକ ସାହୁ କହିଛନ୍ତି, ବ୍ଲକ ପ୍ରଶାସନକୁ ଅନୁଦାନ ଦିଆଯାଇଛି। କାମ ସମ୍ପୂର୍ଣ୍ଣ ହେଲା ପରେ ଯାଞ୍ଚ କରାଯିବ ଓ ୟୁସି ମଗାଯିବ ବୋଲି କହିଥିଲେ।