ଉମରକୋଟ, ୨୨।୩(ସନ୍ତୋଷ ଶତପଥୀ): ନବରଙ୍ଗପୁର ଜିଲା ଉମରକୋଟ ସହର ମାଁ ପେଣ୍ଡ୍ରାଣୀ ମନ୍ଦିର ନିକଟରେ ଥିବା ଉତ୍କର୍ଷ ସ୍ମଲ୍ ଫାଇନାନ୍ସ ବ୍ୟାଙ୍କରେ କିଛି ଦୁର୍ବୁତ୍ତ ଲୁଟ୍ ଉଦ୍ୟମ କରିଛନ୍ତି। କିନ୍ତୁ ଏଥିରେ ସେମାନେ ବିଫଳ ହୋଇଛନ୍ତି।
ସୂଚନାନୁଯାୟୀ, କେତେଜଣ ଦୁର୍ବୃତ୍ତ ପ୍ରଥମେ ବ୍ୟାଙ୍କ ଭିତରେ ପ୍ରବେଶ କରିଥିଲେ। ସେମାନେ ସିସି କ୍ୟାମରାରେ କାଦୁଅ ଲଗାଇ ଦେଇଥିଲେ। ଏହାପରେ ବ୍ୟାଙ୍କର ପ୍ରଥମ ସଟର ତାଲା ଭାଙ୍ଗି ଭିତରକୁ ପଶିଥିଲେ। ଭିତରେ ଥିବା ଲକରକୁ ଭାଙ୍ଗିବାକୁ ଚେଷ୍ଟା କରିଥିଲେ। ଏହି ସମୟରେ ବ୍ୟାଙ୍କରେ ଲାଗିଥିବା ସାଇରନଟି ବାଜିବାରୁ ଲୁଟ୍ ଉଦ୍ୟମ କରିବାକୁ ଆସିଥିବା ଦୁର୍ବୁତ୍ତ ପଳାଇଥିଲେ।
ଉକ୍ତ ସାଇରନର ନୋଟିଫିକେଶନ ଭୁବନେଶ୍ୱର ମୁଖ୍ୟ କାର୍ଯ୍ୟାଳୟରେ ବାଜିଥିଲା। ଭୁବନେଶ୍ବର କାର୍ଯ୍ୟାଳୟରୁ ଉମରକୋଟ ଥାନା ଅଧିକାରୀ ଡମ୍ବରୁଧର ପ୍ରଧାନଙ୍କୁ ସୂଚନା ଦିଆଯାଇଥିଲା। ସଙ୍ଗେସଙ୍ଗେ ଉମରକୋଟ ଏସ୍ଡିପିଓ ମଧୁସିକ୍ତା ମିଶ୍ର, ଥାନାଧିକାରୀ ଡମ୍ବରୁ ଧର ପ୍ରଧାନ, ଏସ୍ଆଇ ଶିବାଜୀ ପଣ୍ଡା, ଅକ୍ଷୟ ମିଶ୍ର, ସୌମେନ୍ଦ୍ର ସେଠ ଘଟଣା ସ୍ଥଳରେ ପହଞ୍ଚି ଥିଲେ। ସେତେବେଳକୁ ଦୁର୍ବୃତ୍ତମାନେ ପଳାଇଥିଲେ। ବ୍ୟାଙ୍କ ମ୍ୟାନେଜର ଦିଲୀପ କୁମାର ପ୍ରଧାନ ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ଏସ୍ଆଇ ଶିବଜି ପଣ୍ଡା, ସାଇଣ୍ଟିଫିକ୍ ଟିମ୍ ସହ ପହଞ୍ଚତ୍ ତଦନ୍ତ କରିଥିଲେ। ଉମରକୋଟ ପୋଲିସ କେସ ନଂ ୧୫୫/୨୪ ରେ ମାମଲା ରୁଜୁ କରିଛି। ପୋଲିସ ପାଟ୍ରୋଲିଂ ଢିଲା ଯୋଗୁ ଚୋରି ଦୁର୍ବୃତ୍ତଙ୍କ ସାହସ ବଢୁଛି ବୋଲି ଚର୍ଚ୍ଚା ହେଉଛି।