ପୁରୁଷୋତ୍ତମପୁର,୨୫।୬(ଡି.ଏନ୍.ଏ.): ପରପୁରୁଷ ସହ ଶାରୀରିକ ସମ୍ପର୍କ ରଖିବାକୁ ମନା କରିବାରୁ ଜଣେ ରକ୍ଷିତାଙ୍କୁ ହତ୍ୟା ଉଦ୍ୟମ କରାଯାଇଛି। ଏଭଳି ଘଟଣା ଘଟିଛି ଗଞ୍ଜାମ ଜିଲା ପୁରୁଷୋତ୍ତମପୁରରେ। ଜଣେ ମହିଳାଙ୍କୁ ରକ୍ଷିତା ବୋଲି କହୁଥିବା ଯୁବକ ପରପୁରୁଷ ସହ ଶାରୀରିକ ସମ୍ପର୍କ ଲାଗି ତାଙ୍କୁ ବାଧ୍ୟ କରିଥିଲେ। ଏଥିରେ ସେ ରାଜି ନ ହେବାରୁ ତାଙ୍କୁ ଏକ କୋଠରିରେ ବନ୍ଦ କରି ରଖି ମରଣାନ୍ତକ ଆକ୍ରମଣ ସହ ହତ୍ୟା ଉଦ୍ୟମ କରିଥିବା ପୁରୁଷୋତ୍ତମପୁର ଥାନାରେ ଅଭିଯୋଗ ହୋଇଛି। ଏସ୍ଡିପିଓ ସୂର୍ଯ୍ୟମଣି ପ୍ରଧାନ ଓ ଆଇଆଇସି ପ୍ରିୟୁସ ରଞ୍ଜନ ଛୋଟରାୟ ଘଟଣାକୁ ଗୁରୁତର ଭାବେ ଗ୍ରହଣ କରିଛନ୍ତି। କେସ୍ ନଂ. ୩୫୨/୨୨ରେ ମାମଲା ରୁଜୁ କରି ଦୁଇ ଜଣ ଯୁବକଙ୍କୁ ଥାନାରେ ଅଟକ ରଖି ତଦନ୍ତ ଚଳାଇଛନ୍ତି। ଯୁବକ ଦ୍ବୟ ହେଲେ ବ୍ରହ୍ମପୁର ରାମକୃଷ୍ଣ ନଗରର ମହମ୍ମଦ ଲାଇକ ଓ ପୁରୁଷୋତ୍ତମପୁର ନାରାୟଣୀ ଢାବା ହୋଟେଲ ମାଲିକ ଅରୁଣ କୁମାର ନାୟକ।
ମହିଳାଙ୍କ ଅଭିଯୋଗ ଅନୁଯାୟୀ, ଦୀର୍ଘ ୪ ବର୍ଷ ହେଲା ମହମ୍ମଦ ଲାଇକ ତାଙ୍କୁ ଭଲ ପାଇ ବ୍ରହ୍ମପୁରରେ ଏକ ଭଡାଘରେ ରଖିଥିଲେ। ମହମ୍ମଦ ଜଣେ ହୋଟେଲ ରୋଷେୟା ହୋଇଥିବାରୁ ପୁରୁଷୋତ୍ତମପୁର ସହର ଉପକଣ୍ଠରେ ଥିବା ନାରାୟଣୀ ଢାବାରେ କାର୍ଯ୍ୟ କରୁଛନ୍ତି। ଶୁକ୍ରବାର ଅପରାହ୍ନରେ ମହିଳାଙ୍କୁ ପୁରୁଷୋତ୍ତମପୁରରେ ଘର ଭଡା ନେଇ ରହିବା ଲାଗି ଡକାଇଥିଲେ। ସେ ଆସିବା ପରେ ହୋଟେଲ ପଛପଟେ ଥିବା ଘରେ ନେଇ ବସାଇଥିଲେ। ପରେ ତାଙ୍କ ହୋଟେଲ ମାଲିକ ସହ ଶାରୀରିକ ସମ୍ପର୍କ ରଖିବାକୁ କହିଥିଲେ। ସେ ମନା କରି ଘର ବାହାରକୁ ଚାଲି ଆସିବାରୁ ଉଭୟେ ମହମ୍ମଦ ଲାଇକ ଓ ଅରୁଣ ପୁଣି ଘର ଭିତରକୁ ତାଙ୍କୁ ନେଇ ଦୈହିକ ସମ୍ପର୍କ ରଖିବାକୁ ବାଧ୍ୟ କରିଥିଲେ। ମହିଳା ଜଣକ ରାଜି ନ ହେବାରୁ ତାଙ୍କୁ ସେମାନେ ମରଣାନ୍ତକ ଆକ୍ରମଣ କରିଥିଲେ। ସେ ପିନ୍ଧିଥିବା ସୁନା ଚେନଟିକୁ ଛିଣ୍ଡାଇ ନେଇ ଯାଇଥିଲେ। କୌଶଳକ୍ରମେ ମହିଳା ଜଣକ ସେମାନଙ୍କ କବଳରୁ ଖସିିି ଆସିଥିଲେ। ଏହି ସମୟରେ ରାସ୍ତାରେ ଯାଉଥିବା ଏକ ବସ୍ ଯୋଗେ ବ୍ରହ୍ମପୁର ଯାଇ ରାତିରେ ମହିଳା ଥାନାରେ ଜଣାଇଥିଲେ। ପୋଲିସ ତାଙ୍କ ଅବସ୍ଥା ଦେଖି ଚିକିତ୍ସା କରାଇଥିଲେ। ଘଟଣାଟି ପୁରୁଷୋତ୍ତମପୁର ଥାନା ଅଞ୍ଚଳରେ ଘଟିଥିବାରୁ ପୁରୁଷୋତ୍ତମପୁର ପୋଲିସକୁ ଖବର ଦେବା ସହ ମହିଳା ଜଣଙ୍କୁ ପୁରୁଷୋତ୍ତମପୁର ଥାନାରେ ଲିଖିତ ଅଭିଯୋଗ କରିବାଲାଗି ପରାମର୍ଶ ଦେଇଥିଲେ। ଏହାକୁ ନେଇ ଶନିବାର ମହିଳା ଜଣକ ପୁରୁଷୋତ୍ତମପୁର ଥାନାକୁ ଆସି ଅଭିଯୋଗ କରିଥିବା ଏସ୍ଡିପିଓ ସୂର୍ଯ୍ୟମଣି ପ୍ରଧାନ ଓ ଆଇଆଇସି ପ୍ରିୟୁସ ରଞ୍ଜନ ଛୋଟରାୟ କହିଛନ୍ତି।
ସୂଚନାଯୋଗ୍ୟ, ମହିଳା ଜଣକ ପୂର୍ବରୁ ବ୍ରହ୍ମପୁର ଗୋଇଲୁଣ୍ଡି ଅଞ୍ଚଳରେ ଜଣେ ଯୁବକଙ୍କୁ ବିବାହ କରିଥିଲେ। ତାଙ୍କର ୨ଟି ଝିଅ ଓ ଗୋଟିଏ ପୁଅ ପୂର୍ବ ସ୍ବାମୀଙ୍କ ନିକଟରେ ରହିଛନ୍ତି। ସେ ପୂର୍ବ ସ୍ବାମୀଙ୍କ ନାମରେ ୩ ବର୍ଷ ତଳେ ମହିଳା ଥାନାରେ କେସ ମଧ୍ୟ କରିଛନ୍ତି। ମହମ୍ମଦ ଲାଇକ ମଧ୍ୟ ବିବାହିତ। ସେ ତାଙ୍କ ସ୍ତ୍ରୀଙ୍କୁ ଛାଡି ଦେଇଛନ୍ତି। ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠିଥିବାରୁ ସେମାନେ ଘରଛାଡି ଭଡାରେ ରହୁଥିଲେ।