କଟକ ଅଫିସ, ୨୭।୨: କଟକ ମାନସିଂପାଟଣା ମସ୍ତରାମ ମଠ ଗଳିରେ ଜଣେ କଲେଜ ଛାତ୍ରୀଙ୍କୁ ହାତଗୋଡ଼ ବାନ୍ଧି ପୋଡ଼ି ମାରିବାକୁ ଉଦ୍ୟମ ଘଟଣାରେ ଲାଲବାଗ ପୋଲିସ ଦୁଇ ଜଣଙ୍କୁ ଅଟକ ରଖି ପଚରାଉଚରା ଚଳାଇଛି। ଏହି ଘଟଣାରେ ଜଣେ ମହିଳାଙ୍କୁ ମିଶାଇ ୪ ଜଣଙ୍କ ସମ୍ପୃକ୍ତି ରହିଥିବା ପୋଲିସ କହିଛି। ଏହି ଘଟଣା କାହିଁକି ଓ କିପରି ଘଟିଲା, ତାହାକୁ ନେଇ ପୋଲିସ ବିଭିନ୍ନ ଦିଗରୁ ଅଧିକ ତଦନ୍ତ
ଜାରି ରଖିଛି। ପୋଲିସ ଅଟକ ରଖିଥିବା ଦୁଇ ଜଣଙ୍କ ମଧ୍ୟରୁ ଜଣେ ସମ୍ପୃକ୍ତା ଛାତ୍ରୀଙ୍କ ମାଉସୀ ପୁଅ ଭାଇ ବୋଲି ବିଶେଷ
ସୂତ୍ରରୁ ଜଣାପଡିଛି। ତେବେ ଅଟକ ରହିଥିବା ଦୁଇ ଜଣଙ୍କ ସମେତ ତାଙ୍କ ପରିବାର ନାମରେ ୪୨ ମୌଜା ବେଣ୍ଟକାର ଫାଣ୍ଡିରେ ୨୦ ଦିନ ପୂର୍ବରୁ ସମ୍ପୃକ୍ତା ଛାତ୍ରୀଙ୍କ ପରିବାର ପକ୍ଷରୁ ଏକ ଅଭିଯୋଗ ହୋଇଥିଲା ବୋଲି ବେଣ୍ଟକାର ଫାଣ୍ଡି ଅଧିକାରୀ କହିଛନ୍ତି। ଅଭିଯୋଗ ହୋଇଥିବା ପରିବାର ଛାତ୍ରୀଙ୍କ ଫଟୋ ସୋସିଆଲ ମିଡିଆରେ ଅପ୍ଲୋଡ କରିଥିଲେ। ଏହାକୁ ନେଇ ଛାତ୍ରୀଙ୍କ ପରିବାର ପକ୍ଷରୁ କଟକ ସାଇବର ଥାନାରେ ଅଭିଯୋଗ ହୋଇଥିଲା। ଲାଲବାଗ ଥାନାରେ ଅଟକ ଥିବା ଦୁଇ ଜଣଙ୍କ ମଧ୍ୟରୁ ଜଣଙ୍କର ଅଭିଭାବକ କହିଛନ୍ତି ଯେ, ମୋ ପୁଅ ନିର୍ଦ୍ଦୋଷ। ଏହି ମାମଲା ଗତ ଦୁଇ ମାସ ହେବ ଚାଲିଛି। ଏଥିପାଇଁ ଆମେ ବେଣ୍ଟକାର ଫାଣ୍ଡି ଓ ପରେ କଟକ ସଦର ଥାନାକୁ ମଧ୍ୟ ଯାଇଛୁ। ଘଟଣାର କୌଣସି ସମାଧାନ ଏପର୍ଯ୍ୟନ୍ତ ଥାନାରେ ବାହାରି ପାରିନାହିଁ। ତାଙ୍କ ଝିଅ ପୋଡ଼ିଯିବାରୁ ଏ ବିଷୟରେ ପୋଲିସ ତନାଘନା ଆରମ୍ଭ କରିଛି। ଅପରପକ୍ଷେ ଲାଲବାଗ ଥାନା ଅଧିକାରୀ ପାଞ୍ଚ ଜଣିଆ ସାଇଣ୍ଟିଫିକ୍ ଟିମ୍ ଧରି ଶୁକ୍ରବାର ଘଟଣାସ୍ଥଳରେ ପହଞ୍ଚି ତଦନ୍ତ କରିଥିବାର ଜଣାପଡିଛି।
ସୂଚନାଯୋଗ୍ୟ, ଛାତ୍ରୀ ଜଣଙ୍କ ଖ୍ରୀଷ୍ଟ କଲେଜରେ ପଢୁଥିବାବେଳେ ମା’ବାପା ଓ ଭାଇଙ୍କ ସମେତ ବର୍ଷେ ହେବ ମାନସିଂହପାଟଣାଠାରେ ଘରଭଡ଼ା ନେଇ ରହୁଥିଲେ। ଉକ୍ତ ଘରେ ଗୁରୁବାର ସମ୍ପୃକ୍ତା ଛାତ୍ରୀଙ୍କୁ ଦୁର୍ବୃତ୍ତମାନେ ନିଶା ଇଞ୍ଜେକସନ ଦେବା ସହ ହାତଗୋଡ଼ ବାନ୍ଧି କିରୋସିନ ଢାଳି ନିଅଁା ଲଗାଇ ଦେଇଥିଲେ। ପୋଲିସ ପହଞ୍ଚି ତାଙ୍କୁ ଉଦ୍ଧାର କରି ଏସ୍ସିବି ମେଡିକାଲରେ ଭର୍ତ୍ତି କରିଥିଲା। ସେଠାରେ ସେ ଚିକିତ୍ସିତ ହେଉଥିବାବେଳେ ଶୁକ୍ରବାର ସୁଦ୍ଧା ତାଙ୍କ ସ୍ବାସ୍ଥ୍ୟାବସ୍ଥାରେ ଉନ୍ନତି ପରିଲକ୍ଷିତ ହେଉଥିବା ଚିକିତ୍ସା କରୁଥିବା ଡାକ୍ତର କହିଛନ୍ତି।