କେନ୍ଦୁଝର,୧୫ା୨(ସ୍ବ.ପ୍ର.): ଓଡ଼ିଶା ରାଜ୍ୟ ଶିଶୁ ଅଧିକାର ସୁରକ୍ଷା ଆୟୋଗ ପକ୍ଷରୁ ଚିଠି ନମ୍ବର ୧୯୦/୧୩-୨-୨୦୨୩ ରେ ‘ଧରିତ୍ରୀ’ରେ ପ୍ରକାଶିତ ଏକ ସମ୍ବେଦନଶୀଳ ଖବର ଉପରେ କେନ୍ଦୁଝର ଏସ୍ପି, ଜିଲା ଶିଶୁ ସୁରକ୍ଷା ଅଧିକାରୀ ଓ ଜିଲା ଶ୍ରମ ଅଧିକାରୀଙ୍କୁ ସବିଶେଷ ରିପୋର୍ଟ ମାଗିଛନ୍ତି। ଖବରକୁ ଭିତ୍ତି କରି ନିଜ ଆଡୁ ଆୟୋଗ କେସ୍ ନମ୍ବର ୪୨/୨୩ରେ ମାମଲା ରୁଜୁ କରି ଏହି ରିପୋର୍ଟ ମାଗିଛନ୍ତି। କାର୍ରେ ନାବାଳିକାଙ୍କୁ ବଳାତ୍କାର ଉଦ୍ୟମ, ଅଭିଯୁକ୍ତ ଠିକାଦାର ଗିରଫ ଶୀର୍ଷକ ଖବର ଗତ ୧୩ ତାରିଖରେ ‘ଧରିତ୍ରୀ’ରେ ପ୍ରକାଶ ପାଇଥିଲା। ପୀଡ଼ିତାଙ୍କ ବୟସ, ମାନସିକ ସ୍ଥିତି, ଏତଲା ଓ ଚାର୍ଜ ସିଟ୍ କପି, କାଉନସେଲିଂ କପି, ସ୍ବାସ୍ଥ୍ୟ ଓ ମାନସିକ ଅବସ୍ଥା, ସୁରକ୍ଷା ବ୍ୟବସ୍ଥା, ଥଇଥାନ ବ୍ୟବସ୍ଥାର କପି ଦେବାକୁ ଆୟୋଗ କହିଛନ୍ତି। ସେହିପରି ଏହି ଘଟଣାକୁ ନେଇ ଜିଲାପାଳଙ୍କୁ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମଧ୍ୟ କପି ଦେବାକୁ କହିଛନ୍ତି।